Explained: Revised guidelines for management of Covid-19 in children and adolescents: 18 வயதுக்குட்பட்ட குழந்தைகள் மற்றும் இளம் பருவத்தினருக்கு கொரோனா சிகிச்சைக்கான சுகாதார அமைச்சகத்தின் திருத்தப்பட்ட வழிகாட்டுதல்கள், நோய்த்தொற்றின் தீவிரத்தைப் பொருட்படுத்தாமல், ஆன்டிவைரல்கள் அல்லது மோனோக்ளோனல் ஆன்டிபாடிகளைப் பயன்படுத்துவதை தவிர்க்க அறிவுறுத்தியுள்ளன. மேலும், வழிகாட்டுதல்களின்படி ஐந்து வயதுக்குட்பட்ட குழந்தைகள் முகக்கவசம் அணியத் தேவையில்லை.
திருத்தப்பட்ட வழிகாட்டுதல்கள் என்ன?
ஜனவரி 20 அன்று வெளியிடப்பட்ட புதிய வழிகாட்டுதல்கள், ஜூன் 16, 2021 அன்று வெளியான முந்தைய பதிப்பை முறியடித்துள்ளன. 18 வயதுக்குட்பட்ட குழந்தைகள் மற்றும் இளம் பருவத்தினருக்கு கொரோனா சிகிச்சைக்கான விரிவான வழிகாட்டுதல்கள், தற்போது அதிகம் பரவி வரும் ஒமிக்ரான் மாறுப்பாட்டைக் கருத்தில் கொண்டு நிபுணர்கள் குழுவால் மதிப்பாய்வு செய்யப்பட்டது. மற்ற நாடுகளில் இருந்து கிடைக்கும் தகவல்கள், ஓமிக்ரான் மாறுபாட்டால் ஏற்படும் பாதிப்பு குறைவான கடுமையானது என்று கூறுகின்றன; இருப்பினும், தற்போதைய அலை உருவாகி வருவதால், கவனமாகக் கண்காணிப்பது அவசியம். மத்திய சுகாதாரம் மற்றும் குடும்ப நல அமைச்சகத்தின்படி, இந்த வழிகாட்டுதல்கள் மாறுதலுக்கு உட்பட்டது, மேலும் அவை மதிப்பாய்வு செய்யப்பட்டு புதிய சான்றுகள் கிடைப்பதைப் பொறுத்து புதுப்பிக்கப்படும். ஒமிக்ரான் மாறுபாடு தொடர்பாக அடிக்கடி கேட்கப்படும் கேள்விகள் குறித்து அமைச்சகத்தின் வழிகாட்டுதல்களில், லேசான அல்லது அறிகுறியற்ற கொரோனா நோயாளிகளை வீட்டிலேயே தனிமைப்படுத்துவதற்கான திருத்தப்பட்ட வழிகாட்டுதல்கள் மற்றும் 15-18 வயதுக்குட்பட்ட குழந்தைகளுக்கு தடுப்பூசி போடுவது ஆகியவை குறித்தும் கவனம் செலுத்தப்பட்டுள்ளது.
ஆன்டிவைரல்கள் அல்லது மோனோக்ளோனல் ஆன்டிபாடிகளுக்கான பரிந்துரைகள் என்ன?
நோய்த்தொற்றின் தீவிரத்தைப் பொருட்படுத்தாமல், 18 வயதுக்குட்பட்ட குழந்தைகளுக்கு ஆன்டிவைரல்கள் அல்லது மோனோக்ளோனல் ஆன்டிபாடிகளின் பயன்பாடு பரிந்துரைக்கப்படவில்லை. நோயின் செயல்திறன் மற்றும் பாதுகாப்பு தரவு இல்லாத நிலையில், 18 வயதுக்குட்பட்ட குழந்தைகளுக்கு ரெம்டெசிவிர், மோல்னுபிரவீர், ஃபாவிபிரவிர், ஃப்ளூவோக்சமைன் மற்றும் மோனோக்ளோனல் ஆன்டிபாடிகளான சோட்ரோவிமாப், காசிரிவிமாப் + இம்டெவிமாப் போன்ற வைரஸ் தடுப்பு மருந்துகள் பரிந்துரைக்கப்படவில்லை,” என்பது திருத்தப்பட்ட வழிகாட்டுதல்களின் ஒரு பகுதியாக செய்யப்பட்ட குறிப்பிட்ட பரிந்துரையாகும்.
சிகிச்சையில் ஏதேனும் மாற்றம் உள்ளதா?
கொரோனா ஒரு வைரஸ் தொற்று மற்றும் சிக்கலற்ற COVID-19 நோய்த்தொற்றை தடுப்பதில் நுண்ணுயிர் எதிர்ப்பிகளுக்கு எந்தப் பங்கும் இல்லை. மொத்தத்தில் குழந்தைகளுக்கான சிகிச்சை வழிகாட்டுதல்கள் அப்படியே உள்ளது. காய்ச்சலுக்கான முக்கிய சிகிச்சையானது பாராசிட்டமால் 10-15மிகி/கிலோ/டோஸ் கொடுப்பதாகும், இது ஒவ்வொரு 4-6 மணி நேரத்திற்கும் மீண்டும் கொடுக்கப்பட வேண்டும். இருமல், தொண்டை வறட்சியைத் தணிக்கும் மருந்துகள் மற்றும் சூடான உப்பு நீர் மூலம் வாய் கொப்பளிப்பது வயதான குழந்தைகள் மற்றும் இளம்பருவத்தினருக்கு பரிந்துரைக்கப்படுகிறது. நீரேற்றம் மற்றும் சத்தான உணவை பராமரிக்க வாய்வழி திரவங்களை உறுதி செய்வது பரிந்துரைகளில் ஒன்றாகும். லேசான நிகழ்வுகளுக்கு வேறு எந்த கொரோனா சிறப்பு மருந்துகளும் தேவையில்லை என்று மகாராஷ்டிரா குழந்தைகளுக்கான கொரோனா பணிக்குழு உறுப்பினர் டாக்டர் ஆர்த்தி கினிகர் கூறினார்.
அறிகுறியற்ற / லேசான நிகழ்வுகளுக்கு வீட்டில் தனிமைப்படுத்தல்
முன்னணி குழந்தை மருத்துவர் டாக்டர் உமேஷ் வைத்யா, அறிகுறிகள் மிகவும் லேசானவை என்றும், மூன்று முதல் ஐந்து நாட்களுக்கு மேல் நோய் நீடிக்காது என்றும் கூறினார். குழந்தைகளில் இருமல், சளி மற்றும் காய்ச்சல் ஆகியவை முக்கிய அறிகுறிகளாகும். மூச்சுத்திணறலை விட தொண்டை புண் அறிகுறிகள் மிகவும் முக்கியத்துவம் வாய்ந்தவை என்று டாக்டர் உமேஷ் வைத்யா கூறினார். கொரோனா இருக்கிறதா அல்லது கொரோனா அல்லாததா என்பதை மருத்துவப் பரிசோதனை மூலம் வேறுபடுத்துவது சவாலானதாக இருந்தாலும், பெரும்பாலான குழந்தை மருத்துவர்கள் குடும்பத்தில் யாருக்காவது அறிகுறி உள்ளதா என்கிற சூழ்நிலை ஆதாரங்களையும் சரிபார்க்கிறார்கள். இருப்பினும் லேசான நிகழ்வுகளுக்கு RT-PCR சோதனைகள் பரிந்துரைக்கப்படவில்லை. ஒரு வாரம் தனிமையில் இருக்க குடும்பங்களுக்கு அறிவுறுத்தியுள்ளதாக பல குழந்தைகள் நல மருத்துவர்கள் தெரிவித்தனர். இருப்பினும் மருத்துவமனையில் அனுமதிக்கப்பட்டவர்களுக்கு கொரோனா கண்டறிதல் சோதனைகள் தேவை.
5 வயதுக்குட்பட்ட குழந்தைகளுக்கான முகக்கவசங்கள் பற்றி என்ன?
ஐந்து வயதுக்குட்பட்ட குழந்தைகளுக்கு முகக்கவசங்கள் பரிந்துரைக்கப்படவில்லை. அவர்கள் அதை சரியாக அணிவதில்லை என்றும், அடிப்படை ஆஸ்துமா இருந்தாலோ அல்லது விளையாடிக் கொண்டிருந்தாலோ சுவாசிப்பதில் சிக்கல்கள் இருக்கலாம் என்றும் நிபுணர்கள் தெரிவித்தனர். சில பெற்றோர்கள் கண்டிப்புடன், குழந்தையை கட்டாயப்படுத்தி முகக்கவசத்தை அணியச் செய்யலாம், எனவே ஐந்து வயதுக்குட்பட்ட குழந்தை முகக்கவசம் அணிவது கட்டாயமில்லை. பெற்றோர்/பாதுகாவலர்களின் நேரடி மேற்பார்வையின் கீழ் 6-11 வயதுக்குட்பட்ட குழந்தைகள் முகக்கவசத்தைப் பாதுகாப்பாகவும் சரியானதாகவும் பயன்படுத்தும் குழந்தையின் திறனைப் பொறுத்து முகக்கவசத்தை அணியலாம். 12 வயது மற்றும் அதற்கு மேற்பட்ட குழந்தைகள் பெரியவர்களைப் போலவே முகக்கவத்தை அணிய வேண்டும். முகக்கவசங்களை கையாளும் போது கைகளை சோப்பு மற்றும் தண்ணீர் அல்லது ஆல்கஹால் அடிப்படையிலான கை தேய்த்தல் மூலம் சுத்தமாக வைத்திருப்பதை உறுதி செய்வது முக்கியம்.
ஆன்டிகோகுலண்டுகளின் பயன்பாடு திருத்தப்பட்டது
ஆன்டிகோகுலண்டுகளின் பயன்பாடு திருத்தப்பட்டுள்ளது மற்றும் ஸ்டெராய்டுகள் பயன்படுத்தப்பட்டால், அவை மருத்துவ முன்னேற்றத்தின் அடிப்படையில் 10-14 நாட்களுக்குள் குறைக்கப்பட வேண்டும். பிந்தைய கொரோனா பராமரிப்புக்கான புதிய பிரிவும் சேர்க்கப்பட்டுள்ளது. கடுமையான மேற்பார்வையின் கீழ் மருத்துவமனையில் அனுமதிக்கப்பட்ட கடுமையான மற்றும் மோசமான கொரோனா பாதிப்புகளில் மட்டுமே ஸ்டீராய்டு பயன்பாடுகள் குறிப்பிடப்படுகின்றன. கார்டிகோஸ்டீராய்டுகளின் அறிகுறிகள் மற்றும் பரிந்துரைக்கப்பட்ட அளவுகள், விரைவான முற்போக்கான மிதமான மற்றும் அனைத்து கடுமையான நிகழ்வுகளிலும் பயன்படுத்தப்படக்கூடிய வழிகாட்டுதல்களில் கொடுக்கப்பட்டுள்ளன. வழிகாட்டுதல்கள் தினசரி மருத்துவ மதிப்பீடு அடிப்படையில் 5-7 நாட்களுக்குப் பயன்படுத்தவும், பின்னர் 10-14 நாட்கள் வரை குறைக்கவும் பரிந்துரைக்கின்றன. அறிகுறிகள் தோன்றிய முதல் 3-5 நாட்களில் ஸ்டெராய்டுகளைத் தவிர்க்கவும், வழிகாட்டுதல்கள் கூறுகின்றன, ஏனெனில் இது வைரஸ் உதிர்தலை நீடிக்கிறது. குறைந்த மூலக்கூறு எடை ஹெபரின் (எதிர்ப்பு உறைதல் எதிர்ப்பு) நோய்த்தடுப்பு டோஸ் திருத்தப்பட்டுள்ளது.
MIS-C கண்டறியும் போது எச்சரிக்கையாக இருக்கவும்
குழந்தைகளில் மல்டி சிஸ்டம் இன்ஃப்ளமேட்டரி சிண்ட்ரோம் (எம்ஐஎஸ்-சி) என்பது ஒரு புதிய நோய்க்குறியாகும், இது இடைவிடாத 38 டிகிரி செல்சியஸ்க்கும் அதிகமான காய்ச்சல் மற்றும் SARS-CoV-2 உடனான தொற்றுநோயியல் தொடர்பு ஆகியவற்றால் வகைப்படுத்தப்படுகிறது. MIS-C நோயறிதலுக்கு, COVID ஆன்டிபாடிகளின் தனிமைப்படுத்தப்பட்ட அதிகரிப்பை கண்டறியும்போது எச்சரிக்கையாக இருக்க வேண்டும். MIS-C ஐக் கண்டறிவதற்கான C- ரியாக்டிவ் புரோட்டீன் CRP நிலை> 5mg/dL ஆக மாற்றியமைக்கப்பட்டுள்ளது. முன்பு இது 2mg/dL க்கும் அதிகமாக இருந்தது.
கொரோனா சிகிச்சைக்குப் பின்
அறிகுறியற்ற தொற்று அல்லது லேசான நோயால் பாதிக்கப்பட்ட குழந்தைகள் வழக்கமான குழந்தை பராமரிப்பு, தகுந்த தடுப்பூசி, ஊட்டச்சத்து ஆலோசனை மற்றும் பின்தொடர்வதில் உளவியல் ஆதரவைப் பெற வேண்டும். மேலே கூறப்பட்டவை தவிர, மிதமான மற்றும் தீவிரமான கொரோனா உள்ள குழந்தைகளுக்கு, மருத்துவமனையிலிருந்து வெளியேற்றப்படும் போது, பெற்றோர்கள்/பராமரிப்பாளர்களிடம் குழந்தைகளுக்கு சுவாசக் கோளாறுகள் தொடர்ந்து இருப்பது அல்லது மோசமடைந்து வருவதைக் கண்காணித்து, குழந்தையை மீண்டும் மருத்துவமனைக்கு கொண்டுவருவதற்கான அறிகுறிகளை விளக்க வேண்டும். மருத்துவமனையில் தங்கியிருக்கும் போது அல்லது அதன்பிறகு ஏதேனும் குறிப்பிட்ட உறுப்பு செயலிழப்பு ஏற்படும் குழந்தைகள் தகுந்த கவனிப்பைப் பெற வேண்டும்.
தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil
