நெருங்கும் ரஜினிகாந்த் பிறந்த நாள்: ரீ-என்ட்ரி கொடுக்கும் 'தளபதி'; வைரல் அப்டேட்!

நடிகர் ரஜினிகாந்த் நடிப்பில் வெளியாகும் படங்கள் பாக்ஸ் ஆபீஸில் வசூல் வேட்டை நடத்தி வரும் நிலையில், அவரது பழைய படங்கள் தற்போது ரீ-ரிலீஸ் செய்யப்பட்டு வருகிறது. அந்த வகையில், விரைவில், ரஜினிகாந்த் மம்முட்டி நடிப்பில் கடந்த 1991-ம் ஆண்டு வெளியான தளபதி படம் ரீ-ரிலீஸ் ஆக உள்ளது.

தமிழ் சினிமாவின் முன்னணி நடிகராக வலம் வரும் ரஜினிகாந்த் தற்போது பல படங்களை கைவசம் வைத்துள்ளார். கடந்த ஆண்டு வெளியாக ஜெயிலர் திரைப்படத்தின் மூலம் பெரிய வசூல் நாயகன் என்று நிரூபித்த ரஜனிகாந்த், அடுத்து லால் சலாம், வேட்டையன் ஆகிய இரு படங்களில் நடித்திருந்தார். இந்த இரு படங்களுமே கலவையான விமர்சனங்களை பெற்றிருந்த நிலையில், தற்போது லோகேஷ் கனகராஜ் இயக்கத்தில் கூலி என்ற படத்தில் நடித்து வருகிறார்.

கூலி படத்தின் படப்பிடிப்பு விறுவிறுப்பாக நடைபெற்று வரும் நிலையில், அடுத்த ஆண்டு சம்மர் டைமில் இந்த படம் வெளியாகும் என்று எதிர்பார்க்கப்படுகிறது. இதனிடையே, வரும் டிசம்பர் 12-ந் தேதி ரஜனிகாந்த் பிறந்த நாளை முன்னிட்டு, அவர் நடிப்பில் வெளியாள தளபதி படம் ரீ-ரிலீஸ் செய்யப்பட உள்ளதாக தகவல் வெளியாகியுள்ளது. மணிரத்னம் இயக்கத்தில் கடந்த 1991-ம் ஆண்டு வெளியான தளபதி படத்தில் ரஜினிகாந்த், மம்முட்டி, அரவிந்த் சாமி,ஷோபனா, பானுப்பிரியா, சாருஹாசன், உள்ளிட்ட பலர் நடித்திருந்தனர்.

இளையராஜா இசையமைத்த இந்த படத்தில் அனைத்து பாடல்களும் ரசிகர்கள் மத்தியில் நல்ல வரவேற்பை பெற்றிருந்த நிலையில், 33 வருடங்களுக்கு பிறகு ரஜினி பிறந்த நாளில் தளபதி படம் ரீ-ரிலீஸ் ஆக உள்ளது. எஸ்எஸ்ஐ புரொடக்சன்ஸ் நிறுவனம் இந்த படத்தை தமிழ்நாடு மற்றும் கர்நாடகாவில் ரீ-ரிலீஸ் செய்கிறது. அதே நாளில், 'ஜெயிலர் 2' படத்தின் 'கூலி' படத்தில் சிறப்பு வீடியோவும் வெளியாகும் என்று எதிர்பார்க்கப்படுகிறது.