5 காட்சிகள் திரையிடலாம்; முதல் காட்சி எப்போது தொடக்கம்? 'கூலி' படத்திற்கு தமிழக அரசு சிறப்பு அனுமதி

லோகேஷ் கனகராஜ் இயக்கத்தில் ரஜினிகாந்த் நடித்துள்ள கூலி திரைப்படம் ஆகஸ்ட் 14-ந் தேதி வெளியாக உள்ள நிலையில், இந்த படத்திற்கு சிறப்பு காட்சி திரையிட அனுமதி அளித்துள்ள தமிழக அரசு ஒரு நாளைக்கு 5 காட்சிகள் வரை திரையிடவும் அனுமதி அளித்துள்ளது. 

சூப்பர்ஸ்டார் ரஜினிகாந்த் நடிப்பில், லோகேஷ் கனகராஜ் இயக்கத்தில் உருவாகியுள்ள 'கூலி' திரைப்படம் ஆகஸ்ட் 14-ஆம் தேதி வெளியாக உள்ளது. ரஜினிகாந்துடன், சத்யராஜ், நாகர்ஜூனா, சவுபின், உபேந்திரா, அமீர்கான் உள்ளிட்ட பலர் நடித்துள்ள இந்த படத்திற்கு அனிருத் இசையமைத்துள்ளார். பூஜா ஹெக்டே ஒரு பாடலுக்கு நடனமாடியுள்ளார். இதில் இருந்து வெளியான மோனிகா பாடல் ரசிகர்கள் மத்தியில் பெரிய வரவேற்பை பெற்று வருகிறது. படத்தின் மீதான எதிர்பார்ப்பும் அதிகரித்துள்ளது.

1986-ம் ஆண்டு, ரஜினிகாந்த் நடிப்பில் வெளியான மிஸ்டர் பரத் என்ற படத்தில் அவருக்கு அப்பாவாக நடித்த சத்யராஜ், சுமார் 39 ஆண்டுகளுக்கு பிறகு மீண்டும், கூலி படத்தில் அவருடன் இணைந்து நடித்துள்ளார். சமீபத்தில் வெளியான இந்த படத்தின் டிரெய்லர் மூலம், படத்தில் ரஜினிகாந்த் சத்யராஜ் இருவரும், நண்பர்களாக நடிப்பது உறுதி செய்யப்பட்டுள்ளது. இந்த டிரெய்லரே ரசிகர்கள் மத்தியில் பெரிய வரவேற்பையும் எதிர்பார்ப்பையும் ஏற்படுத்தியுள்ளது.

கூலி படத்திற்கான ப்ரமோஷன் பணிகள் ஒரு பக்கம் தீவிரமாக நடைபெற்று வரும் நிலையில், படத்தின் நடைபெற்ற சிறப்பு காட்சி சமீபத்தில் திரையிடப்பட்டது. இதில், படம் பார்த்த பலரும் தங்கள் விமர்சனங்களை சமூகவலைதளங்களில் வெளியிட்டதை தொடர்ந்து, ரசிகர்களின் எதிர்பார்ப்பை மேலும் அதிகரித்துள்ளன. இதனிடையே கூலி படம் வெளியாக இன்னும் ஒரு நாளே உள்ள நிலையில், படத்தின் சிறப்பு காட்சி திரையிடலுக்கு அனுமதி அளித்து தமிழக அரசு உத்தரவிட்டுள்ளது,

அதன்படி, முதல் காட்சி காலை 9 மணிக்கு தொடங்கும் என்று அறிவிக்கப்பட்டுள்ள நிலையில், நள்ளிரவு 2 ணி வரை 5 காட்சிகள் திரையிடவும் அனுமதி அளித்துள்ளது. தமிழக அரசின் இந்த அறிவிப்பு ரசிகர்கள் மத்தியில் பெரிய எதிர்பார்ப்பையும், மகிழ்ச்சியையும் ஏற்படுத்தியுள்ளது.