படிப்பிற்காக அமெரிக்க பயணம்: இளைஞர்களுக்கு டஃப் கொடுக்கும் கமல்ஹாசன்; என்ன படிப்பு தெரியுமா?

தமிழ் சினிமாவில் முன்னணி நடிகராக உச்சம் தொட்டுள்ள கமல்ஹாசன், அமெரிக்காவில் ஏ.ஐ.டெக்னாலஜி படிப்பில் சேர உள்ளதாக தகவல் வெளியாகியுள்ளது. இதன் மூலம் கமல்ஹாசன் 70-வயதை நெருங்கியுள்ள நிலையில், இன்றைய தலைமுறையுடன் தன்னை நிலை நிறுத்திக்கொண்டுள்ளார்.

தமிழ் சினிமாவில் புதிய தொழில்நுட்பங்களை அறிமுகம் செய்தவர் கமல்ஹாசன். இயக்குனர், தயாரிப்பாளர், நடிகர் என பன்முக திறமையுடன் வலம் வரும் கமல்ஹாசன், தற்போது தக்லைப் என்ற படத்தில் நடித்து வருகிறார். நாயகன் படத்திற்கு பிறகு கமல்ஹாசன் – மணிரத்னம் கூட்டணியில் தயாராகி வரும் இந்த படத்தின் இறுதிக்கட்ட படப்பிடிப்பு விறுவிறுப்பாக நடைபெற்று வருகிறது. இந்த படத்தில் கமல்ஹாசனுடன் சிம்பு முக்கிய கேரக்டரில் நடித்து வருகிறார்.

தக் லைப் படத்திற்கு பின், சண்டை இயக்குனர்கள் அன்பறிவு இயக்கத்தில் கமல்ஹாசன் ஒரு படத்தில் நடிக்க உள்ளதாக பிக்பாஸ் சமயத்தில் அதிகாரப்பூர்வமாக அறிவிக்கப்பட்ட நிலையில், தற்போது தக்லைப் படத்தை முடிக்க உள்ள கமல்ஹாசன், செயற்கை நுண்ணறிவு (ஏ.ஐ) டெக்னாலஜி படிப்பதற்காக அமெரிக்க செல்ல உள்ளதாக தகவல் வெளியாகியுள்ளது. இன்றைய இளைஞர்களுக்கு டஃப் கொடுக்கும் வகையில் கமல்ஹாசன், அவர்களுக்கு நிகராக தன்னை நிலை நிறுத்திக்கொள்ள முயற்சி செய்து வருகிறார்.

இது குறித்து, டெக்கான் ஹெரால்ட் வெளியிட்டுள்ள செய்திக்குறிப்பில், அடுத்தடுத்து படங்களில் பிஸியாக இருக்கும் கமல்ஹாசன், ஒரு சிறிய இடைவெளி எடுத்துக்கொண்டு இந்த படிப்பை கற்றுக்கொள்ள உள்ளார். இதன் மூலம் திரைப்படத்துறையில் தனது தொழில்நுட்ப அறிவை மேம்படுத்திக்கொள்ள முயற்சிக்கும் கமல்ஹாசன், இந்திய சினிமாவில் ஒரு குறிப்பிடத்தக்க தாக்கத்தை ஏற்படுத்தும் முக்கிய நபர்களில் ஒருவராக இருக்கிறார்.

அரசியல் பணிகள், அடுத்தடுத்து திரைப்படங்கள் என பிஸியாக இருக்கும் கமல்ஹாசன், இந்த ஏ.ஐ.டெக்னாலஜி படிப்பதற்காக, அமெரிக்க செல்ல உள்ள நிலையில், 90 நாட்கள் கொண்ட இந்த படிப்பை 45 நாட்களில் முடித்துக்கொண்டு சென்னை திருப்ப உள்ளதாக தகவல் வெளியாகியுள்ளது. வருங்காலத்தில் சினிமாத்துறை ஏ.ஐ. டெக்னாலஜி உதவியுடன் தான் இருக்கும் என்பதை தெரிந்துகொண்ட கமல்ஹாசன், அதற்காக தன்னை தயார்படுத்திக்கொண்டுள்ளார்.

கடந்த ஆண்டு அபுதாபியில் அளித்த பேட்டியில், கமல்ஹாசன், "எனக்கு புதிய தொழில்நுட்பத்தில் ஆழ்ந்த ஆர்வம் உள்ளது, மேலும் எனது திரைப்படங்கள் சமீபத்திய தொழில்நுட்ப முன்னேற்றங்களுடன் பரிசோதனை செய்வதை நீங்கள் அடிக்கடி பார்க்கலாம். மேலும் சினிமாதான் என் வாழ்க்கை. என் சம்பாத்தியம் அனைத்தும் பல வழிகளில் என் திரைப்படங்களுக்குச் சென்றுவிட்டது. நான் ஒரு நடிகன் மட்டுமல்ல, ஒரு தயாரிப்பாளரும் கூட, நான் திரைப்படங்களில் இருந்து சம்பாதித்த அனைத்தையும் திரைப்படத்துறையில் மீண்டும் முதலீடு செய்கிறேன் என கூறியிருந்தார்.