ஸ்டைலிஷ் லுக்கில் அசத்தும் தங்கலான் ஹீரோ: ப்ரமோஷனுக்கு ரெடி ஆகிட்டாரோ!

தமிழ் சினிமாவில் தனது கேரக்டருக்காக தனது உடல் அமைப்பையே மாற்றிக்கொள்ளும் நடிகர்களில் சியான் விக்ரமுக்கு முக்கிய இடம் உண்டு.

1990-ம் ஆண்டு வெளியான என் காதல் கண்மணி என்ற படத்தின் மூலம் அறிமுகமாகி இருந்தாலும், அவருக்கு பெரிய திருப்புமுணை ஏற்படுத்திய படம் 1999-ல் வெளியான சேது படம் தான்.

பாலா இயக்கத்தில் வெளியான இந்த படம் பெரிய வெற்றிப்படமாக அமைந்து விக்ரமுக்கு அடுத்தடுத்து பட வாய்ப்புகள் கிடைக்க காரணமாக இருந்தது. அதன்பிறகு பாலா இயக்கத்தில் வெளியான பிதாமகன் படமும் பெரிய வெற்றியை கொடுத்தது.

தொடர்ந்து தூள், சாமி, அந்நியன், ஐ, இருமுகன் என பெரிய வெற்றிப்படங்களை கொடுத்திருந்த விக்ரம் தற்போது தங்கலான் படத்தில் நடித்து முடித்துள்ளார்.

பா.ரஞ்சித் இயக்கியுள்ள இந்த படத்தில் பசுபதி, மாளவிகா மோகன் உள்ளிட்ட பலர் நடித்துள்ளனர். ஜி.வி.பிரகாஷ் இசையமைத்துள்ள இந்த படம் வரும் ஆகஸ்ட் 15-ந் தேதி வெளியாக உள்ளது.

தங்கலான் படம் கடந்த ஜனவரி மாதமே வெளியாக இருந்த நிலையில், சில தவிர்க்க முடியாத காரணங்களால் வெளியீடு தள்ளிப்போனது. தற்போது சுதந்திரதினத்தில் வெளியாக உள்ளது.

கோலார் தங்க சுரங்கத்தில் நடந்த உண்மை சம்பவத்தை அடிப்படையாக கொண்டு திரைக்கதை அமைக்கப்பட்டுள்ள இந்த படத்தை ஸ்டூடியோ கிரீன் நிறுவனம் தயாரித்துள்ளது.

இந்த படத்தை தொடர்ந்து விக்ரம் தற்போது வீர தீர சூரன் என்ற படத்தில் நடித்து வருகிறார். சித்தா படத்தை இயக்கிய இயக்குனர் இந்த படத்தை இயக்கி வருகிறார்.

சமூகவலைதளங்களில் ஆக்டீவாக இருக்கும் விக்ரம் தற்போது வெளியிட்டுள்ள சில ஸ்டைலிஷ் புகைப்படங்கள் இணையத்தில் வைரலாகி வருகிறது.