திரைப்பட விமர்சனங்களுக்கு தடை கோரிய வழக்கு: சென்னை ஐகோர்ட் புதிய உத்தரவு!

ஒரு திரைப்படம் வெளியான உடனே அது தொடர்பான விமர்சனங்கள் வந்துவிடுவதால், படங்கள் தோல்வியை சந்திக்கின்றன. இதனால் 3 நாட்களுக்கு விமர்சனங்கள் வெளியிடுவதற்கு தடை விதிக்க வேண்டும் என்ற தொடரப்பட்ட வழக்கில், சென்னை உயர்நீதிமன்றம் புதிய உத்தரவை பிறப்பித்துள்ளது.

தமிழ் சினிமாவில், ஆண்டுக்கு 300-க்கு மேற்பட்ட படங்கள் வெளியாகி வருகின்றனர். இதில் ரசிகர்கள் மனதில் இடம் பிடித்த படங்கள் என்று பட்டியல் எடுத்தால், அதில் ஒரு சில படங்கள் மட்டுமே இடம் பெறும். ஆண்டு முழுவதும் வெளியாகும் பெரும்பாலான படங்கள் தோல்வியை சந்திக்கும் நிலை தான் உள்ளது. குறிப்பாக பெரிய பட்ஜெட்டில் பெரிய நடிகர்கள் நடித்த படங்களே இந்த ஆண்டு தோல்வியை சந்தித்துள்ளன.

கமல்ஹாசன் நடித்த இந்தியன் 2 பெரிய எதிர்பார்ப்புக்கு மத்தியில் வெளியாகி கடுமையான விமர்சனங்களை பெற்றது. அதேபோல் ரஜினிகாந்தின் வேட்டையன் திரைப்படமும் விமர்சன ரீதியாக கடுமையாக பாதிப்பை சந்தித்தாகவும் தகவல் வெளியான நிலையில், சமீபத்தில் வெளியாக சூர்யாவின் கங்குவா பெரிய தோல்விப்படம் என்று சொல்லும் அளவுக்கு கடுமையான விமர்சனங்களை பெற்றிருந்தது.

படம் வெளியாவதற்கு முன்பாக, படக்குழுவினர் இந்த படம் குறித்து பேசிய வார்த்தைகளும் கங்குவா படத்திற்கு பாதகமாக அமைந்த நிலையில், திரை பிரபலங்கள் பலரும் இந்த படத்திற்கு ஆதரவாக கருத்து தெரிவித்தனர். ஆனாலும் நெட்டிசன்கள் கடுமையான விமர்சனங்களை கொடுத்தனர். இதை ஏற்றுக்கொள்ள முடியாத தயாரிப்பாளர் சங்கம், விமர்சனங்களால் தான் படங்கள் தோல்வியை சந்திக்கிறது என்று கூறி, யூடியூப் சேனல்களை தியேட்டர் வளாகத்திற்குள் அனுமதிக்க வேண்டாம் என்று கூறினர்.

இதனிடையே புதிய படங்கள் வெளியான 3 நாட்களக்கு அந்த படம் குறித்து விமர்சனம் செய்ய தடை விதிக்க வேண்டும் என்று, சென்னை உயர்நீதிமன்றத்தில் வழக்கு தொடரப்பட்டது. இந்த விழக்கை விசாரித்த நீதிபதி சவுந்தர் திரைப்படங்கள் வெளியான 3 நாட்களுக்கு விமர்சனங்கள் வெளியிட தடைவிதிக்க மறுப்பு தெரிவித்துள்ளார். அதே சமயம் அவதூறு பரப்புவது குறித்து காவல்துறையிடம் புகார் அளிக்கலாம் என கூறியுள்ளார்.

மேலும், விமர்சனம் கருத்து சுதந்திரம் என்பதால் இது குறித்து பொதுவாக உத்தரவு பிறப்பிக்க முடியாது என கூறிய நீதிபதி, விமர்சனத்தை முறைப்படுத்த விதிகள் வகுக்கக் கோரிய வழக்கில் மத்திய, மாநில அரசுகள், யூடியூப் நிறுவனம் பதிலளிக்க உத்தரவிட்டுள்ளார்.