வாயா வாத்தியாரே... அவர் என்னை பார்த்தாலே பாடுவாரு; சிவாஜிக்கு மிகவும் பிடித்த பாடல் இதுதான்: வாலி மெமரீஸ்!

1960-களில் முன்னணி இசையமைப்பாளராக இருந்த எம்.எஸ்.விஸ்வநாதன் இசையில், அதிகப் பாடல்களை எழுதியவர்கள் கவிஞர்கள் கண்ணதாசனும், வாலியும் ஆவர். கண்ணதாசன் பிரபலமான பாடலாசிரியராக இருந்தபோது, வாலி வாய்ப்பு தேடி வந்தார்.

ஆரம்பத்தில் 2 ஆண்டுகளில் 4 பாடல்கள் மட்டுமே எழுதியதால், வாலி சினிமாவிலிருந்து விலக முடிவு செய்தார். அப்போது, கண்ணதாசன் எழுதிய 'மயக்கமா கலக்கமா' பாடல் அவருக்கு நம்பிக்கையளித்து, மீண்டும் முயற்சி செய்து பாடலாசிரியரானார். எம்.எஸ்.வி.யின் இசையில் எம்.ஜி.ஆர் மற்றும் சிவாஜிக்கு வாலி பல வெற்றிப் பாடல்களை எழுதியுள்ளார். எம்.ஜி.ஆருக்கும் கண்ணதாசனுக்கும் இடையே அரசியல் மோதல் ஏற்பட்டபோது, எம்.ஜி.ஆர் தனது படங்களில் வாலியைப் பாடல்கள் எழுத வைத்தார்.

எம்.ஜி.ஆருக்கு அரசியல் தொடர்பான பாடல்களை வாலி எழுதியிருந்தாலும், சிவாஜிக்கு அவர் எழுதிய பாடல்களும் பெரும் வரவேற்பைப் பெற்றன. வாலியின் பழைய நேர்க்காணல் ஒன்று சமீபத்தில் ஒரு ஊடகத்தில் வெளியாகியுள்ளது. அதில் பேசிய வாலி, தான் எழுதிய பாடல்களில் சிவாஜிக்கு மிகவும் பிடித்த பாடல் "'அழகு தெய்வம் மெல்ல மெல்ல அடியெடுத்து வைத்ததோ'" என்று கூறினார்.

அந்தப் பாடலின் சரணத்தில் வரும் "இளநீரை சுமந்திருக்கும் தென்னை மரம் அல்ல.. மழை மேகம் குடை பிடிக்கும் குளிர் நிலவும் அல்ல.. இங்கும் அங்கும் மீன் பாயும் நீரோடை அல்ல.. இதற்கு மேலும் இலக்கியத்தில் வார்த்தை ஏது சொல்ல" என்ற வரிகளை சிவாஜி பாராட்டிப் பேசுவார் என்றும், தன்னைச் சந்திக்கும்போதெல்லாம் "வா வாத்தியாரே" என்று சொல்லி இந்தப் பாடலைப் பாடி வரவேற்பார் என்றும் வாலி தெரிவித்தார்.

சிவாஜி படங்களில் இடம்பெற்ற பல தத்துவப் பாடல்களைக் கண்ணதாசன் எழுதியிருந்தாலும், வாலியும் பல வெற்றிப் பாடல்களை எழுதியுள்ளார் என்பது குறிப்பிடத்தக்கது. வாலியை திரையுலகிற்கு அறிமுகப்படுத்தியதில் நடிகர் சிவாஜிக்கு ஒரு முக்கியப் பங்கு உண்டு. வாலியின் திறமையை அறிந்த சிவாஜி, அவரை தனது படங்களில் பயன்படுத்தத் தொடங்கினார். 'கண்ணதாசன்' மற்றும் 'வாலி' என்ற இரண்டு பெரும் கவிஞர்களும் சிவாஜியின் படங்களுக்குப் பாடல்கள் எழுதியுள்ளனர். வாலி, சிவாஜிக்கு எழுதிய பல பாடல்கள் பெரும் வெற்றி பெற்றன.