வெர்ஜின் மியூசிக் - வி கிரியேஷன்ஸ் கூட்டணி: எச்.டி தளத்தில் வெளியாகும் சச்சின் பட பாடல்கள்!

விர்ஜின் மியூசிக் குழுமம் மற்றும் தளபதி விஜய் நடித்த ‘சச்சின்’ உள்ளிட்ட பல வெற்றிப் படங்களை தயாரித்த வி கிரியேஷன்ஸ் இணைந்து முக்கிய கூட்டணியை அறிவித்துள்ளன. இந்த ஒப்பந்தத்தின் மூலம், வி கிரியேஷன்ஸ் படங்களின் பிரபலமான பாடல்களை விர்ஜின் மியூசிக் குழுமத்தின் பரவலான விநியோக தளங்களை பயன்படுத்தி உலகளவில் ரசிகர்களுக்கு கொண்டு செல்ல திட்டமிடப்பட்டுள்ளது.

தமிழ் சினிமாவின் முக்கிய தயாரிப்பு நிறுவனமாக, வி கிரியேஷன்ஸ் கடந்த 30 ஆண்டுகளாக தரமான திரைப்படங்களை வழங்கி வருகிறது. தளபதி விஜய் நடிப்பில் வெளியான‘சச்சின்’ திரைப்படத்தின் 20ம் ஆண்டு சிறப்பு கொண்டாட்டத்தின் ஒரு பகுதியாக, விர்ஜின் மியூசிக் குழுமத்துடன் இணைந்து அதன் புகழ்பெற்ற பாடல்களான ‘கண்மூடி திறக்கும்போது’ மற்றும் ‘வாடி வாடி’ ஆகிய பாடல்களை இந்த கோடைக்காலத்தில் (Summer) எச்.டி (HD) தரத்தில் வெளியிடத் திட்டமிடப்பட்டுள்ளது.

தேவி ஸ்ரீ பிரசாத் இசையமைத்த இந்த பாடல்கள் இன்று வரை ரசிகர்களை வசீகரிக்கின்றன. மேலும், தளபதி விஜயின் குரலில் அமைந்த ‘கண்மூடி திறக்கும்போது’ பாடல் இசை ரசிகர்களிடையே இன்று கூட யூடியூப் மியூசிக் (YouTube Music)ல் பிரபலமாக பரவி வருகிறது. இந்த ஒப்பந்தம் மூலம், ‘சச்சின்’ போன்ற பிளாக்பஸ்டர் திரைப்படங்களின் மெலோடியான மற்றும் குத்து பாடல்களை உலக அளவில் புதிய ரசிகர்களுக்குக் கொண்டு செல்ல முடியும்.

இந்த ஒப்பந்தத்தின் மூலம், வி கிரியேஷன்ஸ் மற்றும் கலைப்புலி இன்டர்நேஷனல் ஆடியோஸ் ஆகிய நிறுவனங்களின் இசை களஞ்சியங்கள் உலகளாவிய இசைப் பிரியர்களை சென்றடையும். “இந்த கூட்டணி தமிழ் சினிமா இசைக்கு புதிய உயர் நிலையை ஏற்படுத்தும்,” என வி கிரியேஷன்ஸ் நிறுவனர் கலைப்புலி எஸ். தாணு கூறினார். விர்ஜின் மியூசிக் குழும இந்தியா மற்றும் தென்னாசியாவின் நாட்டுப்புற மேலாளர் அமித் சர்மா, “இந்த கூட்டணி, பிராந்திய இசையை உலகளவில் உயர்த்தும், மேலும் இசை ரசிகர்களுக்கு புதுமையான அனுபவங்களை அளிக்கும்,” என்று கூறியுள்ளார்.