திருடு போன தங்க நகைகள்: நடிகை சீதா போலீசில் புகார்!

தமிழ் சினிமாவில் முன்னணி நடிகையாக இருந்து பல வெற்றிப்படங்களை கொடுத்த நடிகை சீதா, தனது வீட்டில் நகைகள் காணாமல்போனதாக போலீஸில் புகார் அளித்துள்ளது தற்போது பெரும் அதிர்ச்சியை ஏற்படுத்தியுள்ளது.

பாண்டியராஜன் இயக்கத்தில் வெளியான ஆண்பாவம் படத்தின் மூலம் தமிழ் சினிமாவில் அறிமுகமானவர் நடிகை சீதா. இந்த படம் பெரிய வெற்றியை பெற்ற நிலையில், அடுத்து, குரு சிஷ்யன், புதிய பாதை உள்ளிட்ட பல வெற்றிப்படங்களை கொடுத்துள்ளார். ரஜினிகாந்த், கமல்ஹாசன், விஜயகாந்த் உள்ளிட்ட முன்னணி நடிகர்களுடன் இணைந்து நடித்துள்ள சீதா நடிகர் பார்த்திபனை காதலித்து திருமணம் செய்துகொண்டார்.

ஒரு கட்டத்தில் பார்த்திபனை விவாகரத்து செய்த சீதா, சீரியல் நடிகர் சதீஷை திருமணம் செய்துகொண்ட நிலையில், தற்போது அவரையும் பிரிந்து விருகம்பாக்கம், புஷ்பா காலணியில் தனிமையில் வசித்து வருகிறார். இதனிடையே நடிகை சீதா தனது வீட்டில் இருந்து இரண்டரை சவரன் தங்க நடிகை காணாமல் போனதாக விருகம்பாக்கம் காவல்நிலையத்தில் புகார் அளித்துள்ளார். போலீசார் இது குறித்து விசாரணை நடத்தி வருகின்றனர்.

வீட்டில் வேலை செய்பவர்கள் யாரேனும் எடுத்திருப்பார்களா என்ற சந்தேகத்தில் சீதா போலீசில் புகார் அளித்துள்ள நிலையில்,இந்த புகார் தற்போது பரபரப்பை ஏற்படுத்தியுள்ளது. கடந்த சில வாரங்களுக்கு முன்பு, நடிகர் பார்த்திபன் தனது அலுவலகத்தில் நகைகள் காணாமல் போனதாக புகார் அளித்திருந்தார். அதன்பிறகு அவரது உதவியாளரிடம் நகைகள் இருந்ததால், அந்த புகாரை வாபஸ் பெற்றிருந்தார். இதனிடையே தற்போது சீதா நகைகள் காணாமல் போனதாக புகார் அளித்துள்ளார்.

சமீபத்தில் வெளியான பிரதர் படத்தில் ஜெயம்ரவியின் அம்மா கேரக்டரில் நடித்திருந்த நடிகை சீதா, தமிழ் மட்டுமல்லாமல், தெலங்கு, கன்னடம், மலையாளம் உள்ளிட்ட மொழிகளில்திரைப்படங்களிலும் சீரியல்களிலும் நடித்துள்ளார். சமீபத்தில் ஒடிடி தளத்தில் வெளியான மை பெர்பெஃக்ட் ஹஸ்பெண்ட் என்ற வெப் தொடரில் நடித்திருந்த சீதா, தற்போது பிஸியான நடிகையாக வலம் வருகிறார்.