2-வது நாளே அதிரடி : வீட்டில் இருந்து வெளியேறும் 6 போட்டியாளர்கள் : பிக்பாஸ் ஆக்ஷன்

பிக்பாஸ் நிகழ்ச்சியின் 7-வது சீசன் நேற்று தொடங்கிய நிலையில், 2-வது நாளான இன்று பிக்பாஸ் 6 போட்டியாளர்களுக்கு தண்டனை கொடுத்துள்ளதாக வெளியாகியுள்ள ப்ரமோ தற்போது பெரிய எதிர்பார்ப்பை ஏற்படுத்தியுள்ளது.

கடந்த 2017-ம் ஆண்டு தொடங்கப்பட்ட பிக்பாஸ் நிகழ்ச்சி இதுவரை 6 சீசன்கள் முடிந்துள்ள நிலையில், 7-வது சீசன் அக்டோபர் 1-ந் தேதி (நேற்று) தொடங்கப்பட்டது. சீரியல் நடிகை வினுஷா தேவி, நடிகர் சரவண விக்ரம், எழுத்தாளர் பாவா செல்லதுரை, சீரியல் நடிகை ரவீனா, வனிதாவின் மகள் ஜோவிகா உள்ளிட்ட பலர் பங்கேற்றுள்ளனர்.

18 போட்டியாளர்கள் பங்கேற்றுள்ள இந்த நிகழ்ச்சியில் இதுவரை இல்லாத வகையில் 2 வீடுகள் அமைக்கப்பட்டுள்ளது. இதில் நிகழ்ச்சியின் தொடக்க நாளான நேற்று முதல் வீட்டில் போட்டியாளர்கள் அனைவரும் தங்கிய நிலையில், 2-வது வீட்டில் யார் வசிப்பார் என்ற கேள்வி எழுந்தது. தற்போது அதற்கு விடை சொல்லும் விதமாக பிக்பாஸ் நிகழ்ச்சியின் புதிய ப்ரமோ வெளியாகியுள்ளது.

இந்த ப்ரமோவில் இந்த வார தலைவர் விஜயை கவராத, ஐஸ், நெல்சன், விணுஷா தேவி, பாவா செல்லதுரை, அனன்யா, ரவீனா ஆகிய 6 பேரும் அடுத்த பாதை வழியாக 2-வது வீட்டுக்கு செல்லுமாறு பிக்பாஸ் உத்தரவிட்டுள்ளார். மேலும், இனி நீங்கள் இந்த வீட்டிற்கு வரும்போது தான் உங்களிடம் பேசுவேன் என்றும், இந்த வீட்டில் இருக்கும் 6 பேரும் எக்காரணத்தை கொண்டும் வெளியில் செல்லக்கூடாது என்று பிக்பாஸ் கூறியுள்ளார்.

இந்த ப்ரமோ தற்போது வைரலாகி வரும் நிலையில், ஆரம்பமே இப்படி அதிரடியாக இருக்கிறதே என்று ரசிகர்கள் கருத்து தெரிவித்து வரும் நிலையில், கடந்த சீசன்களை போல் இல்லாமல் தற்போது 2 வீடுகள் இருப்பதால், சண்டை சச்சரவுகள் அதிகம் இருக்குமா அல்லது சந்தோஷம் அதிகம் இருக்குமா என்று கேள்வியும் எழுப்பி வருகின்றனர். அதே சமயம் இளைஞர்கள் அதிகம் இருப்பதால் பிக்பாஸ் 7 விறுவிறுப்பாக இருக்கும் என்று கூறி வருகின்றனர்.