பெற்ற மகளுக்கே தாத்தாவான நடிகர்; இந்த படம் எம்.ஜி.ஆரை நினைவுபடுத்தும்: ஹீரோ யார் தெரியுமா?

90-களில் குழந்தை நட்சத்திரமாக நடித்த பல சிறுவர் சிறுமிகள் தற்போது சினிமாவில் நடிகைகளாக வலம் வருகின்றனர். அந்த வகையில் ஒரு நடிகை குழந்தை நட்சத்திரமாக நடித்த படத்தில் அவரது அப்பாவே அந்த படத்தில் சிறுமிக்கு தாத்தா கேரக்டரில் நடித்துள்ளார் என்பது பலரும் அறியாத ஒரு தகவல்.

தமிழ் சினிமாவில் 80-90 களில் முக்கிய இயக்குனர்களில் ஒருவராக வலம் வந்தவர் பி.வாசு. பன்னீர் புஷ்பங்கள் என்ற படத்தின் மூலம் இயக்குனராக அறிமுகமான இவர், தொடக்கத்தில், சந்தான பாரதியுடன் இரட்டை இயக்குனர்களாக வலம் வந்தனர். ஒரு கட்டத்தில் இருவரும் பிரிந்து தனித்தனியாக படங்கள் இயக்க தொடங்கினர். அந்த வரிசையில் இவர் 1992-ம் ஆண்டு இயக்கிய படம் ரிக்ஷா மாமா. சத்யராஜ், குஷ்பு, கௌதமி, கவுண்டமணி, நாகேஷ், ராதாரவி உள்ளிட்ட பலர் இந்த படத்தில் நடித்திருந்தனர்.

மேலும் இந்த படத்தில், நடிகை ஸ்ரீதேவி விஜயகுமார் குழந்தை நட்சத்திரமாக நடித்திருந்தார். குஷ்பு சத்யராஜ் தம்பதியின் மகளாகவும், விஜயகுமாரின் பேத்தியாகவும் நடித்திருந்தார், உண்மையில், விஜயகுமார் மகள் தான் ஸ்ரீதேவி. ஆனால் சொந்த மகளுக்கே திரையில் தாத்தா கேரக்டரில் விஜயகுமார் நடித்திருந்தார். இந்த படம் பெரிய வெற்றிப்படமாக அமைந்தது. விஜயகுமாருக்கு, முத்துக்கண்ணு, மஞ்சுளா என இரு மனைவி இருந்தனர். இதில் மஞ்சுளாவுக்கு வனிதா, ப்ரீத்தா, ஸ்ரீதேவி என 3 மகள்கள் உள்ளனர். இதில் வனிதாவை தெரியாதவர்கள் தமிழ் சினிமாவில் இருக்க முடியாது.

அதேபோல் ஸ்பீடு இயக்குனர் என்று அறியப்பட்ட இயக்குனர் ஹரியின் மனைவிதான் ப்ரீத்தா விஜயகுமார். 3வது மகள் ஸ்ரீதேவி ரிக்ஷா மாமா படத்தின் மூலம் சீனமாவில் அறிமுகமாக அடுத்து அம்மா வந்தாச்சு, சுகமான சுமைகள் உள்ளிட்ட படங்களில் குழந்தை நட்சத்திரமாக நடித்திருந்தார். குழந்தை நட்சத்திரமாக நடித்திருந்த ஸ்ரீதேவி, சினிமாவில் அறிமுகமாகி 10 ஆண்டுகளுக்கு பின் 2002-ம் ஆண்டு தெலுங்கில் பாகுபலி பிரபாஸ் நடிப்பில் வெளியான ஈஸ்வர் என்ற படத்தில் ஹீரோயினாக அறிமுகமானார்.

இந்த படத்தில் பிரபாஸ் ஜோடியாக நடித்திருந்த ஸ்ரீதேவி, அடுத்து, காதல் வைரஸ் படத்தில் நடித்திருந்தார், 2003-ம் ஆண்டு வெளியான பிரியமான தோழி திரைப்படத்தில் ஜோதிகா தான் நாயகி என்றாலும், மாதவனின் தோழியாக நடித்த ஸ்ரீதேவி கேரக்டருக்கு பெரிய வரவேற்பு கிடைத்தது. அதன்பிறகு தித்திக்குதே, தேவதையை கண்டேன் ஆகிய படங்களில் நடித்த ஸ்ரீதேவி தெலுங்கில் அதிக படங்களில் நடித்துள்ளார். தமிழில் அவர் தனுஷூடன் நடித்த தேவதையை கண்டேன் படம் தான் கடைசி படம். 2016-ம் ஆண்டு லட்சுமணா என்ற கன்னட படத்தில் நடித்தார்.

சினிமாவில் அறிமுகமாகும்போது சத்யராஜூவுக்கு மகளாக நடித்த ஸ்ரீதேவி, நாயகியாக தனது முதல் படத்தை அறிமுக நாயகன் பிரபாஸூடன் தொடங்கினார். திருமணத்திற்கு பிறகு ஸ்ரீதேவி நடிப்பில் இருந்து விலகியுள்ளார்.