போர்ட் பிளேயரின் பெயர் ’ஸ்ரீ விஜய புரம்’ ஆக மாற்றம்; பெயர் காரணமும் சோழர்களின் தொடர்பும்

Adrija Roychowdhury

அந்தமான் மற்றும் நிக்கோபார் தீவுகளின் தலைநகரான போர்ட் பிளேயர் இனி ‘ஸ்ரீ விஜய புரம்’ என அழைக்கப்படும் என்று மத்திய உள்துறை அமைச்சர் அமித் ஷா வெள்ளிக்கிழமை (செப்டம்பர் 13) எக்ஸ் தளத்தில் பதிவிட்டார். பெயரை மாற்றும் முடிவு "தேசத்தை காலனித்துவ முத்திரைகளில் இருந்து விடுவிக்கும்" பிரதமர் நரேந்திர மோடியின் தொலைநோக்கு பார்வையால் ஈர்க்கப்பட்டதாக அமைச்சர் அமித் ஷா கூறினார்.

ஆங்கிலத்தில் படிக்க: Port Blair renamed as Sri Vijaya Puram: How the city got its name — and its connection with imperial Cholas

"முந்தைய பெயர் காலனித்துவ மரபைக் கொண்டிருந்தாலும், ஸ்ரீ விஜய புரம் நமது சுதந்திரப் போராட்டத்தில் அடைந்த வெற்றியையும்,  அந்தமான் மற்றும் நிக்கோபார் தீவுகளின் தனித்துவமான பங்கையும் குறிக்கிறது" என்று அமித் ஷா கூறினார்.

போர்ட் பிளேயர் என்ற பெயர் எப்படி வந்தது?

போர்ட் பிளேயர் நகரம் அந்தமான் மற்றும் நிக்கோபார் தீவுகளின் நுழைவுப் புள்ளியாகும். இது பம்பாய் மரைனில் கடற்படை சர்வேயர் மற்றும் லெப்டினன்ட் ஆக இருந்த ஆர்க்கிபால்ட் பிளேயர் என்பவரின் பெயரால் பெயரிடப்பட்டது. அந்தமான் தீவுகளை முழுமையாக ஆய்வு செய்த முதல் அதிகாரி ஆர்க்கிபால்ட் பிளேயர் ஆவார்.

1771 ஆம் ஆண்டில் பாம்பே மரைனில் சேர்ந்த பிறகு, ஆர்க்கிபால்ட் பிளேயர் அடுத்த ஆண்டு இந்தியா, ஈரான் மற்றும் அரேபியாவின் கடற்கரைகளில் ஆய்வுப் பணியைத் தொடங்கினார். 1780களின் பிற்பகுதியில், சாகோஸ் தீவுக்கூட்டம், கல்கத்தாவின் தெற்கில் அமைந்துள்ள டயமண்ட் துறைமுகம் மற்றும் ஹூக்ளி ஆற்றங்கரையில் உள்ள பல ஆய்வுப் பணிகளில் ஆர்க்கிபால்ட் பிளேயர் பங்கேற்றார்.

1778 டிசம்பரில், எலிசபெத் மற்றும் வைப்பர் ஆகிய இரண்டு கப்பல்களுடன் கல்கத்தாவிலிருந்து அந்தமானுக்கு தனது முதல் ஆய்வுப் பயணத்திற்கு ஆர்க்கிபால்ட் பிளேயர் புறப்பட்டார். ஏப்ரல் 1779 வரை நீடித்த இந்தப் பயணத்தில், அவர் தீவின் மேற்குக் கடற்கரையைச் சுற்றிக் கொண்டு, அதன் மூலம் வடக்கே கிழக்குக் கடற்கரை வழியாகப் பயணம் செய்து, இயற்கைத் துறைமுகத்தை அடைந்தார், ஆர்க்கிபால்ட் பிளேயர் அந்த இடத்திற்கு ஆரம்பத்தில் போர்ட் காரன்வாலிஸ் (பிரிட்டிஷ் இந்திய ராணுவத்தின் தலைமை தளபதி வில்லியம் காரன்வாலிஸ்) என்று பெயரிட்டார்.. பின்னர் தீவு ஆர்க்கிபால்ட் பிளேயர் பெயரில் மறுபெயரிடப்பட்டது. ஆர்க்கிபால்ட் பிளேயர் தனது கண்டுபிடிப்பின் முக்கியத்துவத்தை உடனடியாக அறிந்திருந்தார் மற்றும் அவரது ஆய்வின் விரிவான அறிக்கையை எழுதினார், இது கிழக்கிந்திய கம்பெனி (EIC) அதிகாரிகளால் மிகவும் விருப்பமாக ஏற்றுக் கொள்ளப்பட்டது.

விரைவில், கிழக்கிந்திய கம்பெனி அந்தமான் தீவுகளை காலனித்துவப்படுத்த முடிவு செய்தது, முக்கியமாக மலாய் கடற்கொள்ளையர்களின் செயல்பாடுகளை கண்டறிய பாதுகாப்பான துறைமுகமாக நிறுவப்பட்டது. இந்த தீவு கப்பல் விபத்தில் சிக்கிய மக்களுக்கு புகலிடமாகவும், மற்ற சக்திகளுடன் விரோதம் ஏற்பட்டால் அவர்களது அதிகாரிகள் தஞ்சம் அடையக்கூடிய இடமாகவும் இருந்தது. பல குற்றவாளிகள் ஊதியம் பெறாத உழைப்புக்காக தீவுகளுக்கு கொண்டு செல்லப்பட்டதால், தீவு விரைவில் ஒரு தண்டனை காலனியாக மாறியது.

இருப்பினும், டிசம்பர் 1792 இல், காலனி அந்தமானின் வடகிழக்கு பகுதிக்கு புதிதாக நிறுவப்பட்ட காரன்வாலிஸ் துறைமுகத்திற்கு முற்றிலும் மூலோபாய காரணங்களுக்காக மாற்றப்பட்டது. ஆனால் கடுமையான நோய் மற்றும் இறப்பு காரணமாக புதிய காலனி நீண்ட காலம் நீடிக்க முடியவில்லை. கிழக்கிந்திய கம்பெனி 1796 இல் அதை இயக்குவதை நிறுத்தியது.

1857 ஆம் ஆண்டின் பெரும் புரட்சியின் விளைவாக ஆங்கிலேயர்களுக்கு ஏராளமான கைதிகள் கிடைத்தனர், இது போர்ட் பிளேயரை தண்டனைக் காலனியாக உடனடியாகப் புதுப்பித்து மீள்குடியேற்றத் தூண்டியது. பெரும்பாலான குற்றவாளிகள் போர்ட் பிளேயரில் ஆயுள் தண்டனை பெற்றனர். அவர்களில் பலர் தூக்கிலிடப்பட்டனர், பலர் நோய் மற்றும் இப்பகுதியில் உள்ள மோசமான நிலைமைகள் காரணமாக இறந்தனர்.

19 ஆம் நூற்றாண்டின் பிற்பகுதியில் இந்திய சுதந்திர இயக்கம் வலுப்பெற்றதால், 1906 ஆம் ஆண்டில் இங்கு ஒரு பெரிய செல்லுலார் சிறை நிறுவப்பட்டது. காலா பானி என்று பிரபலமாக அறியப்படும் இந்த சிறை, வீர் தாமோதர் சாவர்க்கர் உட்பட பல சுதந்திரப் போராட்ட வீரர்கள் இருந்த சிறையாகும்.

இதற்கிடையில், ஆர்க்கிபால்ட் பிளேயர் ஏற்கனவே 1795 இல் இங்கிலாந்து திரும்பியிருந்தார், மேலும் 1799 இல் லண்டன் ராயல் சொசைட்டி முன் அந்தமான் தீவுகளின் ஆய்வறிக்கையை சமர்ப்பித்ததாக அறியப்படுகிறது.

ஏகாதிபத்திய சோழர்கள் மற்றும் ஸ்ரீவிஜயாவுடன் போர்ட் பிளேயரின் தொடர்பு என்ன?

11 ஆம் நூற்றாண்டின் சோழப் பேரரசர் முதலாம் ராஜேந்திரனால் இன்றைய இந்தோனேசியாவில் உள்ள ஸ்ரீவிஜயா மீது தாக்குதல் நடத்த அந்தமான் தீவுகள் ஒரு மூலோபாய கடற்படை தளமாக பயன்படுத்தப்பட்டதாக சில வரலாற்று பதிவுகள் தெரிவிக்கின்றன. கி.பி 1050 தஞ்சாவூரில் கிடைத்த கல்வெட்டின்படி, சோழர்கள் தீவை மா-நக்கவரம் நிலம் (பெரிய திறந்த / வெற்று நிலம்) என்று குறிப்பிட்டனர், இது ஆங்கிலேயர்களின் கீழ் நிக்கோபார் என்ற நவீன பெயருக்கு வழிவகுத்தது.

வரலாற்றாசிரியர் ஹெர்மன் குல்கே, தான் இணைந்து எழுதிய நாகப்பட்டினம் முதல் சுவர்ணத்வீபா வரை: தென்கிழக்கு ஆசியாவிற்கான சோழர்களின் கடற்படைப் பயணங்களின் பிரதிபலிப்புகள் (2010) என்ற புத்தகத்தில் குறிப்பிட்டுள்ளபடி, ஸ்ரீவிஜயா மீதான சோழர் படையெடுப்பு இந்தியாவின் வரலாற்றில் ஒரு தனித்துவமான நிகழ்வாகும், மேலும் "தென்கிழக்கு ஆசியாவின் அரசுகளுடனான சோழர்களின் அமைதியான உறவுகள் சுமார் ஆயிரம் ஆண்டுகளாக இந்தியாவின் வலுவான கலாச்சார செல்வாக்கின் கீழ் வந்தன."

ஸ்ரீவிஜயா மீதான தாக்குதலுக்கான காரணம் குறித்து பல அறிஞர்கள் ஊகித்துள்ளனர். நீலகண்ட சாஸ்திரி, சோழர்களைப் பற்றிய தனது படைப்பில், “கிழக்கு நாடுகளுடனான சோழர் வணிகத்தின் வழியில் தடைகளை ஏற்படுத்துவதற்கு ஸ்ரீவிஜயாவின் தரப்பில் ஏதேனும் முயற்சிகள் இருந்ததாக நாம் கருத வேண்டும், அல்லது அதற்கும் மேலாக, உள்நாட்டில் அனைவருக்கும் நன்கு தெரிந்த விஷயமான, முதலாம் ராஜேந்திரன் தனது திக்விஜயத்தை கடலுக்கு அப்பால் உள்ள நாடுகளுக்கு விரிவுபடுத்திய வகையில், வெறுமனே ஒரு ஆசை இருந்திருக்கலாம், திக்விஜயம் மூலம் ராஜேந்திர சோழன் அவரது கிரீடத்திற்கு மேலும் பிரகாசம் சேர்த்தார்,” என்று குறிப்பிட்டுள்ளார். அமெரிக்க வரலாற்றாசிரியர் ஜி டபிள்யூ ஸ்பென்சர் போன்றவர்கள் ஸ்ரீவிஜய பயணத்தை பல தசாப்தங்களாக தென்னிந்தியா மற்றும் இலங்கையின் பிற சாம்ராஜ்யங்களுடனான போர்களில் உச்சக்கட்டத்தை அடைந்த சோழ விரிவாக்கத்தின் ஒரு பகுதியாக விளக்குகிறார்கள்.

கல்வெட்டுக் குறிப்புகளின்படி, ஸ்ரீவிஜயாவைத் தாக்கிய பிறகு, முதலாம் ராஜேந்திர சோழன் சங்கராம விஜயொத்துங்கவர்மனைக் கைப்பற்றினார், மேலும் புத்த சாம்ராஜ்யத்திலிருந்து ஏராளமான பொக்கிஷங்களை கொள்ளையடித்தார், இதில் ஸ்ரீவிஜயாவின் நகைகள் நிறைந்த போர் வாசலான வித்யாதர தோரணமும் அடங்கும்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“