2 வருஷம் கோமா... கணவரின் திடீர் மரணம்; பிள்ளைகளுக்கு வழிகாட்டி இல்ல; தலைவன் தலைவி நடிகை வேதனை!

சினிமா உலகில் பல துணைப் பாத்திரங்களில் நடித்து மக்கள் மனதில் இடம்பிடித்தவர் நடிகை ஜானகி சுரேஷ். சமீபத்தில் அவர் ஒரு நேர்காணலில், தனது திரைப்பட அனுபவங்கள், தொலைக்காட்சிப் பயணம் மற்றும் தனிப்பட்ட வாழ்க்கையில் சந்தித்த சவால்கள் குறித்து கலாட்டா பிங்கிற்கு அளித்த பேட்டியில் மனம் திறந்து பேசினார். 'தலைவன் தலைவி' படத்தில் ஜானகி சுரேஷ் நடிகை நித்யா மேனனின் தாயாக 'ஆவரணம்' என்ற கதாபாத்திரத்தில் நடித்தார். இந்தப் பாத்திரம் சிலருக்கு எரிச்சலூட்டுவதாகவும், சிலருக்கு நியாயமானதாகவும் தோன்றியதாக அவர் குறிப்பிட்டார். 

படப்பிடிப்புத் தளத்தில் விஜய் சேதுபதி மற்றும் நித்யா மேனனுடன் பணிபுரிந்தது மகிழ்ச்சியான அனுபவம் என்றும், ஒரு காட்சியில் தன் கணவராக நடித்த நடிகர் கன்னத்தில் அறைவது போலச் சைகை மட்டுமே செய்ததாகவும் விவரித்தார். ஜானகி சுரேஷ், 'கிழக்கு வாசல்' சீரியலில் நடித்ததுதான் தனது சினிமா வாழ்க்கையில் ஒரு பெரிய திருப்புமுனை என்று தெரிவித்தார். இந்தத் தொடரில் அவருக்கு ஜோடியாக நடிகர் எஸ்.எஸ்.சரவணன் நடித்தார். இருவரும் படப்பிடிப்புத் தளத்தில் நல்ல நண்பர்களாகி, ஒன்றாக உணவருந்திப் பயணங்கள் செய்த நினைவுகளைப் பகிர்ந்துகொண்டார். மேலும் அவர் தனது தனிப்பட்ட வாழ்க்கையில் நடந்த சில கசப்பான சம்பவங்களையும் பகிர்ந்துக்கொண்டார்.

அபுதாபியில் 14 ஆண்டுகள் வாழ்ந்த பிறகு, இந்தியாவுக்குத் திரும்பி நாடகங்களில் நடிக்கத் தொடங்கியதாக ஜானகி சுரேஷ் கூறினார். தனது சினிமா பயணத்திற்கு முன்பு, தனக்கென்று ஒரு அடையாளம் இல்லாமல் இருந்ததாகக் குறிப்பிட்ட அவர், இப்போது மக்கள் தன்னை ஒரு நடிகையாக அங்கீகரிப்பதைக் கண்டு மகிழ்ச்சி அடைவதாகக் கூறினார்.

அவர் தனது தனிப்பட்ட வாழ்க்கையில் சந்தித்த சோகமான அனுபவத்தையும் பகிர்ந்துகொண்டார். கடந்த ஆண்டு தனது கணவரை இழந்ததாகவும், அவர் இரண்டு வருடங்களுக்கும் மேலாகக் கோமாவில் இருந்ததாகவும் தெரிவித்தார். கணவரின் இழப்பிற்குப் பிறகு, குடும்பத்தினர் சோகத்தில் இருந்து மீண்டு வரச் சிறிது காலம் பிடித்ததாகவும், இப்போது ஒருவருக்கொருவர் உறுதுணையாக இருப்பதாக உணர்ச்சிப்பூர்வமாகப் பேசினார்.

ஜானகி சுரேஷ் பெண்களுக்கு முக்கியமான சில அறிவுரைகளை வழங்கினார். பெண்கள் விழிப்புணர்வு, உலகத்தைப் பற்றிய அறிவு மற்றும் கல்வி ஆகிய மூன்றையும் அவசியம் பெற்றிருக்க வேண்டும் என்று அவர் வலியுறுத்தினார். மேலும், தைரியமான பெண்கள் உலக நிகழ்வுகளைப் பற்றி வாசிப்பதன் மூலமும், நல்ல உள்ளடக்கத்தைக் கவனிப்பதன் மூலமும் தங்கள் அறிவை மேம்படுத்திக்கொள்ள வேண்டும் என்றும் அறிவுறுத்தினார்.