நடிப்புக்கு முக்கியத்துவம்... நடுவராக விஜய் ஆண்டனி: சின்னத்திரையின் ஆக்டிங் ஷோ ரெடி!

தமிழ் சின்னத்திரையில் முன்னணி தொலைக்காட்சி சேனல்களில் ஒன்றாக இருக்கும் ஜீ தமிழ் சேனலில் ஒளிபரப்பாகி வரும் சீரியல்கள், ரியாலிட்டி ஷோக்கள் ஆகியவை ரசிகர்கள் மத்தியில் தொடர்ந்து நல்ல வரவேற்பை பெற்று வருகின்றன.  அதே நேரத்தில் தொலைக்காட்சி சேனலும் தொடர்ந்து புதுப்புது சீரியல்கள், ரியாலிட்டி ஷோக்களை ஒளிபரப்ப தொடங்கி வருகிறது.

சமீபத்தில் வள்ளியின் வேலன் சீரியலும், சமையல் எக்ஸ்பிரஸ் என்ற ரியாலிட்டி ஷோவும் ஒளிப்பரப்பாக தொடங்கி நல்ல வரவேற்பை பெற்று வரும் நிலையில் அடுத்து மகாநடிகை என்ற ரியாலிட்டி ஷோவும் ஒளிபரப்பாக உள்ளது. நடிப்பில் சாதிக்க துடிக்கும் சாமானிய பெண்கள் தங்களது நடிப்பு திறமையை வெளிப்படுத்தும் போட்டியாக இந்த மகாநடிகை நிகழ்ச்சி ஒளிபரப்பாக உள்ளது. இந்த நிகழ்ச்சிக்கான போட்டியாளர்களை தேர்வு செய்வதற்காக தமிழகம் முழுவதும் பல்வேறு இடங்களில் ஆடிஷன் நடைபெற்றது.

இந்நிலையில் இந்த நிகழ்ச்சி வரும் அக்டோபர் 5-ம் சனிக்கிழமை அன்று தொடங்க உள்ளது. அதன் பிறகு வாரந்தோறும் ஞாயிற்று கிழமைகளில் இரவு 8:30 மணி முதல் 10 மணி வரை ஒளிபரப்பாக உள்ளது. அதுமட்டுமின்றி ஆர்.ஜேவிஜய் இந்த நிகழ்ச்சியை தொகுத்து வழங்க உள்ளார். நடிகர், பாடகர், இயக்குனர், இசையமைப்பாளர், தயாரிப்பாளர் என பன்முக திறமைகளுடன் வலம் வரும் விஜய் ஆண்டனி முதல் முறையாக இந்த நிகழ்ச்சி மூலமாக சின்னத்திரையில் நடுவராக என்ட்ரி கொடுக்க உள்ளார்.

மேலும் தேசிய விருது உட்பட பல விருதுகளை வென்று தென்னிந்திய சினிமாவின் எதார்த்த நடிகையாக வலம் வந்த சரிதா மற்றும் குழந்தை நட்சத்திரமாக அறிமுகமாகி பல்வேறு படங்களில் நடித்து மக்களின் கவனம் ஈர்த்த விருமாண்டி அபிராமி ஆகியோரும் நடுவர்களாக பங்கேற்று போட்டியாளர்களின் நடிப்பு திறமையை மதிப்பிட உள்ளனர். தமிழ் சின்னத்திரையை சேர்ந்த 10 நடிகர்கள் பயிற்சியாளர்களாக பங்கேற்று போட்டியாளர்களுக்கு நடிப்பு பயிற்சி கொடுக்க உள்ள நிலையில் மாறுபட்ட பல ரவுண்டுகளை கடந்து மகா நடிகைக்கான டைட்டிலை வெல்ல போகும் போட்டியாளர் யார் என்பது குறித்த எதிர்பார்ப்பு அதிகரித்துள்ளது.