ஐகோர்ட்களின் ஜாமீன் நிபந்தனைகளை ரத்து செய்த உச்ச நீதிமன்றம்; வழக்குகளின் பின்னணி இங்கே

Khadija Khan

அரசியல் நடவடிக்கைகளில் ஈடுபடுவதைத் தடுக்கும் வகையில் ஜாமீன் நிபந்தனை விதிப்பது அரசியல் சாசனத்தின் அடிப்படை உரிமைகளை மீறுவதாக உச்ச நீதிமன்றம் அண்மையில் தீர்ப்பளித்தது.

ஆங்கிலத்தில் படிக்க: Explained: When the Supreme Court stepped in against bail conditions imposed by various high courts

அவ்வாறு செய்யும்போது, நீதிபதிகள் பி.ஆர்.கவாய் மற்றும் சந்தீப் மேத்தா ஆகியோர் அடங்கிய பெஞ்ச், பா.ஜ.க தலைவர் சிபா சங்கர் தாஸுக்கு முந்தைய உத்தரவில் ஒரிசா உயர்நீதிமன்றம் விதித்த அத்தகைய நிபந்தனையை ரத்து செய்தது. இந்த வழக்கில் நீதிமன்றம் என்ன கூறியது, இதற்கு முன்பு ஜாமீன் நிபந்தனைகள் எப்போது ரத்து செய்யப்பட்டது? 

முதலில், ஜாமீன் மற்றும் ஜாமீன் நிபந்தனைகள் எவ்வாறு செயல்படுகின்றன

ஜாமீன் என்பது விசாரணை அல்லது மேல்முறையீட்டுக்காக காத்திருக்கும் நபரின் தற்காலிக சிறை விடுதலையைக் குறிக்கிறது. நீதிமன்றத்தில் அவர் சரியான நேரத்தில் ஆஜராகுவதற்கான உத்தரவாதமாக, ஒரு சட்ட அதிகாரத்தின் முன் பாதுகாப்பை வைப்பதன் மூலம் இது பாதுகாக்கப்படுகிறது.

ஒரு நபரை ஜாமீனில் விடுவிப்பதற்கான தனது விருப்புரிமையைப் பயன்படுத்தும்போது, "நியாயமாக" செயல்படுவதை நீதிமன்றம் உறுதி செய்ய வேண்டும், என 'கிலாரி எதிர் உ.பி. அரசு' (2009) வழக்கில் உச்ச நீதிமன்றம் குறிப்பிட்டது. ஜாமீன் வழங்கும் போது மேல்முறையீட்டு நீதிமன்றம் அதன் காரணங்களை பதிவு செய்ய வேண்டும் என்றும் தீர்ப்பளித்தது.

கூடுதலாக, CrPC இன் பிரிவு 439, காவலில் உள்ள எந்தவொரு குற்றஞ்சாட்டப்பட்ட நபரையும் ஜாமீனில் விடுவிக்க உயர் நீதிமன்றம் அல்லது அமர்வு நீதிமன்றம் அறிவுறுத்தலாம் என்று கூறுகிறது.

பிரிவு 437(3) இன் நோக்கங்களுக்காகத் தேவையென அவர்கள் கருதும் எந்தவொரு நிபந்தனையையும் விதிக்கவும் இது அனுமதிக்கிறது, இது ஏழு ஆண்டுகள் அல்லது அதற்கு மேற்பட்ட சிறைத்தண்டனை விதிக்கக்கூடிய குற்றங்களின் வழக்குகளில் விதிக்கப்படும் நிபந்தனைகளை பட்டியலிடுகிறது. குற்றம் சாட்டப்பட்டவர் இதேபோன்ற குற்றத்தைச் செய்யவில்லை என்பதை உறுதிப்படுத்துவதும், வழக்குடன் தொடர்புடைய நபர்களை அவர் அச்சுறுத்துவதில்லை என்பதை உறுதிப்படுத்துவதும் இதில் அடங்கும்.

ஒரிசா உயர்நீதிமன்ற உத்தரவு என்ன?

‘சிபா சங்கர் தாஸ் @ பிந்து எதிர் ஒடிசா அரசு’ என்ற வழக்கில் பா.ஜ.க தலைவரும் பெர்ஹாம்பூர் முன்னாள் மேயருமான சிபா சங்கர் தாஸ் தாக்கல் செய்த மனுவை உச்ச நீதிமன்றம் விசாரித்தது. ஒரிசா உயர்நீதிமன்றத்தின் முந்தைய உத்தரவை எதிர்த்து அவர் மேல்முறையீடு செய்தார்.

ஜனவரி 18 அன்று, கிரிமினல் வழக்கில் தனக்கு ஜாமீன் வழங்குவதற்காக ஆகஸ்ட் 11, 2022 அன்று விதிக்கப்பட்ட நிபந்தனையைத் திரும்பப் பெறுவதற்கான சிபா சங்கர் தாஸின் மனுவை உயர்நீதிமன்றம் நிராகரித்தது. மேல்முறையீடு செய்பவர் பொதுவெளியில் எந்தவித விரும்பத்தகாத சூழ்நிலையையும் உருவாக்கக் கூடாது மற்றும் நேரடியாகவோ அல்லது மறைமுகமாகவோ எந்த அரசியல் நடவடிக்கைகளிலும் ஈடுபடக் கூடாது என்று உயர் நீதிமன்றத்தின் நிபந்தனை கூறியது.

பெர்ஹாம்பூர் முனிசிபல் கார்ப்பரேஷனின் மேயராக முன்னர் தேர்ந்தெடுக்கப்பட்ட ஒரு அரசியல் நபர் என்பதால், வரவிருக்கும் பொதுத் தேர்தல்களைக் கருத்தில் கொண்டு அரசியல் நடவடிக்கைகளில் பங்கேற்க அனுமதிக்க வேண்டும் என்று சிபா சங்கர் தாஸ் உயர்நீதிமன்றத்தில் வாதிட்டார்.

இருப்பினும், மாநில அரசு சிபா சங்கர் தாஸின் மனுவை எதிர்த்து, அவர் ஜாமீனில் விடுவிக்கப்பட்ட பிறகு, சிபா சங்கர் தாஸ் புதிய வழக்குகளில் ஈடுபட்டுள்ளார் மற்றும் அவருக்கு எதிராக ஒரு "கொலை முயற்சி" மேற்கொள்ளப்பட்டதாகவும், அங்கு அவரது வாகனத்தின் மீது வெடிகுண்டு வீசப்பட்டது என்றும் வாதிட்டது. சிபா சங்கர் தாஸின் மனுவை எதிர்த்ததோடு, அக்டோபர் 2023 இல் அவருக்கு எதிராகப் பதிவு செய்யப்பட்ட இரண்டு புதிய எஃப்.ஐ.ஆர்களை மேற்கோள் காட்டி உள்ளூர் காவல் ஆய்வாளரின் வாக்குமூலத்தையும் நீதிமன்றத்தில் அரசாங்கம் சமர்பித்தது.

மனுதாரர் "எப்பொழுதும் உயிருக்கு அச்சுறுத்தலில் இருக்கிறார்" என்பதைக் கவனித்த நீதிபதி பி.பி. ரூட்ரே "இந்த நேரத்தில், நிபந்தனையை நீக்குவது, எல்லா நிகழ்வுகளிலும் நிர்வாகத்திற்கு போதுமான சிரமங்களை ஏற்படுத்தும்" என்று கூறினார். சிபா சங்கர் தாஸ் இதற்கு முன்பு 57 வழக்குகளில் தொடர்புடையவர் என்றும் நீதிமன்றம் கூறியது.

இந்த உத்தரவை எதிர்த்து சிபா சங்கர் தாஸ் உச்ச நீதிமன்றத்தில் வழக்கு தொடர்ந்தார்.

உச்ச நீதிமன்றம் என்ன தீர்ப்பு வழங்கியது?

மார்ச் 22 அன்று, உச்ச நீதிமன்றத்தின் இரு நீதிபதிகள் கொண்ட பெஞ்ச், "அத்தகைய நிபந்தனையை விதிப்பது மேல்முறையீட்டாளரின் அடிப்படை உரிமைகளை மீறும், அத்தகைய நிபந்தனைகள் எதுவும் விதிக்கப்பட்டிருக்க கூடாது" என்று கூறி, ஒரிசா உயர்நீதிமன்ற உத்தரவை ரத்து செய்தது. இதையடுத்து, அந்த நிபந்தனையை ரத்து செய்வதாகவும், நீக்குவதாகவும் நீதிமன்றம் தெரிவித்தது.

இருப்பினும், நியாயமற்றதாகக் கருதப்படும் ஜாமீன் நிபந்தனைகளை உச்ச நீதிமன்றம் ரத்து செய்தது இது முதல் முறை அல்ல.

ஆந்திர உயர்நீதிமன்ற ஜாமீன் நிபந்தனைகள் மீதான உச்ச நீதிமன்றத்தின் தீர்ப்புகள்

கடந்த ஆண்டு, தெலுங்கு தேசம் கட்சியின் தலைவரும் ஆந்திரப் பிரதேசத்தின் முன்னாள் முதல்வருமான என். சந்திரபாபு நாயுடுவுக்கு ஜாமீன் வழங்கிய உயர் நீதிமன்ற உத்தரவை ஆந்திரப் பிரதேச அரசு கடந்த ஆண்டு சவால் செய்தது.

நவம்பர் 28, 2023 அன்று, நீதிபதிகள் பேலா திரிவேதி மற்றும் எஸ்.சி சர்மா ஆகியோர் அடங்கிய அமர்வு, ஆந்திரப் பிரதேச திறன் மேம்பாட்டுக் கழக ஊழல் வழக்கில் குற்றம் சாட்டப்பட்ட சந்திரபாபு நாயுடுவிடம் பதில் கேட்டது.

அவ்வாறு செய்யும்போது, ஜாமீனில் வெளிவருவதற்கான நிபந்தனையாக சந்திரபாபு நாயுடுவை பொதுக்கூட்டங்கள் மற்றும் கூட்டங்களில் பங்கேற்பதைத் தடுக்கும் ஆந்திரப் பிரதேச உயர் நீதிமன்றத்தின் உத்தரவை நீதிமன்றம் நீக்கியது. “நோட்டீஸ் வழங்கவும். டிசம்பர் 8 ஆம் தேதி திரும்பப் பெறலாம். பொது பேரணிகள் மற்றும் கூட்டங்களில் பங்கேற்பதைத் தவிர மற்ற ஜாமீன் உத்தரவில் விதிக்கப்பட்டுள்ள நிபந்தனைகள் தொடரும்” என்று பெஞ்ச் கூறியது.

ஆந்திர ஐகோர்ட் இந்த வழக்கில் சந்திரபாபு நாயுடுவின் நான்கு வார இடைக்கால மருத்துவ ஜாமீனை நவம்பர் 20 அன்று முழுமையான ஜாமீனாக மாற்றியது. அவரது வயது மற்றும் தொடர்புடைய நோய்கள், வெளிநாடு தப்பிச் செல்ல வாய்ப்பில்லை மற்றும் பிற காரணங்களைக் கருத்தில் கொண்டு வழக்கமான ஜாமீனில் விடுவிக்க உத்தரவிட்டது.

ராஜஸ்தான், அலகாபாத், மத்திய பிரதேச உயர் நீதிமன்றங்களின் ஜாமீன் நிபந்தனைகள் மீதான உச்ச நீதிமன்றத்தின் உத்தரவுகள்

கடந்த ஆண்டு ஜனவரி 3 ஆம் தேதி, நீதிபதிகள் கிருஷ்ணா முராரி மற்றும் வி. ராமசுப்ரமணியன் ஆகியோர் அடங்கிய பெஞ்ச், "ஜாமீன் நிபந்தனைகள் மிகவும் கடுமையானதாக இருக்க முடியாது, அவை ஜாமீன் மறுப்புக்கு சமம்" என்று தீர்ப்பளித்தது.

ராஜஸ்தான் உயர்நீதிமன்றம் விதித்த நிபந்தனையை ரத்து செய்யும்போது, இந்தத் தீர்ப்பு வந்தது, குற்றம் சாட்டப்பட்டவர்கள் ஒரு லட்சம் ரூபாய் அபராதத்துடன் மேலும் ஒரு லட்ச ரூபாய்க்கான ஜாமீன் மற்றும் தலா 50,000 ரூபாய்க்கு மேலும் இரண்டு ஜாமீன் பத்திரங்களை டெபாசிட் செய்ய உத்தரவிட்டது.

இதேபோல், ஜூலை 22, 2022 அன்று, நீதிபதிகள் ஏ.எம். கன்வில்கர் மற்றும் ஜே.பி. பர்திவாலா ஆகியோர் அடங்கிய பெஞ்ச், சமாஜ்வாடி கட்சித் தலைவர் அசம் கானுக்கு ஜாமீன் வழங்கும் போது, ராம்பூரில் உள்ள முகமது அலி ஜவுஹர் பல்கலைக்கழகத்திற்கு சீல் வைக்கக் கோரி, அலகாபாத் உயர்நீதிமன்றம் விதித்த ஜாமீன் நிபந்தனையை ரத்து செய்தது.

"சம்பந்தப்பட்ட குற்றம் சாட்டப்பட்டவர்களுக்கு எதிராக பதிவுசெய்யப்பட்ட குற்றத்தைக் குறிப்பிடும் வகையில், ஜாமீனுக்கான கோரிக்கையின் பரிசீலனைக்கு தொடர்பில்லாத விஷயங்களை உயர்நீதிமன்றம் குறிப்பிட்டுள்ளதை நாங்கள் கண்டறிந்த மற்றொரு விஷயம் இது" என்று நீதிமன்றம் கூறியது.

மார்ச் 2021 இல், உச்ச நீதிமன்றம் மத்தியப் பிரதேச உயர் நீதிமன்றத் தீர்ப்பை ரத்து செய்தது, அங்கு பாலியல் வன்கொடுமைக்கு ஆளான ஒருவருக்கு ஜாமீன் பெறுவதற்கான முன் நிபந்தனையாக பாதிக்கப்பட்ட பெண்ணின் மணிக்கட்டில் ராக்கியைக் கட்டும்படி கூறப்பட்டு இருந்தது.

உயர்நீதிமன்ற உத்தரவை எதிர்த்து உச்ச நீதிமன்ற வழக்கறிஞர் அபர்ணா பட் மற்றும் 8 பெண்கள் தாக்கல் செய்த மனுவை விசாரித்த நீதிபதிகள் ஏ.எம் கன்வில்கர் மற்றும் ரவீந்திர பட் ஆகியோர் அடங்கிய அமர்வு, பெண்களுக்கு எதிரான குற்றங்கள் தொடர்பான ஜாமீன் மனுக்களை கீழ் நீதிமன்றங்கள் பின்பற்ற வேண்டிய வழிகாட்டுதல்களை வெளியிட்டது.

குற்றம் சாட்டப்பட்டவருக்கும் பாதிக்கப்பட்டவருக்கும் இடையே தொடர்பு தேவைப்படுவதையோ அல்லது அனுமதிப்பதையோ நீதிமன்றங்கள் தவிர்க்க வேண்டும் என்றும் குற்றம் சாட்டப்பட்டவர்களால் மேலும் துன்புறுத்தப்படுவதிலிருந்து புகார்தாரரைப் பாதுகாக்க வேண்டும் என்றும் உச்ச நீதிமன்றம் கூறியது.

"ஜாமீன் நிபந்தனைகள் மற்றும் உத்தரவுகள் பெண்கள் மற்றும் சமூகத்தில் அவர்களின் இடம் பற்றிய ஒரே மாதிரியான அல்லது ஆணாதிக்கக் கருத்துக்களைப் பிரதிபலிப்பதைத் தவிர்க்க வேண்டும், மேலும் சி.ஆர்.பி.சி.,யின் தேவைகளுக்கு இணங்க கண்டிப்பாக இருக்க வேண்டும்" என்று நீதிமன்றம் தனது உத்தரவில் கூறியுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“