வலித்தால் தாங்கிக்கொள்ள நான் ரோபோ இல்ல; நானும் மனுஷி தான்: குக் வித் கோமாளி ஷாலின் சோயா வருத்தம்!

தமிழ் சின்னத்திரையில், குக் வித் கோமாளி நிகழ்ச்சியின் மூலம் பிரபலமான நகை ஷாலின் சோயா, தப்பான கமெண்ட் வரும்போது என்னால் தாங்கிக்கொள்ள முடியாது. நான் ஒன்னும் ரோபோ இல்லை எனக்கும் வலிக்கும் என்று ஆவேசமாக பேசியுள்ளார்.

கேரளாவை சோந்த ஷாலின் சோயா கடந்த 2004-ம் ஆண்டு மலையாளத்தில் வெளியான கொட்டேஷன் என்ற படத்தின் மூலம் சினிமாவில் பிரபலமானார். அதன்பிறகு தொடர்ந்து பல மலையாள படங்களில் நடித்திருந்த ஷாலின் சோயா, 2016-ம் ஆண்டு கலையரசன், காளி வெங்கட் நடிப்பில் வெளியான ராஜா மந்திரி திரைப்படத்தின் மூலம் தமிழ் சினிமாவில் அறிமுகமானார். இந்த படம் பாண்டியராஜன் இயக்கம் மற்றும் நடிப்பில் வெளியான ஆண்பாவம் படம் மாதிரி இருப்பதாக விமர்சனங்கள் எழுந்தது.

அதே சமயம் இந்த படம் ஓரளவு வரவேற்பை பெற்றிருந்தாலும், அடுத்து ஷாலின் சோயாவுக்கு தமிழ் சினிமாவில் சரியான வாய்ப்புகள் இல்லை. இதனால் மீண்டும் மலையாள சினிமா பக்கம் திரும்பிய, 2023-ம் ஆண்டு வெளியான கண்ணகி படத்தின் மூலம் மீண்டும் தமிழ் சினிமாவுக்குள் நுழைந்தார். 2024-ம் ஆண்டு நாகேந்திரன்ஸ் ஹனிமூன் என்ற வெப் தொடரில் நடித்திருந்த ஷாலின் சோயா, திரைப்பட நடிப்பு ஒரு பக்கம் இருந்தாலும் சிறுவயதில் இருந்தே சின்னத்திரையில் தொகுப்பாளினியாக களமிறங்கி அசத்தினார்.

தமிழில் 2 படங்கள் நடித்து ஓரளவு பிரபலமான ஷாலின் சோயாவுக்கு, தமிழில் பெரிய அறிமுகத்தை கொடுத்தது விஜய் டிவியின் குக் வித் கோமாளி நிகழ்ச்சி தான். 2024-ம் ஆண்டு ஒளிபரப்பான இந்த நிகழ்ச்சியில் சோயா இறுதிப்போட்டிக்கு முன்னேறி அசத்தினார். இந்த நிகழ்ச்சியில் இவருக்கு எந்த அளவுக்கு, வரவேற்பு கிடைத்ததோ அதே அளவு விமர்சனங்களும் எழுந்தது. இது குறித்து வருத்தம் தெரிவித்த ஷாலின் சோயா, இந்த விமர்சனங்களால் தான் மிகவும் பாதிக்கப்பட்டதாக கூறியுள்ளார்.

டெலி விகடன் யூடியூப் சேனலுக்க அவர் அளித்த பேட்டியில், குக் வித் கோமாளி நிகழ்ச்சிக்கு பின் நான் வேறு எந்த நிகழ்ச்சியிலும பங்கேற்க வேண்டாம் என்ற நினைத்தேன். ஆனால் ஜீ தமிழில் இருந்து திடீர் அழைப்பு வந்தது. எனக்கும் இந்த நிகழ்ச்சி பண்ணா சரியாக இருக்கும் என்று தோன்றியது. அதன் காரணமாக அந்த நிகழ்ச்சியை ஒப்புக்கொண்டேன். குக் வித் கோமாளி பண்ணும்போது வாங்க போங்க என்று சொல்வது கஷ்டமாக இருந்தது. அப்போதே என்னை பற்றி விமர்சனங்கள் அதிகம் வந்தது. மரியாதை இல்லாமல் பேசுகிறார் என்ற கூட சொன்னார்கள். நான் பேசுவதை பார்த்து நடிக்கிறேன் என்றும் சொன்னார்கள்.

செல்போன்களில் மெசேஜ் அனுப்பும்போது கூட, ஓகே என்று டைப் செய்து ங்க என்று இங்கிலீஷில் போட்டிருப்பார்கள் இதற்கு என்ன அர்த்தம் என்று கூகுளில் சர்ச்சை செய்திருக்கிறேன். அதேபோல் என்னை பற்றி வந்த நெகடீவ் கமெண்ட்ஸ்களை என்னால் தாங்கிக்கொள்ள முடியவில்லை. நானும் மனுஷிதான். வலித்தால் தாங்கிக்கொள்ள நான் ஒன்றும் ரோபோ கிடையாது. நடிக்கிறா, தப்பு தப்பா பேசுறா, என்று சொன்னது முதல் 2 வாரம் என்னால் சரியாக இருக்க முடியவில்லை. பொய்யாக என்னால் இருக்க முடியாது என்று கூறியுள்ளார்.