தி கேரளா ஸ்டோரி திரைப்படத்துக்கு தடை விதிக்கப்படுவதாக மேற்கு வங்க முதலமைச்சர் மம்தா பானர்ஜி திங்கள்கிழமை (மே 8) அறிவித்தார்.
ஹவுராவில் உள்ள மாநிலச் செயலகமான நபன்னாவில் நடந்த செய்தியாளர் சந்திப்பிற்குப் பிறகு, முதலமைச்சர் மம்தா பானர்ஜி, மாநிலம் முழுவதும் படத்தைத் தடை செய்யுமாறு தலைமைச் செயலாளர் ஹரிகிருஷ்ணா த்விபேடிக்கு உத்தரவிட்டார்.
அப்போது, “வங்காளத்தில் இந்தப் படம் எந்த அரங்கிலும் திரையிடப்படாது” என்றார். முன்னதாக, பாஜக மற்றும் சிபிஐ(எம்) ஆகிய இரு கட்சிகளையும் பானர்ஜி கடுமையாக சாடினார்.
தொடர்ந்து அவர், “தி கேரளா ஸ்டோரி என்றால் என்ன? நான் மார்க்சிஸ்ட் கம்யூனிஸ்ட் கட்சியை ஆதரிக்கவில்லை, அவர்கள் பாஜகவுடன் இணைந்து செயல்படுகிறார்கள்.
இதனை நான் கேரள முதலமைச்சருக்கு சொல்ல விரும்புகிறேன். இது ஒரு திரிக்கப்பட்ட கதை. முதலில் காஷ்மீரையும், பிறகு கேரளாவையும் அவதூறாக பேசுகிறார்கள்” என்றார்.
மேலும், ‘பெங்கால் கோப்புகளை’ தயாரிப்பதற்கான ஏற்பாடுகள் நடந்து வருவதாகவும் மம்தா பானர்ஜி கூறினார்.
கேரளாவைச் சேர்ந்த 32,000 பெண்கள் ஐ.எஸ் பயங்கரவாத அமைப்பால் ஆள்சேர்ப்பு செய்யப்பட்டதாகக் கூறி கேரளா ஸ்டோரி சர்ச்சையில் சிக்கியுள்ளது.
படத்தின் தயாரிப்பாளர் விபுல் அம்ருத்லால் ஷா, இந்தக் கோரிக்கையை முன்வைத்த டீசரை நீக்க ஒப்புக்கொண்டுள்ளார். கேரளாவில் படத்தை திரையிட தடை விதிக்க கேரள உயர்நீதிமன்றம் மறுத்துவிட்டது.
இருப்பினும், மதக் குழுக்கள் மற்றும் அரசியல்வாதிகளின் எதிர்ப்பால் கேரளா முழுவதும் பல மாவட்டங்களில் படத்தின் திரையிடல் நிறுத்தப்பட்டது.
படத்தை தடை செய்யும் மம்தா பானர்ஜியின் முடிவுக்கு பதிலளித்த பாஜக தலைவரும் நடிகருமான ருத்ரனில் கோஷ், “இது மிகவும் மோசமான முடிவு. மேற்கு வங்கம் இப்போது வன்முறையின் பிறப்பிடமாக உள்ளது. தடைகளால் உண்மைகளை அடக்க முடியாது..
பாஜக தேசிய துணைத் தலைவர் திலீப் கோஷ், “கேரளா கதையைத் தடை செய்தால், ‘பெங்கால் கோப்புகள்’ வெளியான பிறகு அவர் என்ன செய்வார்? அவர் ராஜினாமா செய்வாரா?” எனக் கேள்வியெழுப்பினார்.
இதற்கிடையில், தமிழகத்தில் திமுக ஆட்சியில் கேரளா ஸ்டோரியை தென் மாநிலத்தில் திரையிடவில்லை என்று பாஜக கூறியது. “அடிப்படைவாத சக்திகள் படத்தை திரையிடுவதற்கு எதிராக மிரட்டல் விடுத்திருந்தால், அவர்கள் மீது நடவடிக்கை எடுக்க வேண்டும்.
அதற்கு பதிலாக படத்தை திரையரங்குகளில் இருந்து அகற்றுவது கோழைத்தனம் மட்டுமல்ல ஆபத்தானது” என்று பாஜக தமிழக துணைத் தலைவர் நாராயணன் திருப்பதி கூறியுள்ளார்.
இது குறித்து அவர் வெளியிட்டுள்ள அறிக்கையில், மாநில அரசு திட்டமிட்டு படத்தை திரையிடாமல் எடுத்துள்ளது. படத்தை சட்டப்பூர்வமாக தடை செய்ய முடியாது, எனவே அவர்கள் உண்மையை மறைக்க அதிகாரத்தை துஷ்பிரயோகம் செய்தனர்.
மேலும், இஸ்லாமிய அரசு (ஐ.எஸ்) போன்ற பயங்கரவாத அமைப்புகளின் செயல்பாட்டின் முறையைப் பற்றி இந்தப் படம் மக்களுக்குத் தெரியப்படுத்தியது.
ஆனால், திமுக ஆட்சி அதன் திரையிடலைத் தடுப்பதில் பெருமிதம் கொள்கிறது என்று நாராயணன் குற்றம் சாட்டினார்.
மே 7 அன்று, தமிழ்நாடு திரையரங்கு மற்றும் மல்டிபிளக்ஸ் உரிமையாளர்கள் சங்கத்தின் தலைவர், திருப்பூர் சுப்பிரமணியம் படத்தைத் திரையிட்ட சில மல்டிபிளக்ஸ்கள் படத்தைத் திரும்பப் பெற முடிவு செய்ததாகக் கூறினார் என்பது குறிப்பிடத்தக்கது.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“
