வசூல் வேட்டை நடத்தும் அமரன்: ஓ.டி.டி வெளியீட்டை தள்ளிவைக்க கோரும் திரையரங்கு உரிமையாளர்கள்!

தீபாவளி பண்டிகையை முன்னிட்டு வெளியான அமரன் படம் ரசிகர்கள் மத்தியில் பெரும் வரவேற்பை பெற்று வசூலில் சாதனை படைத்து வரும் நிலையில், இந்த படத்தை 8 வாரங்களுக்கு பிறகே ஒடிடி தளத்தில் வெளியிட வேண்டும் என்று தியேட்டர் உரிமையாளர்கள் கோரிக்கை வைத்துள்ளனர்.

தமிழ் சினிமாவில் குறுகிய காலத்தில் முனனணி நடிகராக உயாந்தவர் சிவகார்த்திகேயன். திரைப்படங்களில் அவ்வப்போது சிறுசிறு வேடங்களில் நடித்த மெரினா படத்தின் மூலம் ஹீரோவாக அறிமுகமான சிவகார்த்திகேயன், தொடர்ந்து பல வெற்றிப்படங்களை கொடுத்து முன்னணி நடிகராக உயர்ந்துள்ளார்.  தற்போது தயாரிப்பு நடிப்ப என பிஸியாக இருக்கும் சிவகார்த்திகேயன் நடிப்பில் அடுத்து அமரன் படம் தயராகியுள்ளது.

இந்திய ராணுவ அதிகாரி முகுந்த் வரதராஜனின் வாழ்க்கை வரலாற்றை அடிப்படையாக கொண்டு திரைக்கதை அமைக்கப்பட்டுள்ள இந்த படத்தை ராஜ்குமார் பெரியசாமி இயக்கியுள்ளர். கமல்ஹாசனின் ராஜ்கமல் நிறுவனம் தயாரித்துள்ள இந்த படத்தில் சாய் பல்லவி, புவன் அரோரா உள்ளிட்ட பலர் நடித்துள்ளனர். ஜிவி.பிரகாஷ் இசையமைத்துள்ள இந்த படத்தின் டீசர் சமீபத்தில் வெளியாகி நல்ல வரவேற்பை பெற்றிருந்தது.

இதனிடையே தீபாவளி பண்டியை முன்னிட்டு கடந்த அக்டோபர் 31-ந் தேதி வெளியான அமரன் படம் ரசிகர்கள் மத்தியில் பெரும் வரவேற்பை பெற்று வரும் நிலையில், வசூலில் பல சாதனைகளை படைத்து வருகிறது. முதல் நாள் வசூலில் தனுஷின் ராயன் படத்தை முந்திய அமரன், அடுத்தடுத்து நாட்களில் ரஜினிகாந்தின் வேட்டையன் படத்தின் வசூலை முறியடித்தது. போட்டிக்கு வந்த படங்கள் பெரிதாக கவனம் ஈர்க்காத நிலையில், அமரன் படம் பெரிய வெற்றிப்படமாக வசூலில் முன்னேறி வருகிறது.

தமிழ் சினிமாவை பொருத்தவரை ஒரு படம் வெளியாகி 4 வாரங்களில் ஒடிடி தளத்தில் வெளியாகிவிடும். தற்போது அமரன் படம் வெளியாகி 2 வாரங்கள் கடந்துவிட்ட நிலையில், இன்னும் 2 வாரங்களில் அமரன் ஒடிடி தளத்தில் வெளியாக உள்ளது. அதே சமயம் திரையரங்குகளில் இந்த படம் பெரிய வசூல் வேட்டை நடத்தி வருவதால், அமரன் படத்தை 8 வாரங்களுக்கு பிறகே ஒடிடி தளத்தில் வெளியிட வேண்டும் என்று திரையரங்கு உரிமையாளர்கள் கோரிக்கை வைத்துள்ளனர்.

இது குறித்து தியேட்டர் உரிமையாளர் சங்கம் வெளியிட்டுள்ள அறிக்கையில், அமரன் படம் திரையரங்குகளில் வெற்றிகரமாக ஓடிக்கொண்டிருப்பதால், அதன் ஒடிடி வெளியீட்டை தள்ளி வைக்க வேண்டும். படம் வெளியாகி 8 வாரங்களுக்கு பிறகு ஒடிடி தளத்தில் வெளியிட வேண்டும் என்றும் பட தயாரிப்பு நிறுவனத்திற்கும், நடிகர் சிவகார்த்திகேயனுக்கும் கோரிக்கை விடுத்துள்ளனர்.