தக் லைப் படத்தில் சுந்தர்.சி மகள்; மணிரத்னம் கொடுத்த சர்ப்ரைஸ்: குஷ்பு வெளியிட்ட வைரல் பதிவு

தமிழ் திரையுலகின் நட்சத்திர தம்பதியான சுந்தர்.சி – குஷ்பு தம்பதியின் மகள், அனந்திதா சுந்தர், தமிழ் திரையுலகின் ஜாம்பவான் மணிரத்னம் இயக்கத்தில், கமல்ஹாசன் நடித்த 'தக் லைப்' திரைப்படத்தில் உதவி இயக்குநராகப் பணியாற்றியுள்ளார் என்ற செய்தி தற்போது இணையத்தில் பெரும் வரவேற்பைப் பெற்றுள்ளது. நேற்று (ஜூன் 5) திரையரங்குகளில் வெளியான இப்படத்தில், தனது மகளின் பெயரை மணிரத்னம் குறிப்பிட்டதற்கு குஷ்பு தனது இன்ஸ்டாகிராம் பக்கத்தில் நெகிழ்ச்சியுடன் நன்றி தெரிவித்துள்ளார்.

குஷ்புவின் பெருமிதப் பதிவு:

'தக் லைப்' திரைப்படத்தின் இறுதியில், தனது மகள் அனந்திதா உதவி இயக்குநராகப் பெயர் சேர்க்கப்பட்டுள்ள ஒரு புகைப்படத்தை குஷ்பு தனது இன்ஸ்டாகிராம் பக்கத்தில் பதிவிட்டுள்ளார். "ஒரு பெற்றோராக, எனது மகளின் பெயர் மணிரத்னம் திரைப்படத்தில் அவரது உதவியாளராக இடம்பெற்றிருப்பதைப் பார்ப்பது மிகுந்த பெருமிதத்தை அளிக்கிறது. அவளுக்கு கணுக்கால் எலும்பு முறிவு ஏற்பட்டதால், குறுகிய காலமே பணியாற்ற முடிந்தது," என்று அவர் எழுதியுள்ளார்.

ஆனால், மணிரத்னம் சாரிடம் இருந்து அவள் பெற்ற அறிவு மற்றும் கற்றுக்கொண்ட விஷயங்கள் நிச்சயமாக அவளது வாழ்நாள் முழுவதும் நீடிக்கும். இந்த அனுபவம் உண்மையிலேயே செழுமையானது. அவரது பெரிய மனதிற்கும், வரவுகளில் அவளது பெயரைச் சேர்த்ததற்கும் சார் உங்களுக்கு நன்றி" என்று குஷ்பு தனது மகிழ்ச்சியை வெளிப்படுத்தியுள்ளார். ரவி மோகனின் முன்னாள் மனைவி ஆர்த்தி ரவி, இந்தப் பதிவின் கீழ் "பெருமைமிகு சகோதரி என்று கருத்து தெரிவித்திருந்தார்.

அனந்திதாவுக்கு மணிரத்னத்துடன் பணிபுரியும் வாய்ப்பு கிடைத்ததை அறிந்து ரசிகர்களும் மகிழ்ச்சியடைந்தனர். "அனி பாப்பா உங்களைப் பற்றி பெருமைப்படுகிறோம்," மற்றும் "அடடா... ஒரு சிறந்த ஆரம்பம் தான். எனது நல்வாழ்த்துக்கள்" போன்ற கருத்துகளை ரசிகர்கள் பதிவிட்டனர். ஒரு ரசிகர், அவரது படப்பிடிப்பு பாணி அவரது தந்தையைப் போல் நகைச்சுவையாக இருக்குமா அல்லது மணிரத்னம் பாணியில் இருக்குமா என்று ஆச்சரியத்துடன் "அடடா... அவள் சுந்தர் சி காமெடி போல் அல்லது மணி சார் ஸ்டைல் படங்களை இயக்குவாரா" என்று கேட்டு வருகின்றனர். இந்த எதிர்பார்ப்பு, அனந்த்திகா எதிர்காலத்தில் ஒரு இயக்குநராக திரையுலகில் கால் பதிப்பார் என்பதற்கான அறிகுறியாகவே பார்க்கப்படுகிறது.

View this post on Instagram

A post shared by Kushboo Sundar (@khushsundar)

குஷ்புவும் சுந்தர்.சி இருவரும் சில வருடங்கள் காதலித்து, 2000 ஆம் ஆண்டு திருமணம் செய்து கொண்டனர். இவர்களுக்கு அவந்திகா மற்றும் அனந்திதா என இரண்டு மகள்கள் உள்ளனர். அவந்திகா தனது தாயின் வழியைப் பின்பற்றி ஒரு நடிகையாகும் திட்டத்தில் உள்ளார். அனந்திதா தனது தந்தையின் பாதையைப் பின்பற்றி இயக்குநர் அவதாரம் எடுக்க திட்டமிட்டிருப்பது போல் தெரிகிறது. மணிரத்னத்தின் கீழ் அனந்திதா பெற்ற இந்த அனுபவம், அவரது எதிர்கால திரைப்பட வாழ்க்கைக்கு ஒரு வலுவான அடித்தளமாக அமையும் என்பதில் சந்தேகமில்லை.