துர்கா, சிவராத்திரி படங்களில் நடித்த சிறுமி; இப்போ இவர் கைதேர்ந்த ஓவியர்: அஜித்தின் சொந்தம், இவர் யார் தெரியுமா?

சினிமாவில் நடிகர் நடிகைகளை போலவே, குழந்தை நட்சத்திரங்களும், நடிப்பது வழக்கம். இவர்கள் வளர்ந்து பெரியவர்களாக மாறி ஒரு படத்தில் நடிக்கும்போது இவரா இந்த குழந்தை நட்சத்திரம் என்ற கேள்வி வரும். அதேபோல் குழந்தையாக இருக்கும்போது கிடைத்த வரவேற்பு பெரிய நடிகையாக மாறியபோது கிடைக்காமலும் போகலாம். அந்த வரிசையில் இடம் பிடித்த ஒரு நடிகை இருக்கிறார். அவர் தான் ஷாமிலி.

1989-ம் ஆண்டு விஜயகாந்த் நடிப்பில் வெளியான ராஜநடை என்ற படத்தின் மூலம் திரையுலகில் குழந்தை நட்சத்திரமாக அறிமுகமானவர் தான் ஷாமிலி. தொடர்ந்து, 1990-ம் ஆண்டு மணிரத்னம் இயக்கத்தில் வெளியான அஞ்சலி திரைப்படத்திலும் குழந்தை நட்சத்திரமாக நடித்திருந்தார், இந்த படத்திற்காக இவருக்கு, சிறந்த குழந்தை நட்சத்திரத்திற்கான தேசிய மற்றும் மாநில அரசு விருதுகள் கிடைத்தது. மேலும் இவரது அக்கா ஷாலினி, அண்ணன் ரிச்சர்ட் ரிஷி ஆகியோரும் இதில் நடித்தனர்.

தொடர்ந்து குழந்தை நட்சத்திரமாக பல வெற்றிப்படங்களில் நடித்திருந்த ஷாமிலி, துர்கா, செந்தூர தேவி, தேவர் வீட்டு பொண்ணு, சிவராத்திரி, தாயின் மணிக்கொடி, கண்டுகொண்டேன் கண்டுகொண்டேன் உள்ளிட்ட பல வெற்றிப்படங்களில் நடித்துள்ளார். குழந்தை நட்சத்திரமாக இவருக்கு பெரிய வரவேற்பு கிடைத்தபோதிலும், 9 வருட இடைவெளிக்கு பிறகு கடந்த 2009-ம் ஆண்ட ஒய் என்ற தெலுங்கு படத்தில் ஹீரோயினாக களமிறங்கினார் ஷாமிலி. சித்தார்த் நாயகனாக நடித்த இந்த படம் காதல் அலை என்ற பெயரில் தமிழிலும் டப் செய்து வெளியானது. 

இந்த படம் தெலுங்கில் சுமாரான வரவேற்பை பெற்ற நிலையில், வெல்லிம் தட்டி, பெல்லிம் தட்டி என்ற மலையாள படத்தில், குஞ்சாகோ போபனுடன் இணைந்து நடித்தார்.  தமிழில் 2016-ம் ஆண்டு விக்ரம் பிரபு நடிப்பில், வீர சிவாஜி என்ற படத்தில் நடித்திருந்தார். இந்த படம் படுதோல்வியை சந்தித்த நிலையில் அடுத்து தெலுங்கில், அம்மாமகரில்லு என்ற படத்தில் நடித்தார். ஹீரோயினாக நடித்த 4 படங்களும் கைக்கொடுக்காத நிலையில், ஷாமிலி நடிப்பில் இருந்து விலகி இருக்கிறார். அவரது அக்கா ஷாலினி அஜித்தை திருமணம் செய்துகொண்டு சினிமாவில் இருந்து விலகினார்.

அண்ணன் ரிச்சர்ட் ரிஷி, தற்போது திரௌபதி 2 படத்தில் நடித்து முடித்துள்ளார். இந்த படம் விரைவில் வெளியாக உள்ளது. குழந்தை நட்சத்திரமாக நடிக்கும்போது பல வெற்றிகளை கொடுத்து பாராட்டுக்களை பெற்ற ஷாமிலிக்கு ஹீரோயினாக நடித்த படங்கள் கை கொடுக்காதது சினிமாவில் அவர் சந்தித்த சோகமான நிகழ்வு என்று சொல்லலாம். ஓவிய கலையில் சிறந்தவரான ஷாமிலி தனது இன்ஸ்டாகிராம் பக்கத்தில் தான் வரைந்த ஓவியங்கள் குறித்த பதிவுகளை வெளியிட்டு வருகிறார்.