ஜெயிலர் படத்திற்கு விடுமுறையுடன் இலவச டிக்கெட்... பிரபல நிறுவனம் ஊழியர்களுக்கு இன்ப அதிர்ச்சி

ரஜினிகாந்த் நடிப்பில் வரும் ஆகஸ்ட் 10-ந் தேதி வெளியாக உள்ள ஜெயிலர் படத்திற்காக இலவச டிக்கெட் வழங்கி அன்றைய தினம் விடுமுறை அளித்து மதுரையை சேர்ந்த பிரபல நிறுவனம் ஊழியர்களுக்கு இன்ப அதிர்ச்சி கொடுத்துள்ளது.

அண்ணாத்த படத்திற்கு பிறகு நடிகர் ரஜினிகாந்த் தற்போது ஜெயிலர் என்ற படத்தில் நடித்துள்ளார். நெல்சன் திலீப் குமார் இயக்கியுள்ள இந்த படத்தில் ரஜினிகாந்த்துடன், ரம்யா கிருஷ்ணன், தமன்னா, மோகன்லால், சிவராஜ்குமார், ஜாக்கி ஷெரப், விநாயகன், யோகி பாபு உள்ளிட்ட பலர் நடித்துள்ளனர். அனிருத் இசைமைத்துள்ள இந்த படத்தை சன்பிச்சர்ஸ் நிறுவனம் பிரம்மாண்டமாக தயாரித்துள்ளது.

சுதந்திர தின விடுமுறையை முன்னிட்டு வரும் ஆகஸ்ட் 10-ந் தேதி வெளியாக உள்ள ஜெயிலர் படத்திற்கு சிறப்பு காட்சிக்கு இதுவரை அனுமதி மறுக்கப்பட்டுள்ள நிலையில், படம் காலை 9 மணிக்கு முதல் காட்சி தொடங்கும் என்று கூறப்பட்டுள்ளது. இந்த படத்தை பார்க்க, ரஜினி ரசிகர்கள் மட்டுமல்லாமல் பொதுவான ரசிகர்களும் பெரும் ஆர்வத்துடன்  இருந்து வரும் நிலையில், மதுரையை சேர்ந்த பிரபல நிறுவனம் தங்களது ஊழியர்களுக்கு இன்ப அதிர்ச்சியை கொடுத்துள்ளது.

ஜெயிலர்’ படம் வெளியாகும் ஆகஸ்ட் 10ஆம் தேதி தனது ஊழியர்களுக்கு விடுமுறை அறிவித்துள்ள அந்நிறுவனம், படத்திற்கு இலவச டிக்கெட் வழங்கப்படும் எனவும் அறிவித்துள்ளது. இந்த அறிவிப்பு அந்நிறுவனத்தின் ஊழியர்களுக்கு இன்ப அதிர்ச்சியாக அமைந்துள்ளது. இது தொடர்பாக நிறுவனம் வெளியிட்டுள்ள செய்திக்குறிப்பில், ஒரே ஒரு சூப்பர் ஸ்டார் ஆன ரஜினிகாந்த் அவர்களுக்கு நமது தாத்தா, நமது அப்பா, நமது ஜெனரேஷன் மற்றும் நமது மகன், பேரன் என ஐந்து தலைமுறையினர் ரசிகர்களாக உள்ளனர்.

அந்த வகையில் ’ஜெயிலர்’ திரைப்படம் வெளியாகும் நாளில் நமது நிறுவன ஊழியர்கள் அனைவருக்கும் விடுமுறை அளிக்கப்பட்டுள்ளது. மேலும் இலவச டிக்கெட் வழங்கப்படுகிறது’ என தெரிவித்துள்ளது. இந்நிறுவனத்தின் இந்த அறிவிப்பு காரணமாக மேலும் சில நிறுவனங்கள் இதே போல் விடுமுறை அளித்து டிக்கெட் வழங்கும் என்று எதிர்பார்க்கப்படுகிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“