OTT: நொடிக்கு நொடி பரபரப்பு... சீட் நுனியில் அமர வைக்கும் டாப் திரில்லர் படங்கள்!

மலையாள சினிமாவில் த்ரில்லர் படங்கள் எப்போதும் தனித்துவமானவை. திரைக்கதையில் யூகிக்க முடியாத திருப்பங்களும், கதாபாத்திரங்களின் ஆழமான சித்தரிப்பும் மலையாள த்ரில்லர்களின் சிறப்பு. 'த்ரிஷ்யம்' திரைப்படம் எப்படி ஒரு குடும்பத்தின் பாதுகாப்புக்காக நடக்கும் பரபரப்பான போராட்டத்தை உணர்வுபூர்வமாகச் சொன்னதோ, அதேபோல பார்வையாளர்களை கடைசி நிமிடங்கள் வரை திக் திக் என வைத்திருக்கும் வகையில் சில சிறந்த மலையாள த்ரில்லர் படங்கள் இங்கே பட்டியலிடப்பட்டுள்ளன. இவை அனைத்தும் ஓ.டி.டி தளங்களில் கிடைக்கின்றன.

'சல்யூட்' (Salute) - 2022

துல்கர் சல்மான் நடிப்பில் வெளியான 'சல்யூட்', ஒரு மர்மமான கொலை வழக்கை விசாரிக்கும் போலீஸ் அதிகாரியின் பயணத்தைச் சுவாரஸ்யமாகச் சொல்கிறது. குற்றவாளியைத் தேடும் இந்த விசாரணைப் பயணம், பல்வேறு திருப்பங்களுடன் திகிலையும், பரபரப்பையும் ஏற்படுத்துகிறது. ஒரு போலீஸ் அதிகாரியின் பார்வையில் கதை நகர்வதால், ஒவ்வொரு காட்சியும் புதிராகவே இருக்கும். இந்த ஆக்‌ஷன், க்ரைம், மிஸ்டரி, த்ரில்லர் திரைப்படம் சோனி லைவ் ஓ.டி.டி தளத்தில் காணக் கிடைக்கிறது.

'12த் மேன்' (12th Man) - 2022

மோகன்லால் நடிப்பில் உருவாகியிருக்கும் '12த் மேன்', ஒரு க்ரைம், மிஸ்டரி, த்ரில்லர் திரைப்படம். 11 நண்பர்கள் ஒரு விருந்துக்குச் செல்கின்றனர். அங்கு எதிர்பாராத விதமாக நிகழும் சம்பவங்களும், அதனைச் சுற்றி நடக்கும் ரகசியங்களும் படத்தின் முக்கிய அம்சங்கள். இந்த க்ரைம் த்ரில்லர் முழுக்க முழுக்க சஸ்பென்ஸை மையமாக வைத்து உருவாக்கப்பட்டுள்ளது. ஜியோ ஹாட்ஸ்டார் ஓ.டி.டி தளத்தில் நீங்கள் இப்படத்தைக் கண்டு ரசிக்கலாம்.

'கனேக்கானே' (Kaanekkaane) - 2021

டொவினோ தாமஸ் நடிப்பில் வெளியான 'கனேக்கானே', ஒரே நாளில் நடக்கும் ஒரு திகில் சம்பவத்தை மையமாகக் கொண்டது. காதல் திருமணத்தின் பின்னால் ஒளிந்திருக்கும் மர்மங்களை உணர்ச்சிபூர்வமாக வெளிப்படுத்தும் இந்தத் திரைப்படம், எதிர்பாராத முடிவைக் கொண்டிருக்கும். ஒரு சில கதாபாத்திரங்கள் மற்றும் ஒரு வீட்டைச் சுற்றி நகரும் கதைக்களம், பார்வையாளர்களை கதையுடன் ஒன்றிப்போக வைக்கும். இந்த அற்புதமான த்ரில்லர் சோனி லைவ் ஓ.டி.டி தளத்தில் கிடைக்கிறது.

'நாயாட்டு' (Nayattu) - 2021

'நாயாட்டு' ஒரு அழுத்தமான க்ரைம் த்ரில்லர். காவல்துறையினரால் துரத்தப்படும் சில காவலர்களின் கதை இது. தங்களைக் காப்பாற்றிக்கொள்ள அவர்கள் எடுக்கும் முயற்சிகளும், அடுத்தடுத்து நடக்கும் எதிர்பாராத சம்பவங்களும் பார்வையாளர்களுக்குப் பெரும் பரபரப்பை ஏற்படுத்தும். சமூகத்தின் சில இருண்ட பக்கங்களை வெளிப்படையாகப் பேசும் இந்தத் திரைப்படம், நிச்சயம் பார்க்க வேண்டிய ஒன்று. 'நாயாட்டு' நெட்ஃப்ளிக்ஸ் ஓ.டி.டி தளத்தில் பார்க்கலாம்.

'கல' (Kala) - 2021

டொவினோ தாமஸ் நடித்த 'கல', ஆக்‌ஷன் மற்றும் த்ரில்லர் கலந்த திரைப்படம். இந்தப் படம் ஒரு நாய் கொலை செய்யப்படுவதால் ஏற்படும் பழிவாங்கும் உணர்ச்சியைச் சுற்றி நகர்கிறது. ஒரு நபர் தனது நாயை இழந்ததால், அதைச் செய்தவரைத் தேடிச் செல்லும் கதைக்களம், ஆக்‌ஷன் காட்சிகளால் நிரம்பியுள்ளது. இருவருக்கும் இடையே நடக்கும் மோதல், பெரும் பரபரப்புக்கு வித்திடுகிறது. இந்தத் திரைப்படம் அமேசான் பிரைம் மற்றும் ஜீ5 ஓ.டி.டி தளங்களில் கிடைக்கிறது.

மேற்கூறிய இந்தத் திரைப்படங்கள், 'த்ரிஷ்யம்' போல உணர்வுகளையும், சஸ்பென்ஸையும் கலந்து கொடுக்கும். இந்த வாரம் ஓ.டி.டியில் வெளியாகவுள்ள இந்த படங்களை பார்த்து மகிழுங்கள்.