என் குலதெய்வத்தை விட மேலானவர்கள்; நீங்கள் இல்லாமல் நான் இல்லை: பிறந்த நாளில் வடிவேலு நியூ வீடியோ!

இன்றைய தமிழ் சினிமாவில் நகைச்சுவை என்றதும் முதலில் நினைவுக்கு வரும் பெயர் வடிவேலுதான். பல தசாப்தங்களாக தனது தனித்துவமான நடிப்பு, வசனம் மற்றும் தான் நடித்த கேரக்டர் மூலம் ரசிகர்களைக் கவர்ந்துள்ளார். நூற்றுக்கணக்கான திரைப்படங்களில் பல்வேறு வேடங்களில் நடித்துள்ள வடிவேலு இன்று (செப்டம்பர் 12) தனது 65வது பிறந்தநாளைக் கொண்டாடுகிறார். பல ரசிகர்களும், திரையுலக பிரபலங்களும் சமூக வலைதளங்களில் அவருக்குப் பிறந்தநாள் வாழ்த்து மழையைப் பொழிந்து வருகின்றனர்.

இதனிடையே, தனது பிறந்தநாளை முன்னிட்டு, ரசிகர்களின் அளவற்ற அன்புக்கு நன்றி தெரிவிக்கும் வகையில் வடிவேலு வீடியோ ஒன்றை வெளியிட்டுள்ளார். அதில் அவர், "உலகம் முழுவதும் உள்ள எனது அன்பான ரசிகர்களுக்கு எனது நெஞ்சார்ந்த வணக்கம். இன்று என்னுடைய பிறந்தநாள். இந்த நாளில் உலகம் முழுவதும் உள்ள பலரும் மனப்பூர்வமாக எனக்கு வாழ்த்து தெரிவித்துள்ளனர்" என்று உணர்ச்சிபூர்வமாகத் தெரிவித்துள்ளார்.

மேலும், ரசிகர்களிடமிருந்து கிடைக்கும் அன்பும் வாழ்த்துகளும்தான் தனது உண்மையான பெருமை என்று கூறியுள்ள வடிவேலு, இந்த வாழ்த்து, என் குலதெய்வத்தை விட மேலானது. மக்கள்தான் என் தெய்வம். நீங்கள்தான் எனக்கு எல்லாம். நீங்கள் இல்லாமல் நான் இந்த நிலைக்கு வந்திருக்க மாட்டேன். எனது வளர்ச்சிக்கு ரசிகர்களின் அன்பும் ஆசிர்வாதமும்தான் காரணம். இந்த ஒரு நாள் மட்டுமல்ல, என்றும் உங்களது ஆசீர்வாதம் எனக்குத் தேவை" என்று மனமுருகிப் பேசியுள்ளார்.

ரசிகர்களுக்கு நன்றி தெரிவித்து, பிறந்தநாளை முன்னிட்டு வெளியிடப்பட்ட இந்த வீடியோ, தற்போது சமூக வலைதளங்களில் வைரலாகி வருகிறது. ரசிகர்களிடம் வடிவேலு காட்டும் எளிமையும் மரியாதையும் அவரை மேலும் சிறந்த மனிதராக்குகிறது. மாமன்னன் படத்தின் மூலம் மீண்டும் தமிழ் சினிமாவில் முக்கிய கேரக்டர் நடிகராக என்ட்ரி கொடுத்த வடிவேலு, சமீபத்தில் இயக்குனர் சுதீஷ் சங்கர் இயக்கிய 'மாரிசன்' படத்தில் வடிவேலு ஒரு சவாலான கதாபாத்திரத்தில் நடித்துள்ளார்.

'மாமன்னன்' படத்திற்குப் பிறகு, 'மாரிசன்' படத்தில் ஃபஹத் ஃபாசிலுடன் வடிவேலு இணைந்து, ரசிகர்களுக்கு ஒரு மறக்க முடியாத மற்றொரு சிறந்த படத்தைக் கொடுத்துள்ளார். இந்த படம் விமர்சனரீதியாக பாராட்டுக்களை பெற்றிருந்தது குறிப்பிடத்தக்கது.