தொட்டு பார்க்க ஆசைப்பட்ட இயக்குனர்: கண்களால் கட்டிப்போட்ட சிவாஜி; இலங்கையில் நடந்த மேஜிக்!

தமிழ் சினிமாவில் எம்.ஜி.ஆர், சிவாஜி உள்ளிட்ட முன்னணி நடிகர்களின் நடிப்பில் படங்களை இயக்கிய வி.சி.குகநாதன், தான் சிவாஜியை பார்த்து இவர் சிவாஜியே இல்லை என்று நினைத்ததாகவும், அவரை தொட்டு பார்த்தபோது என்ன நடந்தது என்பதை பற்றியும் கூறியுள்ளார்.

இலங்கையில் பிறந்து தமிழ் சினிமாவில் இயக்குனராக அறிமுகமானவர் வி.சி.குகநாதன். எம்.ஜி.ஆர் நடித்த புதிய பூமி படத்தின் மூலம் தமிழ் சினிமாவில், எழுத்தாளராக அறிமுகமான இவர், அதன்பிறகு தொடர்ந்து, எம்.ஜி.ஆர், சிவாஜி உள்ளிட்ட முன்னணி நடிகர்களின் படத்திற்கு கதை மற்றும் திரைக்கதை எழுதியுள்ளார். இவரது எழுத்தில் வந்த குமரிக்கோட்டம் படம் பெரிய வரவேற்பை பெற்றிருந்தது.

1975-ம் ஆண்டு மஞ்சள் முகமே வருக என்ற படத்தின் மூலம் இயக்குனராக அறிமுகமான இவர், அடுத்து, தமிழ் மற்றும் தெலுங்கில் பல வெற்றிப்படங்களை இயக்கியுள்ளார். அடிப்படையில் எம்.ஜி.ஆரின் தீவிர ரசிகரான இவர், சிவாஜி குறித்து ஒரு மேடையில் புகழ்ந்து பேசியுள்ளார். அதில் தான் கட்டபொம்மன் படம் பார்த்தபோது நடந்த சுவாரஸ்யமாக சம்பவம் குறித்து வி.சி.குகநாதன் பகிர்ந்துகொண்டுள்ளார். இந்த பதிவு தற்போது வைரலாகி வருகிறது.

நடிகர் திகலம் சிவாஜியை தொட்டு பார்க்க வேண்டும் என்று எனக்கு ஆசை. எனது 12 வயதில் அந்த ஆசையை தீர்த்துக்கொண்டேன். அப்போது வீரபாண்டிய கட்டபொம்மன் படம் வெளியான நேரம். அந்த படத்தை விடாமல் நான் பார்த்துக்கொண்டு இருக்கிறேன். ஒருநாள் 30-வது முறையாக அந்த படத்தை பார்க்க நான் தியேட்டருக்கு போனபோது, அந்த தியேட்டரில், படம் ஓடிக்கொண்டிருக்கும்போது திடீரென லைட் ஆப் பண்ணிவிட்டார்கள்.

அதன்பிறகு லைட் ஆன் செய்தவுடன், யாரோ 3 பேர் வந்து மேடையில் ஏறினார்கள். அவர்களில் ஒருவரை நான் எங்கோ பார்த்திருக்கிறேன் என்று எனக்கு தோன்றியது. அவர் தான் சிவாஜி கணேசன். கட்டபொம்மன் படத்தில் அவரை பார்க்கும்போது அவர் 8 அடி உயரம் இருப்பார் என்று நினைத்தேன். ஆனால் நேரில் அவர் அவ்வளவு உயரம் இல்லை. அவர் சிவாஜி தான் என்றாலும், என் மனது அவர் சிவாஜி இல்லை என்று தான் சொன்னது.

அவர் நிகழ்ச்சியை முடித்துவிட்டு வெளியில் செல்லும்போது, நான் ஓடிப்போய் பார்த்தேன் அவரின் பின் பக்கம் தான் தெரிந்தது. மீண்டும் முன்னே சென்று அவரை தொட்டபோது அவர் என்னை பார்த்தார். அவரது கண்ணை நான் பார்த்தேன். அப்போது தான் முடிவு செய்தேன். இவர் சிவாஜி தான். கட்டபொம்மனில் இருந்த அதே கண்கள் அவரிடம் இருந்தது. சிவாஜி சார் சிவாஜி சார் தான் என்று வி.சி.குகநாதன் கூறியுள்ளார்.