சிவாஜி நீங்க நடிக்காதீங்க... தடை போட்ட பரதன்... ஏன் தெரியுமா? தேவர் மகன் ப்ளாஷ்பேக்

தமிழ் சினிமாவில் புதிதாக வரும் இயக்குனர்களுக்கு இன்ஸ்பிரேஷனாக தேவர்மகன் படம் இருக்கும் என்று பலரும் கூறி வருகின்றனர். ஆனால் இந்த படத்தில் நடிக்கும்போது நடிகர் திலகம் சிவாஜி கணேசனை இயக்குனர் பரதன் நடிக்க வேண்டாம் என்று கூறியதாக இயக்குனர் ராசி அழகப்பன் கூறியுள்ளார்.

தமிழ் சினிமாவின் உலக நாயகன் கமல்ஹாசன். நடிப்பு, தயாரிப்பு, இயக்கம், நடனம் என பல திறமைகளை உள்ளடக்கியுள்ள இவர், தமிழ் சினிமாவிற்கு புதிய தொழில்நுட்பங்களை அறிமுகம் செய்துள்ளார். மேலும் தமிழ் சினிமாவின் அடையாளமாக பல படங்களை கொடுத்துள்ள கமல்ஹாசன், நடிப்பில் கடந்த 1992-ம் ஆண்டு வெளியான படம் தேவர் மகன்.

கமல்ஹாசன் கதை திரைக்கதை எழுதி, பிரபல மலையாள இயக்குனர் பரதன் இயக்கிய இந்த படத்தில் நடிகர் திலகம் சிவாஜி கணேசன், கௌதமி, ரேவதி, நாசர், தலைவாசல் விஜய், வடிவேலு, சங்கிலி முருகன், உள்ளிட்ட பலர் நடித்திருந்தனர் இளையராஜா இசையமைத்திருந்த இந்த படம் தேவர் தேவர் சமூகத்திற்குள் நடக்கும் பங்காளி சண்டையை மையமாக வைத்து திரைக்கதை அமைக்கப்பட்டிருந்தது.

மேலும் இந்த படத்தின் திரைக்கதை சினிமாவில் புதிதாக இயக்குனராக வருபவர்களுக்கு ஒரு இன்ஸ்பிரேஷனாக இன்றுவரை இருந்து வருகிறது. அதேபோல் தற்போது வெளியாகியுள்ள மாமன்னன் படத்தின் இயக்குனர் மாரி செல்வராஜ் தான் இயக்கிய 3 படங்களையும் தேவர் மகன் படம் பார்த்துதான் இயக்கியதாகவும் இந்த படத்தின் எசக்கி தான் (வடிவேலு) மாமன்னன் என்று சர்ச்சை ஏற்படுத்தியிருந்தார்.

இதன் காரணமாக வெளியாகி 31 ஆண்டுகளுக்கு பிறகு தேவர் மகன் படம் தற்போது அதிகம் பேசப்பட்டு வரும் நிலையில், இந்த படத்தின் ஒரு காட்சியில் சிவாஜியின் நடிப்பை பார்த்து சிவாஜி நடிக்காதீங்க என்று இயக்குனர் பரதன் கூறியதாக இயக்குனர் ராசி அழகப்பன் கூறியுள்ளார். இந்த படத்தில் வெளியூரில் படித்துவிட்டு ஊருக்கு திரும்பும் கமல்ஹாசன் ஊரில் நடக்கும் வன்முறை சம்பவங்களை பார்த்து விரக்தியில் தான் வெளியூருக்கே சென்றுவிடுவதாக சொல்வார்.

கமல்ஹாசனின் இந்த பேச்சை கேட்ட சிவாஜி கணேசன், அதிர்ச்சியில் இந்த ஊரு எனக்கு அப்புறம் உங்களை நம்பித்தான் இருக்கிறது. நீங்களே இப்படி வெளியுருக்கு போரேனு சொன்னா எப்படி என்று கேட்பார். அதன்பிறகு அவரை சமாதானப்படுத்தும் சிவாஜி கணேசன் அவரிடம் பேசி சில மாதங்கள் ஊரில் இருக்க வேண்டும் என்று சொல்வார். இதை கேட்டு கமல்ஹாசனும் சம்மதம் தெரிவித்து உள்ளே செல்வார்.

அப்போது மழை பெய்திருக்கும்போது தண்ணீரில் கால் வைத்த கமல்ஹாசன் வழுக்கி விழ போக சிவாஜி கணேசன் பதட்டத்துடன் எழுந்து பார்த்து பார்த்து என்று சொல்வார். இந்த காட்சியை படமாக்கும்போது சிவாஜி நீங்க நடிக்காதீங்க என்று இயக்குனர் பரதன் சொன்னார். அதை கேட்டு அதிர்ச்சியான சிவாஜி கமல்ஹாசனிடம் என்னடா நீ நடிக்கனும்னு கூட்டிட்டு வந்துருக்க இவன் நடிக்க வேண்டானு சொல்றான் என்று கேட்டுள்ளார்.

அப்போது இது உங்க வீடு மழை பெய்தால் எப்படி இருக்கும் என்று உங்களுக்கே தெரியும் அப்படி இருக்கும்போது அவர் வழுக்கி விழுந்தால் இவ்வளவு பதட்டம் தேவையில்லாதது என்று இயக்குனர் பரதன் விளக்கியுள்ளார். அதன்பிறகு அந்த காட்சியில் சிவாஜி குறைவான பதட்டத்துடன் நடித்ததான ராசி அழகப்பன் தெரிவித்துள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“