பொண்ணு லுங்கி கட்ட முடியாது, அதனால் சேலை கொடுத்தேன்; இப்போ அதை கிழிச்சி போட்டேன்; மிஷ்கின் மஞ்சள் சேலை ப்ளாஷ்பேக்!

தமிழ் சினிமாவில் சில படங்களை மட்டுமே இயக்கியிருந்தாலும் பெரிய வெற்றிப்படங்களாக கொடுத்த மிஷ்கின் இயக்கத்தில் வெளியான சில படங்களில் மஞ்சள் சேலையில் ஒரு பெண் ஆடுவது போன்ற ஒரு பாடல் இடம் பெற்றிருக்கும். இந்த செண்டிமென்ட் எப்படி வந்தது என்பது குறித்து மிஷ்கின் கூறியுள்ளார்.

விஜய் நடித்த யூத் உள்ளிட்ட சில படங்களில் உதவி இயக்குனராக பணியாற்றிய மிஷ்கின்,  நரேன் நடிப்பில் வெளியான சித்திரம் பேசுதடி திரைப்படத்தில் மூலம் இயக்குனராக அறிமுகமானார். அனைத் தொடர்ந்து மீண்டும் நரேன் நடிப்பில், அஞ்சாதே என்ற படத்தை இயக்கியிருந்தார். இந்த இரு படங்களுமே பெரிய வெற்றிப்படங்களாக அமைந்தது. தொடர்ந்து தனது 3-வது படமாக நந்தலாலா படத்தின் மூலம் ஹீரோவாக அறிமுகமானவர் மிஷ்கின் இந்த படம் பலரின் பாராட்டுக்களை பெற்றது.

அடுத்து, சேரன் நடிப்பில் யுத்தம் செய், ஜீவா, நரேன் நடிப்பில் முகமூடி, ஓநாயும் ஆட்டுக்குட்டியும், பிசாசு, துப்பறிவாளன், சைகோ உள்ளிட்ட படங்களை இயக்கியிருந்தார், கடைசியாக 2020-ம் ஆண்டு சைகோ படத்தை இயக்கிய மிஷ்கின் பிசாசு 2 மற்றும் டிரெய்ன் ஆகிய இரு படங்களை இயக்கி முடித்துள்ளார். விரைவில் இந்த படங்கள் வெளியாக உள்ள நிலையில், தற்போது மற்ற இயக்குனர்களின் படங்களில் நடிகராகவும் மிஷ்கின் களமிறங்கியுள்ளார்.

அந்த வகையில் சமீபத்தில் வெளியான ட்ராகன் படத்தில் பிரின்சிபல் கேரக்டரில் நடித்து சிறப்பான வரவேற்பை பெற்றிருந்தார். தற்போது விஜய் டிவியின் சூப்பர் சிங்கர் நிகழ்ச்சியில் பங்கேற்று வரும் மிஷ்கினிடம், நீங்கள் சிகப்பு கோட் போட்டிருக்கிறீர்கள். ஆனால் உங்கள் படத்தில் மஞ்சள் சேலை கட்டிக்கொண்டு பெண் ஆடுகிறார் ஏன் என்று கேட்டுள்ளனர். இதற்கு பதில் அளித்த மிஷ்கின், சித்திரம் பேசுதடி படத்தில் வாலமீன் பாடல் இரவில் படப்பிடிப்பு நடத்தினோம்.

டான்சர்ஸ் எல்லோரும் லுங்கி கட்டி இருந்தாங்க, ஆனா பொண்ணுக்கு லுங்கி கட்ட முடியாது. அதனால் சேலை எதாவது கொடுக்கலாம் என்று நினைத்து கலர் சேலை கொடுத்தேன். அதில் பல கலர் இருந்தது. அதனால் ஒரே கலராக கொடுக்கலாம் என்று நினைத்தேன். இரவில் தெரியும் ஒரே கலர் மஞ்சள் கலர் தான். அதனால் அந்த பொண்ணுக்கு மஞ்சள் கலர் சேலை கொடுத்தேன். தெரியாத்தனமாக இந்த பாடல் ஹிட்டாகிவிட்டது. அடுத்து வந்த தயாரிப்பாளர், மஞ்சள் கலர் சேலையால் தான் அந்த படம் ஹிட்டனது என்று நினைத்து 2-வது படத்திலும் அதே மாதிரி கேட்டார்.

என்ன பண்ணுவீங்களோ தெரியாது. கதை கூட நான் கேட்கவில்லை. மஞ்சள் கலர் சேலையில் ஒரு பொண்ணை ஆட வைத்து பாடல் காட்சி எடுங்கள் என்று சொன்னார். அதே சேலையை கொண்டுவந்து 2-வது படம் எடுத்தேன். அந்த படமும் பெரிய ஹிட்டு. அதன்பிறகு 4 வருடம் கழித்து மற்றொரு தயாரிப்பாளர் வந்து கேட்டார். அப்போதும் அந்த சேலையை வைத்து ஒரு பாட்டு கொடுத்தேன். அந்த படமும் ஹிட்டு. இப்போது அந்த சேலையை கிழித்து போட்டுவிட்டேன். இதுதான் மஞ்சள் சேலை ப்ளாஷ்பேக் என்று கூறியுள்ளார்.