18 வருடத்திற்கு முந்தைய படம்... லியோ கதை இதுதானா? கோலிவுட் டாக்

தளபதி விஜய் நடிப்பில் லோகேஷ் கனகராஜ் இயக்கியுள்ள லியோ படத்தின் டிரெய்லர் நேற்று வெளியான நிலையில், இந்த படத்தின் கதை இதுதான் என்று சமூகவலைதளங்களில் பல தகவல்கள் பரவி வருகின்றன.

தமிழ் சினிமாவின் முன்னணி நடிகரான விஜய் வாரிசு படத்திற்கு பிறகு லோகேஷ் கனகராஜ் இயக்கத்தில் லியோ என்ற படத்தில் நடித்துள்ளார். செவன் ஸ்கிரீன் ஸ்டூடியோ நிறுவனம் தயாரித்துள்ள இந்த படத்தில் த்ரிஷா, சஞ்சய் தத், அர்ஜூன், கௌதம் மேனன், மிஷ்கின் உள்ளிட்ட இந்திய சினிமாவின் முன்னணி நட்சத்திரங்கள் பலர் நடித்துள்ளனர். அனிருத் இந்த படத்திற்கு இசையமைத்துள்ளார்.

பெரும் எதிர்பார்ப்புக்கு மத்தியில் லியோ படம் வரும் அக்டோபர் 19-ந் தேதி வெளியாக உள்ள நிலையில், படத்தில் டிரெய்லர் நேற்று வெளியிடப்பட்டது. இந்த அதிரடி ஆக்ஷன் காட்சிகளுடன் வெளியான இந்த டிரெய்லர் ரசிகர்கள் மத்தியில் நல்ல வரவேற்பை பெற்று வரும் நிலையில், படத்தின் கதை இதுதான் என்று பல தகவல்களும் இணையத்தில் வெளியாகி பரபரப்பை ஏற்படுத்தி வருகிறது.

அதன்படி தனது மனைவி (த்ரிஷா) மற்றும் மகளுடன் வாழ்ந்து வரும் பார்த்திபன் (விஜய்,) ஒரு பேக்கிரி நடத்தி வருகிறார். இவர் வசிக்கும் இடத்தில் பல தவறுகள் நடக்கிறது. இதில் ஒரு பிரச்சனையில் பார்த்தின் சிக்கிக்கொண்டு அதில் இருந்து மீண்டு வருகிறார். இதன் காரணமாக ஒரே இரவில் அவர் பிரபலமாகி விடுவதால்,  ஒரு போதை பொருள் கடத்தல் கும்பல் இவரை தேடி வருகிறது. அந்த கும்பலிடம் இருந்து பார்த்திபன் எப்படி தப்பித்தார் என்பது தான் கதை என்று கூறப்படுகிறது.

ஹாலிவுட்டில் 2005-ம் ஆண்டு வெளியான ஆக்ஷன் த்ரில்லர் படமாக ஹிஸ்டரி ஆஃப் வைலன்ஸ் படத்தின் கதையும் இதுதான். இந்த படத்தில் முன்னாள் கேஹ்ஸ்டரான நாயகன் அதில் இருந்து விலகி தனது மனைவி இரு குழந்தைகளுடன் வசித்து வருகிறார். இவர் நடத்தி வரும் ரெஸ்டாரண்டில் ஒருநாள் இருவர் ஒரு பெண்ணிடம் தகாராறு செய்கின்றனர். அப்போது அந்த பெண்னை காப்பற்ற ஆக்ஷனில் இறங்குகிறார் நாயகன்.

அந்த சம்பவத்திற்கு பிறகு டிவி மீடியா என இவர் பிரபலமாகிவிட அவரை ஒரு கும்பல் தேடி வருகின்றனர். அதன்பிறகு நாயகன் என்ன செய்தார். என்பது தான் கதை. லியோ படத்தின் டிரெய்லரை வைத்து பார்க்கும்போது இந்த படத்துடன் ஒத்து போகிறது. இந்த படம் தொடங்கும்போதே ஹிஸ்ட்ரி ஆஃப் வைலன்ஸ் படத்தின் ரீமேக் தான் கூறப்பட்டது. ஆனால் படம் வெளியானால் தான் உண்மை என்ன என்பது தெரியவரும். 

லோகேஷ் கனகராஜூவின் முந்தைய படமான விக்ரம் எல்சியூ வரிசையில் வந்த நிலையில், தற்போது லியோ படமும் அந்த வரிசையில் வருமா அல்லது இது தனி படமா என்ற கேள்வி ரசிகர்கள் மத்தியில் எழுந்துள்ளது. இது குறித்து தயாரிப்பு நிறுவனம் எவ்வித அறிவிப்பும் வெளியிடவில்லை.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“