மிக்ஜாம் புயல்: பாதிப்புகளை எதிர்கொள்ளும் சென்னை தொழில்துறை

வெள்ள பாதிப்பில் இருந்து மீண்டெழுந்த செய்திகளில்,சிப்காட் தொழிற்பூங்காக்களில் உள்ள பெரிய அளவிலான அலகுகள் விரைவாக மீண்டெழுந்தன. அதே நேரத்தில், சிட்கோ பகுதிகளில் உள்ள எம்.எஸ்.எம்.இ-கள் பெரும் இழப்புகளையும் புறக்கணிப்புகளையும் எதிர்கொள்கின்றன.

ஆங்கிலத்தில் படிக்க: Cyclone Michaung: How Chennai’s industrial landscape is dealing with the aftermath

மிக்ஜாம் புயல் பேரிடர் விளைவுகளால் சென்னையின் தொழில்துறை தத்தளிக்கிறது. ஆனால், அனைவரும் சமமாக பாதிக்கப்படவில்லை.

90 சதவீத பெரிய அளவிலான யூனிட்கள் ஏற்கனவே மீண்டும் செயல்படத் தொடங்கியுள்ள நிலையில், பெரும் இழப்புகள் மற்றும் முறையான புறக்கணிப்புக்கு மத்தியில் சிறு குறு மற்றும் நடுத்தர தொழில் நிறுவனங்கள் நெருக்கடிகளில் மூழ்கியுள்ளன. சென்னையில் இரண்டு மீண்டெழுந்த தொழிற்சாலைகளின் கதையை நாங்கள் இங்கே விளக்குகிறோம்.

வெள்ள நீர் பேரிடர் விளைவுகள்

தொழில்துறையின் மையமான மணலியில், ரசாயனம் மற்றும் பெயிண்ட் தொழில்களில் முக்கியமாக 110 நிறுவனங்களைக் கொண்ட விச்சூர் சிட்கோ தொழிற்பூங்கா வெள்ளத்தில் மூழ்கியுள்ளது.

வியாழக்கிழமை (டிசம்பர் 7) நிலவரப்படி, பல இடங்களில் 8 முதல் 10 அடி வரை ஆபத்தான அளவில் வெள்ளம் தேங்கி நிற்கிறது. நூற்றுக்கணக்கான தொழிலாளர்கள் வேலை செய்யும் தொழிற்சாலை முழுவதும் வெள்ளத்தில் மூழ்கி சுமார் 160 கோடி ரூபாய் சேதம் ஏற்பட்டுள்ளது.

எஸ்.ஏ. ஷபீக்கிற்குச் சொந்தமான எஸ்.எம். டவர் டெக்னாலஜிஸ் நிறுவனம் ரூ. 3 கோடி ரூபாய் அளவில் நஷ்டத்தைச் சந்தித்துள்ளது. அவரது ஆலை, ஒரு காலத்தில் சுறுசுறுப்பாக இயங்கிக்கொண்டிருந்தது, இப்போது துத்தநாகப் பகுதி இடிந்து கிடக்கிறது. மேலும், துத்தநாக சாம்பல் சேகரிக்கும் பகுதி இடிந்தது.

1.5 கோடி ரூபாய் மதிப்புள்ள சுமார் 20-30 டன் துத்தநாக சாம்பல், மறுசுழற்சி செய்ய உத்தேசிக்கப்பட்டு, இப்போது வெள்ளத்தின் இடிபாடுகளில் ஒரு பகுதியாக உள்ளது.

ஆனால், விச்சூரின் தொழில்துறை அலகுகளுக்கு, இழப்பு அதோட முடிவடையவில்லை. சென்சார்கள் பொருத்தப்பட்ட விலையுயர்ந்த மின் இயந்திரங்களும் வெள்ளநீரால் பயனற்றுப் போய்விட்டன. இது சென்னையின் முதல் வெள்ளம் இல்லையென்றாலும், புதன்கிழமை ஷபீக் சுட்டிக் காட்டியது போல், இந்த முறை ஏற்பட்ட அழிவின் அளவை ஒப்பிட முடியாது.

சில நிறுவனங்களுக்கு, மீண்டும் புத்துயிர் பெறுவது நிச்சயமற்றது. ஷபீக்கின் அண்டை நிறுவனமான ஸ்ரீராம் கோல்ட் ஃபோர்கிங்ஸ் பிரைவேட் லிமிடெட் நிறுவனத்தை உதாரணமாக எடுத்துக் கொள்ளுங்கள். “இங்கும் அனைத்து மின் இயந்திரங்களும் சேதமடைந்துள்ளன. மின்சாரம் இல்லாத மோசமான சூழ்நிலையை மட்டுமே உள்ளது. இது நிறுவனம் மீண்டெழுதலில் நிச்சயமற்ற சூழலை ஏற்படுத்துகிறது” என்று ஷபீக் கூறினார்.

பெரிய நிறுவனங்கள் மீண்டும் செயல்பட முடியும்

சென்னை மற்றும் அண்டை மாவட்டங்களில் திங்கள்கிழமை ஏற்பட்ட வெள்ளத்தால் ஏற்பட்டுள்ள விரிவான சேதம் குறித்து இந்திய தொழில் கூட்டமைப்பு (சிஐஐ) தலைவர் சங்கர் வானவராயர் தி இந்தியன் எக்ஸ்பிரஸிடம் பேசினார்.

“சோழிங்கநல்லூர் வரையிலான முழுப் பகுதியும் பெரிதும் பாதிக்கப்பட்டுள்ளதால், பழைய மகாபலிபுரம் சாலையில் உள்ள ஐடி தொழிற்சாலைகள் பெரும்பாலும் பாதிக்கப்பட்டுள்ளன. சென்னை, காஞ்சிபுரம், செங்கல்பட்டு மற்றும் திருவள்ளூர் மாவட்டங்களில் செயல்படும் வணிக நிறுவனங்கள் மற்றும் தொழிற்சாலைகளும் புயல் காரணமாக பாதிக்கப்பட்டுள்ளன” என்று வானவராயர் கூறினார்.

பெரிய நிறுவனங்களில், ஐடி நிறுவனங்கள் வெள்ளத்தில் மூழ்கிய வசதிகளால் ஊழியர்களை இரண்டாவது நாளாக இயங்க வைக்காமல் கடுமையாக பாதிக்கப்பட்டுள்ளன.  “முக்கியமான செயல்பாடுகளைத் தவிர்த்து, ஐடி நிறுவனங்கள் முக்கியமாக வீட்டில் இருந்து வேலை செய்யும் முறைகளுக்கு மாறிவிட்டன” என்று அவர் கூறினார்.

குறிப்பிடத்தக்க வகையில், தண்ணீர் தேங்கினாலும், பெரிய நிறுவனங்கள் மற்றும் உற்பத்தியாளர்கள் சிறிய தொழில்களுடன் ஒப்பிடும் போது குறைந்த சேதத்தை எதிர்கொண்டுள்ளனர்.

“டி.வி.எஸ் போன்ற மிகச் சில பெரிய நிறுவனங்கள் கடுமையாக மழை நீர் தேங்கிய பிரச்சினைகளை எதிர்கொண்டதாக தகவல் உள்ளது, மேலும் அவை அனைத்தும் வெள்ளத்தின் முதல் இரண்டு நாட்களைத் தவிர எந்த ஒரு பணிநிறுத்தமும் இல்லாமல் செயல்பட முடிந்தது. பெரிய வணிக நிறுவனங்களும் மீண்டும் செயல்படத் தொடங்கியுள்ளன” என்று மூத்த சி.ஐ.ஐ பொறுப்பாளர் ஒருவர் தி இந்தியன் எக்ஸ்பிரஸிடம் தெரிவித்தார்.

சிறு, குறு, நடுத்தர தொழில் நிறுவனங்கள் (எம்.எஸ்.எம்.இ) கடும் பாதிப்பு

தமிழ்நாடு சிறு மற்றும் குறு தொழில்கள் சங்கத்தின் (டான்ஸ்டியா) தலைவர் கே மாரியப்பன் கூறுகையில், அவர்களின் இழப்பு சுமார் 1000 கோடி ரூபாய் இருக்கலாம்.

“சென்னை பிராந்தியத்தில் உள்ள அனைத்து சிறு, குறு, நடுத்தர தொழில் நிறுவனங்களும் (எம்.எஸ்.எம்.இ) பெரும் சேதத்தை சந்தித்துள்ளன. கிண்டி மற்றும் அம்பத்தூர் தொழிற்பேட்டைகள் கடுமையாக பாதிக்கப்பட்டுள்ளன. தண்ணீர் தேங்குவதால், பல யூனிட்களில் இருந்த பல கோடி மதிப்பிலான இயந்திரங்கள் மற்றும் பொருட்கள் சேதமடைந்துள்ளன. பல இடங்களில் பணிகள் தொடங்க குறைந்தபட்சம் 2-3 வாரங்கள் ஆகலாம்” என்று 1000 கோடி ரூபாய் இழப்பீடு கேட்டு முதல்வர் மு.க.ஸ்டாலினுக்கு மாரியப்பன் கடிதம் எழுதியுள்ளார்.

இடைவிடாத பெருவெள்ளம் அம்பத்தூர், திருமுடிவாக்கம், பெருங்குடி, திருமழிசை போன்ற தொழிற்பேட்டைகளில் செயல்பாடுகளை ஸ்தம்பிக்க வைத்துள்ளது.

திருமழிசை தொழிற்பேட்டை (TIE), அதன் எல்லைக்குள் 300-க்கும் மேற்பட்ட யூனிட்களையும், வெளியே கூடுதலாக 600 யூனிட்களையும் கொண்டுள்ளதால், அந்தப் பகுதி முழுவதும் 3-4 அடி தண்ணீருக்கு அடியில் மூழ்கியதால், பேரிடரின் மிகப்பெரிய பாதிப்பைச் சந்தித்துள்ளது. அம்பத்தூர் தொழிற்பேட்டையின் நிலைமை சிறப்பாக இல்லை, அம்பத்தூர் தொழிற்பேட்டை உற்பத்தியாளர்கள் சங்கம் (AIEMA) பேரழிவு சேதத்தைக் குறிப்பிட்டு உடனடியாக தலையிட ஒரு அவநம்பிக்கையான வேண்டுகோளை விடுத்துள்ளது, இயந்திரங்கள், மூலப்பொருட்கள் மற்றும் முடிக்கப்பட்ட பொருட்கள் தண்ணீரில் மூழ்கியுள்ளன.

தேசிய பேரிடர் மேலான்மை ஆணையத்தின் கீழ் நிவாரணம் பெற முடியாத எம்.எஸ்.எம்.இ-கள் 

புயல் மற்றும் வெள்ளம் போன்ற இயற்கை பேரிடர்களால் பாதிக்கப்பட்ட எம்.எஸ்.எம்.இ-கள், தேசிய பேரிடர் மேலாண்மை ஆணையத்தின் கீழ் இழப்பீடு பெற தகுதியான பட்டியலில் சேர்க்கப்படாததால், எந்த இழப்பீடும் பெற முடியாது என்று மாரியப்பன் கூறினார்.

“இது தொழில்துறைகளுக்கு ஒரு பெரிய பின்னடைவு மற்றும் நாங்கள் பட்டியலில் சேர்க்கப்பட வேண்டும். 2018 ஆம் ஆண்டு கஜா புயல் காரணமாக நாகப்பட்டினம் மாவட்டத்தில் நூற்றுக்கணக்கான எம்.எஸ்.எம்.இ-கள் வெள்ள சேதத்தால் பாதிக்கப்பட்டதாகவும், இன்று வரை மத்திய அரசு அவர்களுக்கு எந்த இழப்பீடும் வழங்கவில்லை என்றும் அவர் கூறினார். எம்.எஸ்.எம்.இ நிறுவனங்களை நிதியுதவி பெற தகுதியான நிறுவனங்களின் பட்டியலில் சேர்க்க தமிழக அரசும், மத்திய அரசும் நடவடிக்கை எடுக்க வேண்டுமென கேட்டுக்கொள்கிறோம்” என்று கூறினார்.

எனவே, பெரிய தொழில்துறை அலகுகள் மற்றும் எம்.எஸ்.எம்.இ-களின் அவலநிலையில் இப்போது ஒரு முற்றிலும் மாறுபாடு வெளிப்பட்டுள்ளது.

மாநில அரசின் கூற்றுப்படி, தமிழ்நாடு மாநிலத் தொழில்கள் மேம்பாட்டுக் கழகம் (சிப்காட்) நிர்வகிக்கும் தொழிற்பேட்டைகளில் உள்ள 90 சதவீத நிறுவனங்கள் புதன்கிழமை முதல் மீண்டும் செயல்படத் தொடங்கியுள்ளன. இந்த விரைவான மீட்சிக்கு நிலம், மின்சாரம், நீர், சாலைகள் மற்றும் தகவல் தொடர்பு நெட்வொர்க்குகள் போன்ற வலுவான உள்கட்டமைப்பு வசதிகள் முதன்மையாக பெரிய மற்றும் நடுத்தர அளவிலான தொழில்களுக்கு உதவுகின்றன.

இருப்பினும், இதற்கு நேர்மாறாக, தமிழ்நாடு சிறுதொழில் வளர்ச்சிக் கழகத்தின் (சிட்கோ) கட்டுப்பாட்டின் கீழ் உள்ள எம்.எஸ்.எம்.இ-கள் கடுமையான சவால்களை எதிர்கொண்டுள்ளன. மேலும், வெள்ளத்தின் பாதிப்புகளைச் சுமந்துள்ளன. இந்த அலகுகள், பெரும்பாலும் அவற்றில் பெரிய நிறுவனங்களின் விரிவான உள்கட்டமைப்பு நன்மைகள் இல்லாததால், அதிக சேதங்கள் மற்றும் இடையூறுகளை சந்தித்துள்ளன.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“