ஒடிசாவின் புதிய பாஜக முதல்வராக மோகன் சரண் மஜி பதவியேற்ற ஒரு நாளுக்குப் பிறகு, பூரியில் உள்ள ஜெகன்நாதர் கோயிலின் நான்கு வாசல்களும் வியாழக்கிழமை (ஜூன் 13) பக்தர்களுக்காக திறக்கப்பட்டன.
ஜெகநாதரின் ஆசியுடன் ஒடிசாவில் பாஜக ஆட்சி அமைத்தது. எங்கள் கட்சி உறுதியளித்தபடி, எங்கள் அமைச்சரவையில் நாங்கள் ஒப்புதல் அளித்த முதல் முன்மொழிவு கோவிலின் நான்கு நுழைவு வாயில்களையும் திறப்பதுதான், என்று மஜி ஊடகத்திடம் கூறினார்.
நவீன் பட்நாயக் தலைமையிலான முந்தைய பிஜு ஜனதா தள அரசாங்கத்தால் 12 ஆம் நூற்றாண்டில் உள்ள இந்த ஆலயத்தின் நான்கு நுழைவாயில்களில் மூன்று மூடப்பட்ட நான்கு ஆண்டுகளுக்குப் பிறகு இது வந்துள்ளது.
மிகவும் மதிக்கப்படும் இந்து ஆலயங்களில் ஒன்றாக விளங்கும் பூரி ஜெகநாதர் கோயில், விஷ்ணுவின் அவதாரம் என்று நம்பப்படும் ஜெகநாதரை வழிபடுவதற்காக அர்ப்பணிக்கப்பட்டுள்ளது. இது ஹிந்துக்களுக்கு மிகவும் புனித யாத்திரைத் தலங்களில் நான்கு சாரதாம்களில் ஒன்றாகும், இதனால் அதிக மக்கள் இங்கு வந்து ஜெகநாதரை வழிபடுகின்றனர்.
நான்கு வாயில்கள்
ஜெகன்நாதர் கோவிலின் நான்கு வாயில்கள், நான்கு திசைகளிலும் அதன் எல்லைச் சுவரின் நடுப் புள்ளிகளில் அமைந்துள்ளன. அவை வெவ்வேறு விலங்குகளின் பெயரால் அழைக்கப்படுகின்றன.
பிரதான கிழக்கு நோக்கிய நுழைவு வாயில் காவலுக்கு நிற்கும் சிங்கங்களின் இரண்டு கல் சிற்பங்களுடன், சிங்கத்வாரா அல்லது சிங்கத்தின் வாயில் என்று அழைக்கப்படுகிறது. பிரபலமான நம்பிக்கையின்படி, இந்த வாயில் வழியாக நுழைபவர்கள் மோட்சத்தை அடைகிறார்கள்.
வடக்கு, தெற்கு மற்றும் மேற்கு நுழைவாயில்கள் முறையே ஹஸ்தித்வாரா (‘யானை வாயில்’), அஸ்வத்வாரா (‘குதிரை வாயில்’) மற்றும் வியாக்ரத்வாரா (‘புலி வாயில்’) என அழைக்கப்படுகின்றன.
பிரபலமான நம்பிக்கையின் படி, அஸ்வத்வாரா வழியாக நுழைவது காமத்தை போக்க உதவுகிறது.
வியாக்ரத்வாரா வழியாக நுழைவது ஒருவரின் தர்மத்தை (சரியான நடத்தை மற்றும் சமூக ஒழுங்கின் அடிப்படையிலான அண்ட விதி) நினைவூட்டுகிறது, மேலும் ஹஸ்தித்வாரா வழியாக நுழைவது செல்வத்தைக் கொண்டுவருகிறது.
வாயில்கள் ஏன் மூடப்பட்டன?
மார்ச் 25, 2020 அன்று லாக்டவுன் தொடங்கிய பிறகு, ஜெகநாதர் கோவில் பக்தர்களுக்காக மூடப்பட்டது. ஒன்பது மாதங்களுக்குப் பிறகு, டிசம்பர் 23 அன்று திறக்கப்பட்டது. ஆனால் பிரதான நுழைவாயில் மட்டுமே செயல்பாட்டில் வைக்கப்பட்டது.
பட்நாயக் தலைமையிலான மாநில அரசு, ‘ஸ்ரீமந்திர் பரிக்ரமா’ திட்டத்தைக் காரணம் காட்டி வாயில்களை மூடியது.
இந்த ஆண்டின் தொடக்கத்தில் தொடங்கப்பட்ட, ரூ.800 கோடி லட்சிய திட்டமானது, கோயிலைச் சுற்றி 75 மீட்டர் நீளமுள்ள பாரம்பரிய நடைபாதையை மேம்படுத்துவதை உள்ளடக்கியது, மேலும் பக்தர்களுக்கு மேம்பட்ட வசதிகளை வழங்குவதை நோக்கமாகக் கொண்டுள்ளது.
ஆனால் நடைபாதையின் திறப்பு விழாவிற்குப் பிறகும், மூன்று வாயில்கள் மூடப்பட்டிருந்ததால், சிங்கத்வாரா வாயிலில் மக்கள் கூட்டம் அலைமோதியது. இதனால் மற்ற வாயில்களும் திறக்கப்பட வேண்டும் என்று அழைப்பு வந்தது.
தேர்தல் பிரச்சினையாக மாற்றிய பாஜக
24 ஆண்டுகளாக பதவியில் இருந்த பிஜு ஜனதாதளமிடம் இருந்து ஒடிசாவை சமீபத்தில் கைப்பற்றிய பாஜக, நான்கு வாயில்களையும் மீண்டும் திறக்க வேண்டும் என்று சில காலமாக கோரி வருகிறது.
கோவில் கடவுள்களுக்கும் அவர்களின் பக்தர்களுக்கும் இடையே BJD அரசாங்கம் ஒரு 'தடையாக' மாறியதாக அவர்கள் குற்றம் சாட்டினர், மேலும் வாயில்கள் மூடப்படுவதை ஒடியா பெருமையுடன் இணைத்தது.
தமிழகத்தில் பிறந்த முன்னாள் ஐஏஎஸ் அதிகாரியான வி கே பாண்டியனுக்கு பிஜேடியில் செல்வாக்கு அதிகரித்து வருவதால், பிஜேடி கட்சியை முட்டுக்கட்டை போட பாஜக முயற்சித்து வரும் நிலையில் இது நடந்தது.
தேர்தல் நெருங்கி வந்தபோது, மத்திய உள்துறை அமைச்சர் அமித் ஷா, பாஜக ஆட்சிக்கு வந்த சில மணி நேரங்களுக்குள் நான்கு நுழைவு வாயில்களையும் திறக்கும் என்று பொதுக் கூட்டங்களில் பலமுறை கூறினார். இதை கட்சி தனது தேர்தல் அறிக்கையிலும் சேர்த்தது.
மேலும் கட்சி இந்த வாக்குறுதியை நிறைவேற்றியது. மஜி வியாழன் அதிகாலை தனது அனைத்து அமைச்சர்கள், பல எம்எல்ஏக்கள், பூரி எம்பி சம்பித் பத்ரா மற்றும் பிற மூத்த பாஜக தலைவர்களுடன் கோயிலுக்குச் சென்றார்.
ஜெகநாதர் கோவிலின் பாதுகாப்பு மற்றும் அழகுபடுத்துவதற்காக 500 கோடியில் கார்பஸ் உருவாக்கப்படும் என்றும் அறிவித்துள்ளார்.
Read in English: Why opening all four gates of Puri Jagannath temple was top priority for new BJP government in Odisha
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“