8-வது மத்திய ஊதியக் குழு: வழிகாட்டு விதிமுறைகளுக்கு அரசு ஒப்புதல்; ஊழியர்கள், ஓய்வூதியதாரர்களுக்கு எப்போது சம்பள உயர்வு?

8-வது மத்திய ஊதியக் குழுவின் பரிந்துரைக்கான வழிகாட்டு விதிமுறைகளுக்கு (Terms of Reference - ToR) மத்திய அரசு செவ்வாய்க்கிழமை (அக்.28) அன்று ஒப்புதல் அளித்துள்ளது. இந்த ஆண்டு ஜனவரியில் இந்த கமிஷன் அமைக்கப்படுவதாக அறிவிக்கப்பட்ட நிலையில், தற்போது இந்த ஒப்புதல் வழங்கப்பட்டுள்ளது. இதன் மூலம், சுமார் 50 லட்சம் மத்திய அரசு ஊழியர்கள் மற்றும் 69 லட்சம் ஓய்வூதியதாரர்களின் ஊதியம், ஓய்வூதியம் மற்றும் படைகளை திருத்தியமைப்பதற்கான பாதை தெளிவாகியுள்ளது. இந்த ஊதிய உயர்வு அடுத்த ஆண்டு ஜனவரி 1 முதல் அமலுக்கு வரும்.

குழுவின் தலைவர்கள் மற்றும் உறுப்பினர்கள்

8-வது மத்திய ஊதியக் குழுவின் தலைவராக, உச்ச நீதிமன்ற முன்னாள் நீதிபதியும், பிரஸ் கவுன்சில் ஆஃப் இந்தியாவின் தலைவருமான நீதிபதி ரஞ்சனா பிரகாஷ் தேசாய் நியமிக்கப்பட்டுள்ளார். இக்குழுவில், ஐ.ஐ.எம் பெங்களூரு பேராசிரியர் புலக் கோஷ் (பகுதி நேர உறுப்பினர்) மற்றும் பெட்ரோலியத் துறை செயலாளர் பங்கஜ் ஜெயின் (உறுப்பினர்-செயலாளர்) ஆகியோர் இடம்பெற்றுள்ளனர்.

ஊதியக் குழுவின் பங்கு

மத்திய அரசு ஊழியர்களின் சம்பள கட்டமைப்பை திருத்தி அமைக்கவும், ஓய்வூதிய கொடுப்பனவுகளை தீர்மானிக்கவும் 10 ஆண்டுகளுக்கு ஒரு முறை ஊதியக் குழு மத்திய அரசால் அமைக்கப்படுகிறது. 1947 முதல் இதுவரை 7 ஊதியக் குழுக்கள் அமைக்கப்பட்டுள்ளன. மத்திய அரசு ஊழியர்களின் சம்பளம் மற்றும் பிற சலுகைகளில் மாற்றங்களைப் பரிந்துரைப்பதற்காக 8வது மத்திய ஊதியக் குழு அமைக்கப்படும் என இந்த ஆண்டு ஜனவரியில் அரசு அறிவித்தது. பல்வேறு அமைச்சகங்கள், மாநில அரசுகள் மற்றும் கூட்டு ஆலோசனைக் குழுவின் (JCM) பணியாளர் தரப்பு ஆகியவற்றுடன் கலந்தாலோசித்த பின் இந்த வழிகாட்டு விதிமுறைகள் இறுதி செய்யப்பட்டுள்ளன. இந்த கமிஷன் தனது பரிந்துரைகளை 18 மாதங்களுக்குள் சமர்ப்பிக்கும்.

குழுவிற்கான வழிகாட்டுதல்கள் (ToR)

இந்த 8வது ஊதியக் குழு, பின்வரும் காரணங்களைக் கருத்தில் கொண்டு தனது பரிந்துரைகளை வழங்க வேண்டும். நாட்டின் தற்போதைய பொருளாதார நிலைமைகள், நிதிப் பற்றாக்குறையைக் கட்டுப்படுத்த வேண்டியதன் அவசியம் (Fiscal Prudence), மேம்பாட்டுச் செலவினங்கள் மற்றும் மக்கள் நலத் திட்டங்களுக்குப் போதுமான வளங்கள் கிடைப்பதை உறுதி செய்தல், இந்த பரிந்துரைகள் மாநில அரசு நிதிகளில் ஏற்படுத்தும் தாக்கம் (ஏனெனில் மாநில அரசுகளும் வழக்கமாக சில மாற்றங்களுடன் மத்திய ஊதியக் குழுவின் பரிந்துரைகளை ஏற்றுக்கொள்கின்றன). மத்திய பொதுத்துறை நிறுவனங்கள் மற்றும் தனியார் துறையில் உள்ள ஊழியர்களுக்குக் கிடைக்கும் தற்போதைய ஊதியக் கட்டமைப்பு, சலுகைகள் மற்றும் பணிச்சூழல்.

7வது ஊதியக் குழுவின் வழிகாட்டு விதிமுறைகளே பெரும்பாலும் தொடர்ந்தாலும், இம்முறை ஒரு கூடுதல் நிபந்தனை சேர்க்கப்பட்டுள்ளது. அது: "பங்களிப்பு இல்லாத ஓய்வூதியத் திட்டங்களின் நிதிச்சுமை" (unfunded cost).

இந்த செய்தியை ஆங்கிலத்தில் படிக்க

பழைய ஓய்வூதியத் திட்டத்தை (OPS) மீண்டும் அமல்படுத்த வேண்டும் என்ற கோரிக்கைகள் நீடித்து வரும் பின்னணியில் இந்த நிபந்தனை முக்கியத்துவம் பெறுகிறது. (OPS என்பது ஜனவரி 1, 2004-க்கு முன் பணியில் சேர்ந்த அரசு ஊழியர்களுக்குக் கிடைத்த ஒரு திட்டமாகும். இதில், ஊழியர்களின் பங்களிப்பு இன்றி, அவர்கள் கடைசியாக வாங்கிய சம்பளத்தில் 50% மாதாந்திர ஓய்வூதியமாக வழங்கப்பட்டது).

ஜனவரி 2004-க்குப் பின் பணியில் சேர்ந்தவர்களுக்குப் பொருந்தும் தேசிய ஓய்வூதியத் திட்டத்தில் (NPS), பங்களிப்பு வரையறுக்கப்பட்டுள்ளது, ஆனால் பலன்கள் சந்தை அபாயங்களுக்கு உட்பட்டவை. கடந்த ஆண்டு, அரசு சீர்திருத்தப்பட்ட ஒருங்கிணைந்த ஓய்வூதியத் திட்டத்தை (Unified Pension Scheme - UPS) அறிவித்தது. இது வரையறுக்கப்பட்ட உறுதியான ஓய்வூதியம், குடும்ப ஓய்வூதியம் மற்றும் குறைந்தபட்ச தகுதிக் காலத்திற்கு குறைவான சேவை உள்ளவர்களுக்கு குறைந்தபட்ச ஓய்வூதியம் ஆகியவற்றை வழங்குகிறது.

எப்போது அமலுக்கு வரும்? 

8வது மத்திய ஊதியக் குழுவின் பரிந்துரைகள் ஏப்ரல் 2027 இல் அறிவிக்கப்படும் என எதிர்பார்க்கப்படுகிறது. இருப்பினும், இந்தப் பரிந்துரைகள் ஜனவரி 1, 2026 முதல் முன்தேதியிட்டு (retrospectively) அமலுக்கு வரும். இதன்மூலம், பரிந்துரைகள் அமல்படுத்தப்படும்போது, ஜனவரி 2026 முதலே சம்பள உயர்வு மற்றும் ஓய்வூதிய உயர்வுக்கான நிலுவைத் தொகைகள் (arrears) வழங்கப்படும். இருப்பினும், படிகள் (Allowances) பிற்கால தேதியிலிருந்தே (prospectively) மாற்றி அமைக்கப்பட வாய்ப்புள்ளது. (கடந்த காலங்களில், 5வது ஊதியக் குழு பரிந்துரைகள் அமலாக 19 மாதங்களும், 6வது ஊதியக் குழுவிற்கு 32 மாதங்களும் ஆனது. 7வது ஊதியக் குழு பரிந்துரைகள் 6 மாதங்களுக்குள் அமல்படுத்தப்பட்டன).

அரசுக்கு ஏற்படும் நிதிச் சுமை

ஊதியக் குழுவின் பரிந்துரைகள் அரசாங்கத்தின் வருவாய்ச் செலவினங்களில் பெரிய தாக்கத்தை ஏற்படுத்தும். 2025-26 ஆம் ஆண்டில் ஊதியம், ஓய்வூதியம் மற்றும் படைகளுக்காக மத்திய அரசுக்கு ரூ. 7 லட்சம் கோடிக்கு மேல் செலவாகும் என மதிப்பிடப்பட்டுள்ளது, இது வருவாய் செலவினத்தில் சுமார் 18% ஆகும். முந்தைய 7வது மத்திய ஊதியக் குழு, ஊதியம், படிகள் மற்றும் ஓய்வூதியத்தில் 23.55% உயர்வுக்கு பரிந்துரைத்தது. இதனால் மத்திய அரசுக்கு ஆண்டுக்கு ரூ. 1.02 லட்சம் கோடி கூடுதல் செலவு ஏற்பட்டது.

அப்போது, 'பே பேண்ட்' (Pay bands) மற்றும் 'கிரேடு பே' (Grade pay) முறைக்கு பதிலாக 'பே மேட்ரிக்ஸ்' (Pay matrix) முறை கொண்டுவரப்பட்டது. குறைந்தபட்ச மட்டத்தில் புதிதாகப் பணியமர்த்தப்பட்ட ஊழியரின் குறைந்தபட்ச ஊதியம் ரூ. 7,000ல் இருந்து ரூ. 18,000 ஆக உயர்த்தப்பட்டது. அதே சமயம், புதிதாக நியமிக்கப்பட்ட 'கிளாஸ் I' அதிகாரியின் சம்பளம் ரூ. 56,100 ஆக நிர்ணயிக்கப்பட்டது. கடந்த முறையின் உயர்வை வைத்துப் பார்க்கும்போது, 8வது ஊதியக் குழுவின் கீழ் குறைந்தபட்ச ஊதியம் ரூ. 46,000-க்கு மேல் உயரக்கூடும் என எதிர்பார்க்கப்படுகிறது.