மக்கள்தொகை கணக்கெடுப்பில் கட்டிடங்களின் புவிக்குறியிடுதல் எவ்வாறு செயல்படும்? அது எப்படி உதவும்?

ஆறு வருட தாமதத்திற்குப் பிறகு, 2027-ல் நடக்கவிருக்கும் இந்தியாவின் அடுத்த மக்கள்தொகை கணக்கெடுப்பில் பல புதிய விஷயங்கள் இருக்கும் - இது முதல்முறையாக டிஜிட்டல் முறையில் நடத்தப்படும் கணக்கெடுப்பாக இருக்கும்; முதல்முறையாக, மக்கள் சுயமாக கணக்கெடுக்கப்படுவதற்கான வாய்ப்பைப் பெறுவார்கள்; மேலும் 1931-க்குப் பிறகு முதல்முறையாக தனி சாதிகளைச் சேர்ந்தவர்கள் கணக்கிடப்படுவார்கள்.

ஆங்கிலத்தில் படிக்க:

அத்துடன், இந்தியா முழுவதும் உள்ள அனைத்து கட்டிடங்களும் புவிக்குறியிடப்படும் - இந்தியாவின் பத்தாண்டுக்கு ஒருமுறை நடக்கும் மக்கள்தொகை கணக்கெடுப்பின் ஒரு பகுதியாக இதுபோன்ற ஒரு செயல்முறை இதற்கு முன் ஒருபோதும் மேற்கொள்ளப்படவில்லை. புவிக்குறியிடுதல் எவ்வாறு மேற்கொள்ளப்படும், ஏன் இது செய்யப்படுகிறது?

புவிக்குறியிடுதல் என்றால் என்ன?

புவிக்குறியிடுதல் என்பது புவியியல் தகவல் அமைப்பு (ஜி.ஐ.எஸ்- GIS) வரைபடத்தில் கட்டிடங்களின் அட்சரேகை - தீர்க்கரேகை ஆயங்களை குறிக்கும் செயல்முறை ஆகும்.

புவியியல் தகவல் அமைப்பு (ஜி.ஐ.எஸ்) என்பது பூமியின் மேற்பரப்பில் உள்ள குறிப்பிட்ட நிலைகளில் தரவுகளைப் பிடித்து, சரிபார்த்து, காண்பிக்கும் ஒரு கணினி அமைப்பாகும்.

அட்சரேகைகள் மற்றும் தீர்க்கரேகைகள் ஆகியவை பூமியின் மீது ஒரு இடத்தின் இருப்பிடத்தை தீர்மானிக்கப் பயன்படுத்தப்படும் கற்பனை கோடுகள் ஆகும். அட்சரேகைகள் (அல்லது 'இணைகோடுகள்') பூமத்திய ரேகையில் இருந்து ஒரு இடத்தின் வடக்கு - தெற்கு தூரத்தைக் குறிக்கும் கிடைமட்ட கோடுகள் ஆகும்; தீர்க்கரேகைகள் (அல்லது 'மெரிடியன்கள்') என்பது கிரீன்விச், இங்கிலாந்து வழியாக செல்லும் பிரதான மெரிடியனில் இருந்து ஒரு இடத்தின் கிழக்கு-மேற்கு தூரத்தை தீர்மானிக்கும் செங்குத்து வடக்கு-தெற்கு கோடுகள் ஆகும்.

ஒன்றாக, அட்சரேகை மற்றும் தீர்க்கரேகை கோடுகள் பூமியின் மேற்பரப்பில் ஒரு கட்டத்தை உருவாக்குகின்றன. எந்தவொரு இடத்தையும் ஒரு குறிப்பிட்ட அட்சரேகை மற்றும் தீர்க்கரேகை சந்திக்கும் புள்ளியால் விவரிக்க முடியும்.

புவிக்குறியிடுதல் ஒரு கட்டிடத்திற்கு துல்லியமான மற்றும் தனித்துவமான இட அடையாளத்தை வழங்குகிறது.

கணக்கெடுப்பின் அடிப்படைகள்

மக்கள்தொகை கணக்கெடுப்பு 1872 முதல் நடத்தப்பட்டு வருகிறது; 2027-ம் ஆண்டு கணக்கெடுப்பு 16-வது முறையாகவும், சுதந்திரத்திற்குப் பிறகு 8-வது முறையாகவும் இருக்கும்.

கிராமம், நகரம் மற்றும் வார்டு மட்டங்களில் தனிநபர்களின் எண்ணிக்கையுடன் வீட்டு நிலைமைகள், வசதிகள் மற்றும் சொத்துக்கள், மக்கள் தொகை, மதம், மொழி, எழுத்தறிவு மற்றும் கல்வி, பொருளாதார செயல்பாடு, புலம்பெயர்தல், கருவுறுதல் போன்ற பல தரவுகள் சேகரிக்கப்படுகின்றன.

மார்ச் 1, 2011 நிலவரப்படி இந்தியாவின் மக்கள்தொகை 1.21 பில்லியனாக இருந்தது. உலகின் அதிக மக்கள்தொகை கொண்ட நாடாக இந்தியா இப்போது சீனாவை விஞ்சிவிட்டதாக மதிப்பிடப்பட்டுள்ளது.

ஆதாரங்களின்படி, உள்துறை அமைச்சகத்தின் கீழ் உள்ள இந்திய தலைமைப் பதிவாளர் அலுவலகம், 2027-ம் ஆண்டு கணக்கெடுப்பை நடத்துவதற்காக ரூ. 14,618.95 கோடி பட்ஜெட்டைக் கோரியுள்ளது.

34 லட்சத்திற்கும் அதிகமான கணக்கெடுப்பாளர்கள் மற்றும் களப் பணியாளர்கள் கணக்கெடுப்பை நடத்துவதில் ஈடுபடுவார்கள் என்று எதிர்பார்க்கப்படுகிறது. கணக்கெடுப்பாளர்கள் தரவுகளை சேகரிக்க தங்கள் சொந்த ஸ்மார்ட்போன்களைப் பயன்படுத்துவார்கள். 2011-ம் ஆண்டு சமூக பொருளாதார மற்றும் சாதி கணக்கெடுப்பில், பாரத் எலக்ட்ரானிக்ஸ் லிமிடெட் வழங்கிய பிரத்யேக கையடக்க டேப்லெட்டுகள் பயன்படுத்தப்பட்டன.

நாட்டில் எத்தனை 'கட்டிடங்கள்' உள்ளன?

2011-ம் ஆண்டு கணக்கெடுப்பில், ஒரு 'கணக்கெடுக்கப்படும் வீட்டை' "ஒரு கட்டிடம் அல்லது ஒரு கட்டிடத்தின் ஒரு பகுதி, சாலை அல்லது பொதுவான முற்றத்திலிருந்து அல்லது படிக்கட்டு போன்றவற்றிலிருந்து தனி நுழைவாயில் இருப்பதால் தனி அலகாகப் பயன்படுத்தப்படுவது அல்லது அங்கீகரிக்கப்படுவது" என்று வரையறுத்தது.

ஒரு கணக்கெடுப்பு வீடு ஆக்கிரமிக்கப்பட்டிருக்கலாம் அல்லது காலியாக இருக்கலாம்; இது குடியிருப்பு அல்லது குடியிருப்பு அல்லாத நோக்கங்களுக்காக அல்லது இரண்டுக்கும் பயன்படுத்தப்படலாம்.

கடைசி கணக்கெடுப்பு (2011) இந்தியாவில் 330.84 மில்லியன் வீடுகளை பதிவு செய்தது, அவற்றில் 306.16 மில்லியன் வீடுகளில் மக்கள் குடியிர்ந்தனர். 24.67 மில்லியன் வீடுகள் காலியாக இருந்தன. 220.70 மில்லியன் வீடுகள் கிராமப்புறங்களிலும், 110.14 மில்லியன் வீடுகள் நகர்ப்புறங்களிலும் இருந்தன.

புவிக்குறியிடுதல் செயல்முறை எவ்வாறு நடைபெறும்?

புவிக்குறியிடுதல், மக்கள்தொகை கணக்கெடுப்பின் முதல் கட்டமான வீட்டுப் பட்டியல் செயல்பாடுகளின் (HLO) போது செய்யப்படும். இது ஏப்ரல்-செப்டம்பர் 2026-ல் நடைபெற உள்ளது. (இரண்டாவது கட்டம் மக்கள்தொகை கணக்கெடுப்பு (PE), இதன் போது தனிநபர்களின் மக்கள் தொகை, சமூக பொருளாதார மற்றும் கலாச்சார தரவுகள் சேகரிக்கப்படும்.)

கணக்கெடுப்பாளர்கள் அவர்களுக்கு ஒதுக்கப்பட்ட வீட்டுப் பட்டியல் தொகுதிகளில் (HLBs) உள்ள கட்டிடங்களுக்குச் சென்று, டிஜிட்டல் தளவமைப்பு மேப்பிங் (DLM) பயன்படுத்தி ஒவ்வொரு கட்டிடத்தையும் புவிக்குறியிடுவார்கள். கணக்காளர்கள் தங்கள் ஸ்மார்ட்போன்களில் தற்போதைய இருப்பிடத்தை ஆன் செய்து, மொபைல் பயன்பாட்டைப் பயன்படுத்தி கட்டிடத்தை பட்டியலிடலாம் என்று கூறப்படுகிறது.

ஒரு வீட்டுப் பட்டியல் தொகுதிகளில் (எச்.எல்.பி) என்பது "ஒரு கிராமம் அல்லது ஒரு நகரத்தின் வார்டில் நன்கு வரையறுக்கப்பட்ட ஒரு பகுதி ஆகும், இது களத்தில் தெளிவாக குறிக்கப்படலாம் மற்றும் மக்கள்தொகை கணக்கெடுப்பு செயல்பாடுகளுக்காக ஒரு கருத்தியல் வரைபடம் வரையப்படுகிறது".

ஒவ்வொரு கட்டிடத்திலும் வசிக்கும் கணக்கெடுப்பு வீடுகள் மற்றும் குடும்பங்களின் எண்ணிக்கை குறித்த தரவுகள் சேகரிக்கப்படும். கட்டிடங்கள் 'குடியிருப்பு', 'குடியிருப்பு அல்லாத', 'பகுதி குடியிருப்பு' மற்றும் 'மைல்கல்' போன்ற வகைகளாக வகைப்படுத்தப்படும்.

2011-ம் ஆண்டு மக்கள்தொகை கணக்கெடுப்பு ஒரு 'குடும்பத்தை' பொதுவாக ஒன்றாக வசிக்கும் மற்றும் ஒரு பொதுவான சமையலறையில் இருந்து தங்கள் உணவை சாப்பிடும் நபர்களின் குழுவாக வரையறுத்தது.

மக்கள்தொகை கணக்கெடுப்பின்போது கட்டிடங்களை புவிக்குறியிடுதல் எவ்வாறு உதவும்?

ஆதாரங்களின்படி, புவிக்குறியிடுதல், கணக்கெடுக்கப்பட வேண்டிய கணக்கெடுப்பு வீடுகள் மற்றும் குடும்பங்களின் எண்ணிக்கையை துல்லியமாக மதிப்பிட உதவும், இதனால் களப் பணியாளர்கள் முழுவதும் பணிச்சுமை நிர்வாகத்தை மேம்படுத்தும்.

முந்தைய கணக்கெடுப்புகளில், வீட்டுப் பட்டியல் பயிற்சியின் ஒரு பகுதியாக கைமுறையாக கருத்தியல் வரைபடங்கள் வரையப்பட்டன.

எனினும், அரசாங்கம் சிறிய அளவில் புவிக்குறியிடலைப் பயன்படுத்தி வருகிறது. உதாரணமாக, பிரதான் மந்திரி ஆவாஸ் யோஜனா - கிராமின் மற்றும் பி.எம்.ஏ.ஒய் (PMAY)-நகர்ப்புறத்தின் கீழ் கட்டப்பட்ட வீடுகள் போன்ற சொத்துக்கள் புவிக்குறியிடப்படுகின்றன.