இந்தியாவின் உயர் ரத்த அழுத்தம் வரைபடம்: மாநிலங்கள்- மாவட்டங்களுக்கு இடையேயான மாறுபாடு

இந்திய மாநிலங்களுக்குள்ளும், மாநிலங்களில் உள்ள மாவட்டங்களுக்குள்ளும் கூட உயர் ரத்த அழுத்தத்தின் பரவல், நோய் கண்டறிதல், சிகிச்சை மற்றும் கட்டுப்பாடு ஆகியவற்றில் குறிப்பிடத்தக்க மாறுபாடு உள்ளது என்று ஜமா இதழில் வெளியிடப்பட்ட சமீபத்திய தேசிய குடும்ப சுகாதார ஆய்வு தரவுகளின் பகுப்பாய்வு தெரிவிக்கிறது.

உயர் ரத்த அழுத்தத்தின் தேசிய சராசரி மதிப்புகள், மேலும் "பரவலாக்கப்பட்ட தீர்வுகளை" ஆராய்ச்சியாளர்கள் பரிந்துரைத்தனர்.

இந்தியாவில் உயர் ரத்த அழுத்த சிகிச்சை பற்றி ஆய்வு என்ன சொல்கிறது?

நாடு முழுவதும் உள்ள மருத்துவர்களுக்கு ஏற்கனவே என்ன தெரியும் என்பதை தேசிய அளவிலான தரவு காட்டுகிறது - உயர் ரத்த அழுத்தம் உள்ளவர்களில் அதிகமானோர் கண்டறியப்படுவதில்லை; கண்டறியப்பட்டவர்களில், பலர் சிகிச்சையைத் தொடங்குவதில்லை; சிகிச்சையைத் தொடங்குபவர்களில், சிலரே ரத்த அழுத்தத்தைக் கட்டுப்படுத்த முடியும்.

இந்தியாவில் மூன்றில் ஒருவர் மட்டுமே நோயறிதலை கண்டறிகிறார், ஐந்தில் ஒருவர் சிகிச்சை பெறுகிறார், மேலும் பன்னிரண்டு பேரில் ஒருவர் ரத்த அழுத்தக் கட்டுப்பாட்டை அடைகிறார்.

இதில், தொடர்ச்சியான கவனிப்பு நிலைகளின்- மாநிலங்கள் மற்றும் மாவட்டங்களுக்கு இடையேயான மாறுபாடுதான் சுவாரஸ்யமான கண்டுபிடிப்பு.

மாநில அளவில்

உயர் ரத்த அழுத்தத்தின் பாதிப்பு தென் மாநிலங்களில் ஒரே மாதிரியாக இருப்பதாக ஆய்வில் கண்டறியப்பட்டுள்ளது, ஆனால் இது தேசிய சராசரியை விட அதிகமாக உள்ளது - இந்தியா முழுவதும் 26.8% உடன் ஒப்பிடும்போது தென் மாநிலங்களில் 29.9% மக்கள் ரத்த அழுத்த பாதிப்புக்கு ஆளாகி உள்ளனர்.

தென் மாநிலங்களில் உயர் ரத்த அழுத்தத்தால் கண்டறியப்பட்டவர்களின் விகிதம் இந்தியாவின் மற்ற பகுதிகளைப் போலவே இருந்தது, ஆனால் சிகிச்சை மற்றும் கட்டுப்பாட்டில் உள்ளவர்களின் விகிதம் இந்த மாநிலங்களில் அதிகமாக இருப்பதாக ஆய்வு காட்டுகிறது.

மாவட்ட அளவில்

மாநில அளவில் மட்டுமல்ல, மாநிலங்களுக்குள்ளும் குறிப்பிடத்தக்க மாறுபாடுகள் இருந்தன. இதை நிரூபிக்க இரண்டு மாநிலங்களின் உதாரணத்தை ஆராய்ச்சியாளர்கள் மேற்கோள் காட்டினர்.

மேகாலயாவில், கரோ ஹில்ஸ் (21.8%), ஜெயின்டியா ஹில்ஸ் (19.8%), மற்றும் காசி ஹில்ஸ் (23.1%) ஆகிய மாவட்டங்களில் உயர் ரத்த அழுத்தத்தின் பாதிப்பு ஒரே மாதிரியாக இருந்தது.

இருப்பினும், கண்டறியப்பட்டவர்களின் விகிதம் காரோ ஹில்ஸில் 18.6% ஆகவும், காசி ஹில்ஸில் 29.4% மற்றும் ஜெயின்டியா மலைகளில் 41.1% ஆகவும் இருந்தது.

இதேபோல் கர்நாடகாவில், சிக்மகளூர், ஷிமோகா, உடுப்பி மற்றும் சித்ரதுர்கா ஆகிய நான்கு மாவட்டங்களில் ஒரே மாதிரியான உயர் ரத்த அழுத்த பாதிப்பு உள்ளது, ஆனால் சிகிச்சை பெற்று அதை வெற்றிகரமாகக் கட்டுப்படுத்தியவர்களின் விகிதம் சிக்மகளூர் மற்றும் உடுப்பியில் அதிகமாக இருந்தது.

வயது, பாலினம் மற்றும் கல்வியின் தாக்கம் என்ன?

தேசிய அளவில் கூட, பாலினம், வயது, சமூக-பொருளாதார நிலைமைகள் மற்றும் நபரின் கல்வி நிலை ஆகியவற்றைப் பொறுத்து தொடர்ச்சியான கவனிப்பு நிலைகளில் குறிப்பிடத்தக்க வேறுபாடுகள் இருந்தன.

பெண்களை விட ஆண்களுக்கு உயர் ரத்த அழுத்தம் ஏற்படுவதற்கான வாய்ப்புகள் அதிகம் என்பது அனைவரும் அறிந்ததே என்றாலும், வியக்கத்தக்க வகையில், பெண்கள் கண்டறியப்படுவதற்கும், சிகிச்சை பெறுவதற்கும், அவர்களின் ரத்த அழுத்தத்தைக் கட்டுக்குள் வைத்திருப்பதற்கும் அதிக வாய்ப்புகள் இருப்பதாக தரவுகள் காட்டுகின்றன.

இளைஞர்களுடன் ஒப்பிடும் போது, ​​65 வயதுக்கு மேற்பட்டவர்களிடையே பாதிப்பு, நோய் கண்டறிதல், சிகிச்சை மற்றும் கட்டுப்பாடு ஆகியவை அதிகமாக இருந்தன.

சமூக-பொருளாதார நிலைமைகளுக்கு வரும்போது, ​​உயர் ரத்த அழுத்தத்தின் பரவல், நோய் கண்டறிதல், சிகிச்சை மற்றும் கட்டுப்பாடு ஆகியவை மக்கள் தொகையில் ஐந்தில் ஒரு பங்கு பணக்காரர்களிடையே அதிகமாக இருப்பது கண்டறியப்பட்டது.

பள்ளிப்படிப்பு இல்லாதவர்கள் மற்றும் 11 ஆம் வகுப்பு தேர்ச்சி பெற்றவர்கள் மத்தியில் உயர் ரத்த அழுத்தத்தின் பாதிப்பு ஒரே மாதிரியாக இருந்தாலும், பள்ளிப்படிப்பை முடித்தவர்களிடையே நோய் கண்டறிதல், சிகிச்சை மற்றும் கட்டுப்பாடு அதிகமாக இருந்தது.

மாநிலங்களுக்கு இடையேயான மற்றும் மாவட்டங்களுக்கு இடையேயான மாறுபாட்டை ஏன் பார்க்க வேண்டும்?

இந்த மாவட்ட அளவிலான தரவுகளை பிரிப்பது, மாநில அரசுகளுக்கு எங்கு, எந்த அளவிலான பராமரிப்புக்கு அதிக ஆதாரங்கள் தேவை என்பதைத் திட்டமிட உதவும் என்று, ஆய்வறிக்கையின் ஆசிரியர்களில் ஒருவரான டாக்டர் நிகில் டாண்டன் (professor of endocrinology and metabolism at the All India Institute of Medical Sciences, Delhi) கூறினார்.

கடுமையான நோய்களைக் காட்டிலும் உயர் ரத்த அழுத்தம் போன்ற நாள்பட்ட நிலைமைகளை நிர்வகிப்பதற்கு சுகாதார அமைப்புகள் வித்தியாசமாக திட்டமிடப்படுவது அவசியம். ஒரு கடுமையான நோய்க்கு, நோயாளி கவனிப்பைத் தேட வாய்ப்புள்ளது.

அவர்கள் மருத்துவரை கலந்தோலசித்த பிறகு, பரிந்துரைக்கப்பட்ட காலத்திற்கு மருந்துகளை எடுத்துக் கொள்ளலாம். ஆனால் உயர் ரத்த அழுத்தத்தில், இது நடக்காது என்பது எங்களுக்குத் தெரியும்.

உதாரணமாக, சீரான இடைவெளியில் மருந்துகள் கிடைக்காத மாவட்டத்தை எடுத்துக்கொள்வோம். மக்கள் வீடுகளுக்கு அருகில் உள்ள மையங்களில் மருந்துகள் தொடர்ந்து கிடைப்பதை உள்ளாட்சி நிர்வாகம் உறுதி செய்ய வேண்டும். அல்லது, பதிவுகளை டிஜிட்டல் மயமாக்க வேண்டும். இது சுகாதாரப் பணியாளர்கள் வழக்கமான பின்தொடர்தல் மற்றும் மருந்துகளை கையிருப்பு வைத்திருப்பதை உறுதிசெய்ய உதவும்.

உயர் ரத்த அழுத்தத்திற்கு, ஸ்கிரீனிங் மற்றும் நோயறிதல் மட்டுமல்ல, தொடர்ச்சியான கவனிப்பு முக்கியமானது.

ஒரு குறிப்பிட்ட மாவட்டத்தில் அதிக பாதிப்பு உள்ளதா, ஒரு குறிப்பிட்ட மாவட்டத்திற்கு கூடுதல் பரிசோதனை அல்லது நோய் கண்டறியும் வசதிகள் தேவையா, மருந்துகள் அணுகக்கூடியதா மற்றும் வழக்கமான காலங்களில் கிடைக்கிறதா என்பதைப் புரிந்துகொள்ள இந்தத் தரவு உள்ளூர் அரசாங்கங்களுக்கு உதவும், என்று டாக்டர் டாண்டன் கூறினார்.

இந்தியாவில் உயர் ரத்த அழுத்தத்தைக் கட்டுப்படுத்த என்ன செய்ய வேண்டும்?

உயர் ரத்த அழுத்தம் குறித்து சமீபத்தில் வெளியிடப்பட்ட உலக சுகாதார நிறுவனம் (WHO) அறிக்கை, உயர் ரத்த அழுத்த நோயாளிகளில் பாதி பேர் மட்டுமே தங்கள் ரத்த அழுத்தத்தைக் கட்டுப்படுத்த முடிந்தால், 2040 ஆம் ஆண்டளவில் இந்தியாவில் கிட்டத்தட்ட 4.6 மில்லியன் இறப்புகளைத் தவிர்க்க முடியும் என்று கூறியுள்ளது.

இதை நோக்கி, 2025 ஆம் ஆண்டிற்குள் உயர் ரத்த அழுத்தம் அல்லது நீரிழிவு நோயால் பாதிக்கப்பட்ட 75 மில்லியன் மக்களுக்கு சிகிச்சை அளிக்க இந்த ஆண்டு அரசாங்கம் ஒரு லட்சிய முயற்சியைத் தொடங்கியது.

இருப்பினும், உயர் ரத்த அழுத்தத்தைக் கட்டுப்படுத்துவதற்கு, உள்கட்டமைப்பின் அதிகரிப்பு மட்டும் தேவைப்படாமல், மக்களைச் சுறுசுறுப்பாகப் பரிசோதித்தல், அவர்களுக்கு சிகிச்சை அளிப்பது, அவர்களின் வீடுகளுக்கு அருகிலேயே மருந்து கிடைப்பதை உறுதி செய்தல் மற்றும் பின்தொடர்தல்களை உறுதி செய்தல் ஆகியவற்றில் கவனம் செலுத்த வேண்டும்.

Read in English: India’s hypertension map: How different states, regions fare

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“