ஆக்ஷனில் அசத்தும் கமல்: தக் லைஃப் டீசர் வைரல்; படம் ரிலீஸ் எப்போது?

மணிரத்னம் இயக்கத்தில் கமல்ஹாசன் நடித்து வரும் தக் லைப் படத்தின் இறுதிக்கட்ட பணிகள் விறுவிறுப்பாக நடைபெற்று வரும் நிலையில், கமல்ஹாசன் பிறந்த நாளை முன்னிட்டு இந்த படம் எப்போது வெளியாகும் என்பது குறித்து அறிவிப்பு வெளியாகியுள்ளது.

1987-ம் ஆண்டு கமல்ஹாசன் சரண்யா நாசர், நிழல்கள் ரவி உள்ளிட்ட பலர் நடிப்பில் வெளியாகி வெற்றி பெற்ற படம் நாயகன். கமல்ஹாசனின் திரை வாழ்க்கையில் நாயகன் படம் முக்கிய படமாக அமைந்துள்ளது. நாயகன் பெரிய வெற்றிப்படமாக அமைந்திருந்தாலும், அதன்பிறகு கமல்ஹாசன் – மணிரத்னம் இருவரும் இணைந்து எந்த படத்தையும் தொடங்கவில்லை.

இதனிடையே தற்போது 36 வருடங்களுக்கு பிறகு கமல்ஹாசன் – மணிரத்னம் இருவரும் மீண்டும் இணைந்துள்ளனர். தக் லைஃப் என்று பெயரிடப்பட்டுள்ள இந்த படத்தில், கமல்ஹாசனுடன் த்ரிஷா,  நாசர், அபிராமி, கௌதம் கார்த்திக், ஜோஜூ ஜார்ஜ், ஐஸ்வர்யா லட்சுமி உள்ளிட்ட பலர் நடித்து வரும் நிலையில், ஏ.ஆர்,ரஹ்மான் இசையமைத்து வருகிறார். ஜெயம்ரவி மற்றும் துல்கர் சல்மான் ஆகியோர் விலகிய நிலையில், நடிகர் சிம்பு இந்த படத்தில் முக்கிய கேரக்டரில் நடித்து வருகிறார்.

விறுவிறுப்பாக நடைபெற்று வந்த தக் லைப் படத்தின் படப்பிடிப்பு சமீபத்தில் முடிவடைந்த நிலையில், படத்தின் இறுதிக்கட்ட பணிகள் பரபரப்பாக நடைபெற்று வருகிறது. இதனிடையே நடிகர் கமல்ஹாசனின் பிறந்த நாளான இன்று தக் லைப் படத்தின் முக்கிய அப்டேட் ஒன்று வெளியாகியுள்ளது. அதன்படி, தக் லைப் படத்தின் டீசர் ஒன்றை வெளியிட்டுள்ள படக்குழு, படம் எப்போது வெளியாகும் என்ற அறிவிப்பையும் வெளியிட்டுள்ளது.

அதிரடி ஆக்ஷன் காட்சிகளுடன் இருக்கும் இந்த டீசரில் கமல்ஹாசன் 2 கேரக்டர்களில் வருகிறார். இதன் மூலம் அவர் இரட்டை வேடத்தில் நடிக்கிறாரா அல்லது படத்தில் அவருக்கு 2 கேரக்டரா என்ற சந்தேகம் எழுந்துள்ள நிலையில், சிம்பு ஆக்ஷன் காட்சியில் கலக்கியுள்ளார். டீசரின் இறுதியில் இந்த படம் அடுத்த ஆண்டு ஜூன் 5-ந் தேதி வெளியாகும் என்று அறிவிக்கப்பட்டுள்ளது. கடைசியாக கமல்ஹாசன் நடிப்பில் வெளியான விக்ரம் படம் கடந்த 2022-ம் ஆண்டு ஜூன் 3-ந் தேதி வெளியானது குறிப்பிடத்தக்கது.