69-வது பிறந்த நாள்... 40 வருட அனுபவம்... போர் தொழில், சூர்யவம்சம் 2 குறித்து சரத்குமார் உடன் நேர்காணல்

தமிழ் சினிமாவின் சுப்ரீம் ஸ்டார், சூப்பர் ஹீரோ என பல பட்டங்களை வகித்து வந்த நடிகர் சரத்குமார் தற்போது ஹீரோ என்பதை தாண்டி ஒரு கேரக்டர் நடிகராக தன்னை நிரூபித்து வருகிறார். அந்த வகையில் சமீபத்தில் இவர் இளம் நடிகர் அசோக் செல்வனுடன் இணைந்து நடித்த போர் தொழில் படம் சிறப்பான வரவேற்பை பெற்று பலரின் பாராட்டுக்களை பெற்று வருகிறது.

அதேபோல் அடுத்து இவரின் திரை வாழ்க்கையில் முக்கியமான படமாக கருதப்படும் சூரியவம்சம் படத்தின் 2-ம் பாகத்தை எடுக்க உள்ளதாக சமீபத்தில் அறிவித்திருந்தார். இதனால் அந்த படத்தின் மீதான எதிர்பார்ப்பு அதிகரித்துள்ளது. இதனிடையே ஜூலை 14-(இன்று) நடிகர் சரத்குமார் தனது 69-வது பிறந்த நாளை கொண்டாடி வருகிறார். 40 வருடமாக திரைத்துறையில் தனது ஆளுமையை செலுத்தி வரும் சரத்குமாரை அவரது ராடான் அலுவலகத்தின் இந்தியன் எக்பிரஸ் குழுவினர் சந்தித்தனர்.

துபாயில் இருந்து திருப்பி வந்த அவரிடம், முதலில் இந்த காலக்கட்டத்தில் ஒரு படத்தின் போஸ்டர் வெற்றிரமாக 2-வது நாள் என்று வருவது குறித்து கேட்டபோது இப்படி ஒரு நாள் வரும் என்று நான் நினைக்கவே இல்லை என்று கூறியுள்ளார். அதன்பிறகு தற்போது 69-வயதாகிவிட்டது என்று கூறிய போது வயது வெறும் நம்பர் மட்டும் தான். நான் இன்னும் எனது இளமையாகத்தான் இருக்கிறேன்.

சமீபத்திய போர்த்தொழில், பொன்னியின் செல்வன் 1 மற்றும் 2 மற்றும் கஸ்டடி ஆகிய படங்களின் மூலம் என்னை புதுப்பித்துக்கொண்டேன் என்று கூறியுள்ளார். ராடான் அலுவலகத்தில் இரண்டு கப் சர்க்கரை இல்லாத கருப்பு காபியுடன் அமர்ந்து, சுமார் 40 ஆண்டுகளாக நீடித்து வரும் அவரது திரை பயணத்தை குறித்து பல கேள்விகள் கேட்டோம்.

நேர்காணலின் பகுதிகள்:

உங்கள் கருத்துப்படி கடந்த 40 ஆண்டுகளில் தமிழ் சினிமா சந்தித்த சில குறிப்பிடத்தக்க மாற்றங்கள் என்ன?

மக்களின் மனநிலை மாறிவிட்டது என்று சொல்வேன். நாம் இப்போது தமிழ் படங்களுடன் மட்டுமல்ல, ஹாலிவுட் படங்களோடும் போட்டியிடுகிறோம். சந்தை வேறு. முப்பது நாட்களில் எந்தப் படமும் ஓடிடி (OTT) பிளாட்ஃபார்மிற்கு வரும் என்று தெரிந்ததால், திரையரங்குகளுக்கு வருவதை விட வீட்டில் இருந்தே மக்கள் அதிகம் பார்க்கத் தொடங்கிவிட்டனர். மேலும், ஒரு குடும்பமாக சென்று தியேட்டரில் படம் பார்க்க குறைந்தபட்சம் 2,000 ரூபாய்க்கு மேல் செலவழிக்க வேண்டியுள்ளது. எனவே, திரைப்பட தயாரிப்பாளர்கள் தங்களை திரையரங்குகளுக்கு ஈர்க்கும் சிறந்த படங்களை கொண்டு வர வேண்டும். அந்த வேலையை போர் தொழில் செய்தது என்று பெருமையுடன் சொல்லலாம்.

டிக்கெட் முன்பதிவு இன்னும் 80 சதவீதமாக உள்ளது. துபாயில், படம் தியேட்டரில் இருந்து வெளியேற்றப்பட்ட பிறகும் மக்கள் கோரிக்கை விடுத்ததால், படத்தை மீண்டும் திரைக்கு கொண்டு வர வேண்டியிருந்தது. எனவே, மக்கள் ஒரு திரைப்படத்திற்கு மதிப்பு இருந்தால் அதைப் பார்ப்பார்கள் என்பதை இது நிரூபிக்கிறது. இன்னும் கொஞ்சம் யோசிக்க வேண்டும், இன்னும் கொஞ்சம் உழைக்க வேண்டும், அவசரப்படாமல் படம் எடுக்க வேண்டும்.

ஃபிலிம் ரீல்களை வீணாக்கக் கூடாது என்ற அக்கறை இருந்த காலத்தில் டிஜிட்டல் படத் தயாரிப்பில் கொஞ்சம் மந்தமான நிலை ஏற்பட்டது என்று நினைக்கிறீர்களா?

நடிப்பு விஷயத்தில் எந்த மாற்றமும் இல்லை. டிஜிட்டல் கேமரா அல்லது ஃபிலிம் என்பதைப் பொருட்படுத்தாமல் நீங்கள் அதையே செய்கிறீர்கள். இன்றும், நான் எனது வசனங்களை பார்த்து வேலை செய்கிறேன். இது நான் மிகவும் தெளிவாக உள்ள ஒன்று. ஆனால் நான் தனிப்பட்ட முறையில் மானிட்டரைப் பார்ப்பதைத் தவிர்க்க வேண்டும் என்று நினைக்கிறேன். இயக்குனர் தனக்கு இன்னும் ஒரு டேக் தேவை என்று நினைத்தாலோ அல்லது நடிகர் மீண்டும் ஷாட் செய்ய நினைத்தாலோ பரவாயில்லை. ஆனால் இப்போது என்ன நடக்கிறது என்றால், ஷாட்டில் உள்ள அனைவரும் மானிட்டரைப் பார்க்க விரும்புகிறார்கள், இது நிறைய நேரம் எடுக்கும். இயக்குனர் ஓகே என்றால் அதை அவரிடமே விட்டுவிட வேண்டும். ஒவ்வொரு நடிகரும் போய் மானிட்டரைப் பார்க்க ஆரம்பித்தால், ஒரு ஷாட்டுக்கே முப்பது முதல் நாற்பது நிமிடங்கள் ஆகும்.

உங்களுடன் இணைந்து நடிப்பை தொடங்கிய நடிகர்களுக்கு பொர் தோழில் லோகநாதன் அல்லது பொன்னியின் செல்வனின் பெரிய பழுவேட்டரையர் போன்ற பாத்திரங்கள் கிடைக்காததால், உங்கள் உடல் தகுதியே உங்கள் நிலையான வெற்றிக்குக் காரணமாகக் கூறுகிறீர்களா?

இதற்கு ஆம் என்று பதில் சொல்லலாம். ஒரு இயக்குனர் எனக்காக ஒரு கேரக்டரை எழுதும்போது, நான் அதைச் செய்வதற்கு உடல் தகுதியுள்ளவன் என்று அவர் நம்ப வேண்டும். திரைப்படங்களில் நடிப்பதற்கு மட்டுமல்ல, வாழ்க்கையில் உடல் தகுதி மிகவும் முக்கியமானது என்று என் தந்தை என்னிடம் கூறினார். சுவர் இல்லாமல் சித்திரம் இல்லை. உங்களுக்கு ஆரோக்கியமான உடல் இல்லையென்றால், ஆரோக்கியமான மனம் இருக்காது. உங்களிடம் வேறு எதுவும் இல்லாவிட்டாலும், நீங்கள் ஆரோக்கியமாக இருந்தால், நீங்கள் மீண்டு வரலாம். இது அனைவருக்கும் மிக முக்கியமான குறிக்கோளாக இருக்க வேண்டும் என்று நினைக்கிறேன்.

உங்கள் உணவுமுறை எப்படி?

அது எனது இலக்கு என்ன என்பதைப் பொறுத்தது. இப்போது, நான் மெலிந்த உடலில் இருக்கிறேன். சில நாட்களாக நாங்கள் துபாயில் இருந்தோம். அசோக் செல்வனும், நிகிலாவும், நானும் நல்லா சாப்பிட்டுக் கொண்டிருந்தோம். அதனால், ஒரு கிலோ அல்லது இரண்டு கிலோ அதிகரித்திருக்கும். ஆனால் நான் உடல் எடையை குறைக்க முயற்சி செய்துகொண்டிருக்கிறேன். டயட்டைப் பொறுத்தவரை, காலையில் இரண்டு முட்டையுடன் மூன்று இட்லி சாப்பிடுவேன். காலை 11 மணியளவில் சில பருப்பு சிற்றுண்டி. மதிய உணவிற்கு, 25o கிராம் சிக்கன் மற்றும் இரண்டு சப்பாத்திகள். பிறகு மாலை போஹா. மாலை 7 மணிக்கு, மீண்டும் 250 கிராம் சிக்கன் அல்லது மீன். அவ்வளவுதான், நான் தினமும் மூன்று லிட்டர் தண்ணீர் குடிப்பேன், தினமும் ஒன்றரை மணி நேரம் உடற்பயிற்சி செய்கிறேன். அவ்வளவுதான்.

மகாபிரபு மற்றும் ஏய் போன்ற படங்களில் நாங்கள் பார்த்த உங்களின் நகைச்சுவையான பக்கத்தை நாங்கள் இழந்துவிட்டோம். நீங்கள் எப்படி நினைக்கிறீர்கள்?

சமீபத்தில், அசோக் செல்வனும் இயக்குனர் விக்னஷும் ஒரு உரையாடலின் போது, நிஜ வாழ்க்கையில் ஒரு மகிழ்ச்சியான நபராக இருப்பதைப் பற்றி சொன்னார்கள். இந்த பக்கத்தை நான் பார்வையாளர்களுக்கு அதிகம் காட்ட வேண்டும். சரி, அது என் வழியில் வரும்போது அதைச் செய்வோம்.

90-களில், பிரபு சத்யராஜ், விஜயகாந்த் என சூப்பர் ஸ்டார்கள் இருந்தும் உங்களுக்கு, குறிப்பிடத்தக்க மார்க்கெட் இருந்தது. ஹீரோக்களின் பிராண்ட் இப்போது இல்லை என்று நினைக்கிறீர்களா?

அப்போது எங்களுக்கு ஏராளமான ரசிகர்கள் திரையரங்குகளுக்கு வந்தனர். இப்போதும் அங்கே ஆட்கள் இருக்கிறார்கள், ஆனால் நாம் இன்னும் அந்த ரசிகர் பட்டாளத்தைத் தட்டிக் கொண்டிருக்கிறோமா என்று எனக்குத் தெரியவில்லை. உதாரணமாக, சூரியன் 2 படத்தை நான் செய்து அதை நன்றாக விளம்பரப்படுத்தினால், மக்கள் திரையரங்குகளுக்கு வருவார்கள் என்பது உறுதி.

ஒருசில ஹீரோக்களுக்கு அதீத ரசிகராக இருக்கும் 90களின் ‘சுப்ரீம் ஸ்டார்’ சரத்குமார் இப்போது வெளிவர முடியுமா?

அது சாத்தியம். உதாரணத்திற்கு அசோக் செல்வனை எடுத்துக் கொள்ளுங்கள். நான் அவரை உன்னிப்பாக கவனித்து வருகிறேன், மேலும் அவருடைய யுஎஸ்பி ஸ்கிரிப்ட்களை மக்கள் நம்புகிறார்கள் என்று அவரிடம் சொன்னேன். இப்போது, அந்த பிம்பத்தை முன்னோக்கி எடுத்து, ஒரு மகா ஹீரோவாக மாறினால், அவர் அப்படி ஆகலாம். அது அவரவர் செயல்களை பொறுத்தது. நான் லியாம் நீசன் அல்லது டென்சல் வாஷிங்டன் போன்ற ஸ்கிரிப்ட்களைத் தேர்ந்தெடுத்து பிளாக்பஸ்டர் படத்தை கொடுத்தால், நான் மீண்டும் போட்டியையும் ரசிகர்களையும் உருவாக்குவேன். நான் காஞ்சனா படத்தில் நடித்தபோது, அந்த படத்தின்  ரசிகர்களான குழந்தைகளின் ரசிகர் பட்டாளம் எனக்கு கிடைத்தது. விஜய்யின் வாரிசு மூலம் இதுவரை இல்லாத பல இளைஞர்கள் என்னை தெரிந்துகொண்டார்கள். ‘இந்தப் படத்தில் நீங்கள் நன்றாக நடித்திருக்கிறீர்கள். என்று சொன்னார்கள். இதற்கு முன் நான் இப்படி நடிப்பதை அவர்கள் பார்த்திருக்க மாட்டார்கள். நான் இப்படித்தான் இருப்பேன், ‘எப்போதும் இருந்து இப்படித்தான் நடித்து வருகிறேன், என்ன மாறிவிட்டது?  அப்படியென்றால், சமீபத்தில் கிடைத்த பாராட்டு, நான் மெதுவாக புதிய ரசிகர்கள் மத்தியில் பிரபலமாகி வருகிறேன் என்று அர்த்தம். மணிரத்னத்தின் பொன்னியின் செல்வன் என்னை ஒரு வித்தியாசமான நடிகராக மக்கள் மத்தியில் அழைத்துச் சென்றது.

சினிமாவில்  தொடர்புடையதாக இருக்க என்ன வகையான முயற்சிகளை நீங்கள் பயன்படுத்துகிறீர்கள்?

நான் சர்வ சாதாரணமாக பார்க்கிறேன். வெப் சீரிஸ் பார்த்து வருகிறேன். மாடர்ன் லவ் சென்னை பிடித்திருந்தது, புத்துணர்ச்சியாக இருந்தது. சோனாக்ஷி சின்ஹாவின் தஹாத் பார்த்தேன். நான் அனைத்தையும் பார்க்கிறேன். நல்லதா கெட்டதா என்பது முக்கியமில்லை. அவர்கள் அதை மோசமாகச் சொன்னால், அது ஏன் மோசமானது என்பதை அறிய நான் அதைப் பார்ப்பேன். நான்கு நாட்களுக்கு முன், கமல் சார் அந்த தொண்டை அசைவை எப்படி செய்கிறார் என்று தெரிந்துகொள்ள அன்பே சிவம் பார்த்துக் கொண்டிருந்தேன். புரோஸ்டெடிக்ஸ் மற்றும் அனைத்திலும், அவர் அதை நன்றாக செய்கிறார். நான் அவரை அழைத்து அவர் அதை எப்படி செய்தார் என்று கேட்கலாம், ஆனால் அதை நானே பார்த்து புரிந்து கொள்ள விரும்புகிறேன்.

நீங்கள் அற்புதமாகச் செய்த உணர்வைத் தந்த படங்கள் எவை?

நான் அப்படி நினைக்கவில்லை. இந்தப் படத்தில் ரசிகர்கள் என்னை ஏற்றுக்கொண்டதால் அதை வழக்கமாக எடுத்துக்கொள்கிறேன். இருப்பினும், இயக்குநர்கள் வித்தியாசமான படங்கள் மற்றும் கதாபாத்திரங்களில் நடிக்க பொதுவாக என்னை நம்பியிருக்க வேண்டும் என்று நான் உணர்கிறேன். அப்போது, நான்கு சண்டைகள் மற்றும் ஐந்து பாடல்கள் இருந்தால் போதும் அதற்காகத்தான் போகிறோம். பிரபு, சத்யராஜ், விஜயகாந்த், நான் என எல்லாரும் அப்படித்தான் வேலை செய்தோம். அதனால், பரிசோதனை முயற்சி செய்ய வேண்டிய அவசியமும் இல்லை, யதார்த்தமான படங்கள் செய்ய வேண்டிய அவசியமும் இல்லை. அப்போதைய இயக்குநர்கள் என்னை நம்பி தனித்துவமான கதாபாத்திரங்களில் நடிக்க அழைத்திருந்தால், நான் இப்போது வேறு லெவலில் இருந்திருப்பேன் என்று நம்புகிறேன்.

உங்களுக்கு ஏதேனும் வருத்தம் இருக்கிறதா?

நான் அதை வருத்தம் என்று சொல்ல மாட்டேன்… ஆனால் நாம் எப்படி உருவாகிறோம். 1996-ல் சூர்ய வம்சம் போன்ற வெற்றிகளைப் பெற்றேன். நான் உச்சத்தில் இருந்தபோது ஆளுங்கட்சிக்கு எதிராக சென்று பிரச்சாரம் செய்தேன். பிறகு நான் அரசியல் கட்சியில் சேர்ந்தேன். ஒருவர் என்ன செய்ய விரும்புகிறார் என்பதில் தெளிவாக இருக்க வேண்டும். நான் அப்போது இல்லை. சினிமாவில் நடிப்பதா, அரசியலில் இருப்பதா என்று தெரியவில்லை. நான் யோசித்திருக்க வேண்டும் என்று நான் நினைக்கிறேன்.

69 வயதில், இப்போது உங்கள் இலக்கு என்ன என்பதில் தெளிவாக இருக்கிறீர்களா?

இப்போது அரசியலில் என்னால் என்ன சாதிக்க முடியும் என்று கேட்டால் அது தெளிவாகத் தெரியும். பொருத்தமாக இருப்பதுதான் முக்கியம். ஆனால் நடிப்பு எனக்கு ரொட்டி மற்றும் வெண்ணெய் போல். சுமார் 15 வருடங்களாக ஓய்வு எடுத்துக்கொண்டதால், மனரீதியாகவும், பொருளாதார ரீதியாகவும் எனக்கு நிறைய செலவாகிவிட்டது.

நீங்கள் இந்த தலைமுறையின் ஒரு பகுதியாக இருந்திருக்க வேண்டும், அதனால் நீங்கள் இன்னும் அதிகமாக செய்திருக்க வேண்டும் என்று எப்போதாவது உணர்ந்திருக்கிறீர்களா?

ஒவ்வொரு காலகட்டமும் வித்தியாசமாக இருப்பதால் அப்படி நினைக்க முடியாது. ஆனால் திரைப்படத் தயாரிப்பின் பணவியல் அம்சங்களில் அப்பட்டமான மாற்றத்தைக் காண்கிறேன். அன்று எம்.ஜி.ஆர் மற்றும் பிற ஐகான்கன் பெற்ற சம்பளத்தை ஒப்பிட்டு, இன்றைய நட்சத்திரங்களின் சம்பளத்துடன் ஒப்பிட்டுப் பார்க்கும் போது.., எப்படியெல்லாம் மாறியிருக்கிறது என்று ஆச்சரியமாக இருக்கிறது. ஆம், பணவீக்கம் போன்ற காரணிகள் பரிசீலிக்கப்பட வேண்டும் ஆனால் சூர்ய வம்சத்திற்குப் பிறகு, எனது சம்பளத்தை ஒரு லட்சம் அதிகரிக்க வேண்டுமா என்று யோசித்துக்கொண்டிருந்தேன், நான் அமைதியாக என் நண்பரிடம் பேசினேன். அதை உரக்கச் சொல்லக்கூட எங்களுக்கு தைரியம் இல்லை. அது இப்போது இல்லை. ஒரு நடிகர் வெற்றி பெற்றால், அவரது அடுத்த படத்திற்கு பெரும் தொகையை கொடுக்க ஆட்கள் தயாராக இருக்கிறார்கள். இன்றைய போக்கின் சரியான மற்றும் தவறான அம்சங்களைப் பற்றி நான் பேசவில்லை. இன்று சூர்ய வம்சம் வந்து ஹிட் ஆகியிருந்தால் ஐந்து கோடி கேட்டிருக்கலாம் மூன்று கிடைத்திருக்கும் என்று சொல்லிவிட்டு சிரிக்கிறார்

சூர்யா வம்சம் 2 மற்றும் நாட்டாமை 2 பற்றி வதந்திகள் உண்மையா?

ஒரு வருடம் முன்பு, சூரிய வம்சம் 2 இப்போது வேலை செய்யுமா என்று நான் யோசித்துக்கொண்டிருந்தேன். இருந்தாலும், நிறைய யோசித்து, நல்ல கதை மற்றும் காட்சி அமைப்புடன் படத்தை எடுத்தால், மக்கள் ஆதரிப்பார்கள் என்ற நம்பிக்கையை, போர் தோழில் படத்தின் வெற்றி தந்துள்ளது. ஆர்.பி.சௌத்ரி இதன் தொடர்ச்சியை எடுப்பதில் ஆர்வம் காட்டுகிறார். அது நன்றாக வொர்க் ஆகும் என்று நம்புகிறேன். பார்க்கலாம் என கூறியுள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“