தக் லைப் ரிலீஸ் அப்டேட்: முன்பதிவு, பாக்ஸ் ஆபிஸ் வசூல் கணிப்பு நிலவரங்கள் என்ன?

இந்திய சினிமாவின் இருபெரும் ஆளுமைகளான கமல்ஹாசன் மற்றும் மணிரத்னம் 38 ஆண்டுகளுக்குப் பிறகு "தக் லைப்" திரைப்படத்தின் மூலம் மீண்டும் இணைந்துள்ளனர். 1987 ஆம் ஆண்டு வெளியான "நாயகன்" படத்திற்குப் பிறகு ரசிகர்கள் ஆவலுடன் எதிர்பார்த்திருந்த இவர்களின் கூட்டணி மீண்டும் திரையில் பட்டையை கிளப்ப தயாராகியுள்ளது. இத்திரைப்படம் ஜூன் 5, வியாழன் அன்று திரையரங்குகளில் பிரமாண்டமாக வெளியாகிறது.

இந்த செய்தியை ஆங்கிலத்தில் படிக்க இங்கு க்ளிக் செய்யவும்.

தமிழ், தெலுங்கு, மலையாளம், கன்னடம், இந்தி என பல மொழிகளில் வெளியாகும் இத்திரைப்படம், திரையரங்கு வெளியீட்டிற்குப் பிறகு நெட்ஃபிக்ஸ் ஓடிடி தளத்திலும் வெளியாகும் என அறிவிக்கப்பட்டுள்ளது.

"தக் லைப்" திரைப்படத்தின் பட்ஜெட் மற்றும் நடிகர் சம்பளம்!

கமல்ஹாசன் மற்றும் மணிரத்னம் இணைந்து தயாரித்துள்ள "தக் லைப்" திரைப்படத்தின் பட்ஜெட் சுமார் ரூ250-300 கோடி என மதிப்பிடப்பட்டுள்ளது.  நடிகர்களின் சம்பள விவரங்களும் ஆச்சரியப்படுத்தும் வகையில் அமைந்துள்ளன. முக்கிய கதாபாத்திரத்தில் நடித்துள்ள சிம்பு ரூ40 கோடி சம்பளம் பெற்றுள்ளதாகவும், த்ரிஷா கிருஷ்ணன் ரூ12 கோடி, அபிராமி ரூ50 லட்சம், ஜோஜு ஜார்ஜ் ரூ1 கோடி என மற்ற நடிகர்களும் கணிசமான சம்பளம் பெற்றுள்ளதாக தகவல்கள் வெளியாகி வருகிறது.

அட்வான்ஸ் புக்கிங்கில் அசைக்க முடியாத "தக் லைப்"

கமல்ஹாசன் மற்றும் மணிரத்னம் என்ற இரண்டு ஜாம்பவான்களின் கூட்டணி என்பதால், "தக் லைப்" திரைப்படம் பாக்ஸ் ஆபிஸில் மிகப்பெரிய வெற்றியை பெறும் என எதிர்பார்க்கப்படுகிறது. சாக்னிலக் வெளியிட்டுள்ள அறிக்கையின்படி, தக் லைப்  திரைப்படம் இந்தியா முழுவதும் 7,74,53 டிக்கெட்டுகளை விற்றுள்ளது. நாடு முழுவதும் 5,143 காட்சிகள் திரையிடப்பட உள்ளன. முதல் நாளில் ரூ1.32 கோடி வசூல் செய்துள்ளது. தடை செய்யப்பட்ட இருக்கைகளையும் சேர்த்து, இதுவரை ரூ3.55 கோடி அட்வான்ஸ் புக்கிங் வசூல் செய்துள்ளது.

முதல் நாள் பாக்ஸ் ஆபிஸ் கணிப்பு - புதிய சாதனை படைக்குமா "தக் லைப்"?

"தக் லைப்" திரைப்படம் வாரநாள் வெளியீடாக இருந்தாலும், முதல் நாளில் பம்பர் ஓப்பனிங் பெறும் என எதிர்பார்க்கப்படுகிறது. இத்திரைப்படம் முதல் நாளில் ரூ35 கோடி வசூலிக்கும் என கணிக்கப்பட்டுள்ளது. இது சமீபத்திய இந்தி படங்களான "சக்கந்தர்" (ரூ30.06 கோடி) மற்றும் "சாபா" (ரூ33.10 கோடி) ஆகியவற்றை விட அதிகமாகும். இந்த கணிப்பு உண்மையானால், "தக் லைப்" ஒரு புதிய பாக்ஸ் ஆபிஸ் சாதனையை படைக்கும்.

"தக் லைப்" படத்திற்கு வந்த சட்ட சிக்கல்: கர்நாடகாவில் வெளியாகாதா?

"தக் லைப்" திரைப்படத்தின் ஆடியோ வெளியீட்டு விழாவில் கமல்ஹாசன் "கன்னடம் தமிழில் இருந்து உருவானது" என்று கூறியது பெரும் சர்ச்சையை ஏற்படுத்தியது. கர்நாடக ரக்ஷனா வேதிகே போன்ற கன்னட ஆதரவு குழுக்கள் மற்றும் உள்ளூர் அரசியல்வாதிகள் இதற்கு கடும் எதிர்ப்பு தெரிவித்தனர். கர்நாடகாவின் கன்னடம் மற்றும் கலாச்சார அமைச்சர் சிவராஜ் தங்கடகி, கர்நாடக திரைப்பட வர்த்தக சபைக்கு (KFCC) கடிதம் எழுதி, கமல்ஹாசன் மன்னிப்பு கேட்கும் வரை கர்நாடகாவில் அவரது படங்களுக்கு தடை விதிக்க வேண்டும் என்று வலியுறுத்தினார்.

கமல்ஹாசன் மன்னிப்பு கேட்க மறுத்ததால், கர்நாடக திரைப்பட வர்த்தக சபை  தக் லைப் படத்திற்கு தடை விதித்தது. இதையடுத்து, கமல்ஹாசனின் தயாரிப்பு நிறுவனமான ராஜ் கமல் ஃபிலிம்ஸ், கர்நாடக திரைப்பட வர்த்தக சபையின் தடைக்கு எதிராக கர்நாடக உயர் நீதிமன்றத்தில் மனு தாக்கல் செய்தது. எனினும், உயர் நீதிமன்றம் கமல்ஹாசன் மன்னிப்பு கேட்காததற்காக கண்டித்தது. ராஜ் கமல் ஃபிலிம்ஸ் சார்பில் ஆஜரான மூத்த வழக்கறிஞர் தியான் சின்னாப்பா, கமல்ஹாசன் கர்நாடக திரைப்பட வர்த்தக சபையுடன் தனது கருத்து குறித்து பேசும் வரை "தக் லைப்" கர்நாடக திரையரங்குகளில் வெளியிடப்படாது என்று நீதிமன்றத்தில் தெரிவித்தார்.

"ஒன்று மன்னிப்பு கேட்பது... அல்லது கருத்து தெரிவித்த சூழ்நிலையை விளக்கி, கர்நாடக மக்கள் மற்றும் மொழியின் மீதுள்ள அன்பை வெளிப்படுத்துவது" என்றார் அவர். இதன் மூலம், கர்நாடகாவில் "தக் லைப்" திரைப்படம் வெளியாவது இப்போதைக்கு கேள்விக்குறியாகியுள்ளது.