டிரம்ப் கூறிய 21 மில்லியன் டாலர் இந்தியாவுக்கு அல்ல, வங்க தேசத்திற்கு கொடுக்கப்பட்டது; உண்மை சரிபார்ப்பு

Jay Mazoomdaar

டிரம்ப் நிர்வாகத்தின் அரசாங்க செயல்திறன் துறை (DOGE) பிப்ரவரி 16 அன்று பல திட்டங்களுக்கான நிதியுதவி "ரத்து" செய்யப்பட்டதாக அறிவித்த நிலையில், "இந்தியாவில் வாக்குப்பதிவை அதிகரிக்க $21 மில்லியன்" அமெரிக்க நிதியுதவியை (USAID) குறிப்பிட்டு, இந்தியாவின் தேர்தல் செயல்பாட்டில் எதிர்க்கட்சியான காங்கிரஸ் வெளிப்புற செல்வாக்கைப் பயன்படுத்தியதாக ஆளும் பா.ஜ.க குற்றம் சாட்டியுள்ளது.

இந்தச் செய்தியை ஆங்கிலத்தில் படிக்க கிளிக் செய்யவும்

மியாமியில் புதன்கிழமை ஆற்றிய உரையில் டிரம்ப் இவ்வாறு கூறினார்: “இந்தியாவில் வாக்குப்பதிவை அதிகரிக்க நாம் ஏன் 21 மில்லியன் டாலர்களை செலவிட வேண்டும்? ஆஹா, $21 மில்லியன்! அவர்கள் வேறு யாரையாவது தேர்ந்தெடுக்க முயற்சிக்கிறார்கள் என்று நினைக்கிறேன்.”

இது பல்வேறு சர்ச்சைகளை கிளப்பியது.

இந்தியன் எக்ஸ்பிரஸ் மூலம் அணுகப்பட்ட பதிவுகள், அந்த $21 மில்லியன், 2022 இல் இந்தியாவிற்கு அல்ல, பங்களாதேஷிற்கு அனுமதிக்கப்பட்டது என்று காட்டுகின்றன.
இதில், 2024 ஜனவரி தேர்தலுக்கு முன்னதாக பங்களாதேஷ் மாணவர்களிடையே "அரசியல் மற்றும் குடிமை ஈடுபாட்டிற்காக" $13.4 மில்லியன் ஏற்கனவே வழங்கப்பட்டுள்ளது மற்றும் ஷேக் ஹசீனா வெளியேற்றப்படுவதற்கு ஏழு மாதங்களுக்கு முன்பு, இந்தத் தேர்தல்களின் நேர்மையை கேள்விக்குறியாக்கும் திட்டங்களுக்கு வழங்கப்பட்டது.

சர்ச்சையின் மையத்தில், "சிக்கலான ஜனநாயகம், உரிமைகள் மற்றும் ஆளுகை நிகழ்ச்சிகளில்" நிபுணத்துவம் பெற்ற வாஷிங்டன் டி.சி.,ஐ தளமாகக் கொண்ட ஒரு குழுவான தேர்தல்கள் மற்றும் அரசியல் செயல்முறை வலுப்படுத்துதல் (CEPPS) கூட்டமைப்பு மூலம், அரசாங்க செயல்திறன் துறையின் பட்டியலில் உள்ள இரண்டு அமெரிக்க நிதியுதவி மானியங்கள் அனுப்பப்பட்டன.

CEPPS ஆனது USAID இலிருந்து மொத்தம் $486 மில்லியன் பெறுவதாக இருந்தது. அமெரிக்க செயல்திறன் துறையின் படி இந்த தொகுப்பில், மால்டோவாவில் "உள்ளடக்கிய மற்றும் பங்கேற்பு அரசியல் செயல்முறைக்கு" $22 மில்லியன்; மற்றும் "இந்தியாவில் வாக்குப்பதிவை அதிகரிக்க" $21 மில்லியன் ஆகியவை அடங்கும்.

மால்டோவாவில் "உள்ளடக்கிய மற்றும் பங்கேற்பு அரசியல் செயல்முறையை" "ஊக்குவிப்பதற்கு" செப்டம்பர் 2016 இல் CEPPS க்கு முதலாவது மானியம் வழங்கப்பட்டது. ஃபெடரல் விருது அடையாள எண் AID117LA1600001 (மானியத்திற்கான குறிப்பிட்ட ஐ.டி) உடன், இது ஜூலை 2026 வரை இயங்கும் மற்றும் இதுவரை $13.2 மில்லியன் வழங்கப்பட்டுள்ளது.

பங்களாதேஷ் அரசியல் திட்டம்

இருப்பினும், அமெரிக்க செயல்திறன் துறை சுட்டிக்காட்டிய USAID $21-மில்லியன் மானியம் பங்களாதேஷுக்கானது. இவற்றைக் கருத்தில் கொள்ளுங்கள்:

* ஒவ்வொரு கூட்டாட்சி மானியமும் ஒரு குறிப்பிட்ட செயல்திறன் இடத்தின் பெயரில் வருகிறது - மானியம் செலவழிக்கப்பட வேண்டிய நாடு. அமெரிக்க கூட்டாட்சி செலவினங்களின் அதிகாரப்பூர்வ திறந்த தரவு மூலத்தின்படி, 2008 முதல் இந்தியாவில் USAID நிதியளிக்கப்பட்ட CEPPS திட்டம் எதுவும் இல்லை.

* CEPPSக்கான தற்போதைய ஒரே USAID மானியம் $21 மில்லியன் (ஃபெடரல் விருது அடையாள எண் 72038822LA00001) மதிப்பிலானது மற்றும் வாக்களிக்கும் நோக்கத்துடன் USAID இன் அமர் வோட் அமருக்கு (எனது வாக்கு என்னுடையது) ஜூலை 2022 இல் அனுமதிக்கப்பட்டது. இது வங்கதேசத்தில் ஒரு திட்டம் ஆகும்.

* நவம்பர் 2022 இல், இந்த மானியத்தின் நோக்கம் "USAID's Nagorik (Citizen) திட்டம்" என மாற்றப்பட்டது. டாக்காவில் உள்ள USAID அரசியல் செயல்முறைகள் ஆலோசகர் 2024 டிசம்பரில் அமெரிக்கப் பயணத்தில் இருந்தபோது சமூக ஊடகங்களில் இதை உறுதிப்படுத்தினார்: "USAID-ன் $21 மில்லியன் CEPPS/Nagorik (நாகோரிக்) திட்டம்... நான் நிர்வகிக்கிறேன்."

ஜூலை 2025 வரை மூன்று ஆண்டுகளுக்கு இயக்கப்படும், இந்த மானியம் ஏற்கனவே $13.4 மில்லியன் செலவழித்துள்ளதாக பதிவுகள் காட்டுகின்றன.

ஜூலை 2022 மற்றும் அக்டோபர் 2024 க்கு இடையில், இந்த $21-மில்லியன் மானியம் ஆறு துணை மானியங்களாகப் பிரிக்கப்பட்டது: மூன்று CEPPS உறுப்பினர் அமைப்புகளான தேர்தல் அமைப்புகளுக்கான சர்வதேச அறக்கட்டளை (IFES); சர்வதேச குடியரசு நிறுவனம் (IRI); மற்றும் தேசிய ஜனநாயக நிறுவனம் (NDI) ஆகியவற்றிற்கு தலா இரண்டு வழங்கப்பட்டது.

IFES ஆர்லிங்டன், வர்ஜீனியாவில் உள்ளது; IRI மற்றும் NDI ஆகியவை வாஷிங்டனில் தங்கள் தலைமையகத்தைக் கொண்டுள்ளன.

தொடர்பு கொண்டபோது, IFES செய்தித் தொடர்பாளர் கருத்து தெரிவிக்க மறுத்துவிட்டார்.

என்.டி.ஐ மற்றும் ஐ.ஆர்.ஐ.,க்கு அனுப்பப்பட்ட கேள்விகளுக்கு பதிலளிக்கப்படவில்லை.

இந்த துணை மானியங்களில் சில பங்களாதேஷில் எவ்வாறு செலவிடப்பட்டன என்பதை பிரச்சாரப் பொருட்கள் மற்றும் சமூக ஊடக பதிவுகள் காட்டுகின்றன.

‘தாராளமான’ ஆதரவு: ஜனநாயக அமர்வுகளுக்கான கருத்துக் கணிப்பு

ஆகஸ்ட் 5 அன்று ஷேக் ஹசீனா வெளியேற்றப்பட்ட ஒரு மாதத்திற்குப் பிறகு செப்டம்பர் 11, 2024 அன்று, டாக்கா பல்கலைக்கழகத்தின் மைக்ரோ கவர்னன்ஸ் ரிசர்ச் (எம்.ஜி.ஆர்) திட்டமும், எம்.ஜி.ஆரின் இயக்குநர் இணைப் பேராசிரியர் அய்னுல் இஸ்லாமும் ஒரே மாதிரியான இரண்டு செய்திகளை ஃபேஸ்புக் (Facebook) மற்றும் லிங்க்ட்இன் (LinkedIn) இல் வெளியிட்டனர்.

தலைப்பின் கீழ் "இது திடீர் 'வசந்தம்' அல்ல! “வணக்கம் பங்களாதேஷ் 2.0”, “பங்களாதேஷ் முழுவதிலும் உள்ள பல்கலைக்கழக வளாகங்களில் 544 இளைஞர் நிகழ்வுகள் மற்றும் நிகழ்ச்சிகள்” செப்டம்பர் 2022 முதல் இரண்டு ஆண்டுகளில் “இளைஞர் ஜனநாயக தலைமை மற்றும் குடிமை ஈடுபாட்டை மேம்படுத்துவதற்காக 221 செயல் திட்டங்கள் மற்றும் 170 ஜனநாயக அமர்வுகள் மூலம் 10,264 பல்கலைக்கழக இளைஞர்களை நேரடியாக சென்றடைந்தது!” எனப் பதிவிடப்பட்டுள்ளது.
"#Nagorik திட்டத்தின் கீழ் IFES மற்றும் USAID வங்காளதேசத்தின் தாராளமான ஆதரவு மற்றும் கூட்டாண்மை மூலம் இவை அனைத்தும் சாத்தியமானது" என்பதை அய்னுல் இஸ்லாம் தெளிவாக ஒப்புக்கொண்டார்.

அய்னுல் இஸ்லாம் IFES உடன் ஒரு மூத்த ஆலோசகர் (குடிமை மற்றும் இளைஞர் ஈடுபாடு) ஆவார். டிசம்பர் 2024 இல், அய்னுல் இஸ்லாம், "USAID மற்றும் IFES இன் ஆதரவுடன்" டாக்கா பல்கலைக்கழகத்தில் நிறுவப்பட்ட அப்ளைடு டெமாக்ரசி லேப்பின் (ADL) நிறுவன இயக்குநரானார்.

ஜனவரி 8, 2025 அன்று, அது முடிவடைவதற்கு சில நாட்களுக்கு முன்பு, USAID வங்காளதேசம் ஃபேஸ்புக்கில் பதிவிட்டிருந்தது: "புதிய பயன்பாட்டு ஜனநாயக ஆய்வகத்தை (ADL) வெளியிட டாக்கா பல்கலைக்கழகத்துடன் கூட்டாளியாக இருப்பதில் மகிழ்ச்சி அடைகிறேன்."

தி இந்தியன் எக்ஸ்பிரஸ் தொடர்பு கொண்டபோது, டாக்காவில் இருந்து தொலைபேசியில் பேசுகையில், CEPPS மூலம் நாகோரிக் திட்டத்திற்கு USAID நிதியளித்ததை அய்னுல் இஸ்லாம் உறுதிப்படுத்தினார்.

அமெரிக்கா அரசாங்க செயல்திறன் துறை அறிவித்த ரத்து குறித்து, அவர் கூறினார்: "இது ஒரு பின்னடைவு ஆனால் ஆய்வகம் பல்கலைக்கழக அமைப்பிற்குள் உள்ளது, இது தொடரும் என்று நாங்கள் நம்புகிறோம்."

பங்களாதேஷில் அரசியல் மாற்றத்திற்கான களத்தை அமைப்பதில் USAID இன் நாகோரிக் திட்டத்தின் தாக்கம் குறித்த அவரது லிங்க்ட்இன் பதிவு பற்றி கேட்டதற்கு, அய்னுல் இஸ்லாம் கூறினார்: “இரண்டையும் நேரடியாக இணைப்பது சரியாக இருக்காது. மாணவர்களிடையே ஜனநாயக விழிப்புணர்வை ஏற்படுத்துவதில் IFES சார்பாக நான் ஒரு சிறிய பங்கைக் கொண்டிருந்தேன், ஆனால் நாகோரிக் திட்டத்தின் முக்கிய அங்கம் IRI மற்றும் NDI (நிதியைப் பெற்ற CEPPS இன் உறுப்பினர் அமைப்புகள்) மூலம் மேற்கொள்ளப்பட்டது.

அது மட்டும் இல்லை.

டிசம்பர் 2, 2024 அன்று வாஷிங்டனில் உள்ள என்.டி.ஐ தலைமையகத்திற்குச் சென்ற பிறகு, டாக்காவில் உள்ள USAID இன் அரசியல் செயல்முறைகள் ஆலோசகர் லுபைன் சௌத்ரி மாசும், லிங்க்ட்இனில் ஒரு பதிவில், $21 மில்லியன் USAID உறுதிமொழியை உறுதிப்படுத்தினார்: “NDI பங்களாதேஷில் நாட்டில் இல்லை என்றாலும், USAID-ன் $21 மில்லியன் CEPPS/Nagorik திட்டத்தின் கீழ் IRI மற்றும் IFES உடன் இணைந்து மூன்று முக்கிய பங்குதாரர்களில் இதுவும் ஒன்றாகும். NDI... நான் நிர்வகிக்கும் CEPPS/Nagorik திட்டத்தின் கீழ் வங்கதேசத்தில் தேர்தலுக்கு முந்தைய மதிப்பீட்டு பணி (PEAM) மற்றும் தொழில்நுட்ப மதிப்பீட்டு பணி (TAM) ஆகியவற்றில் பங்கேற்றேன்.”

கருத்துக்கான கோரிக்கைக்கு சௌத்ரி மாசும் பதிலளிக்கவில்லை.

NDI மற்றும் IRI ஆல் வெளியிடப்பட்ட அறிக்கைகள், "நாட்டின் ஜனவரி 7, 2024 நாடாளுமன்றத் தேர்தலுக்கு முன்பும், தேர்தலின்போதும், அதற்குப் பின்னரும் சாத்தியமான தேர்தல் வன்முறை நிலைமைகளைக் கண்காணிக்க" வங்கதேசத்தில் தேர்தலுக்கு முந்தைய மதிப்பீட்டு பணி மற்றும் தொழில்நுட்ப மதிப்பீட்டு பணி ஆகியவற்றை கூட்டாக நடத்தியதாகக் காட்டுகின்றன.

அவாமி லீக் மீதான விமர்சனம்

மார்ச் 2024 இல் வெளியிடப்பட்ட இறுதி NDI-IRI தொழில்நுட்ப மதிப்பீட்டு பணி அறிக்கை குறிப்பிட்டது: “அரசு பாதுகாப்பு சேவைகள் மற்றும் பிற அரசாங்க நிறுவனங்கள் சில சமயங்களில் ஆளும் அவாமி லீக்கிற்கு ஆதரவாக தேர்தல் விதிகளை சமமற்ற முறையில் அமல்படுத்தியதாக பல பங்குதாரர்கள் நம்பகமான குற்றச்சாட்டுகளை முன்வைத்தனர். எதிர்க்கட்சி உறுப்பினர்களைக் கைது செய்வதற்கும் எதிர்க்கட்சி அரசியல் நடவடிக்கைகளைக் கட்டுப்படுத்துவதற்கும் அல்லது சீர்குலைப்பதற்கும் அரசாங்கத்தின் முயற்சிகளின் அளவு திருப்திகரமாக நியாயப்படுத்தப்படவில்லை மற்றும் தேர்தல் காலத்தில் அரசியல்மயமாக்கப்பட்ட சட்ட அமலாக்கத்தைப் பற்றிய பரவலான கருத்தை உருவாக்கியது.”

ஆகஸ்ட் 2023 இல் பங்களாதேஷில் ஐ.ஆர்.ஐ நாடு தழுவிய கருத்துக் கணிப்பு ஒன்றை நடத்தியது, அதில் பெரும்பான்மையான பங்களாதேசியர்கள் நாடு "தவறான திசையில் செல்கிறது" என்று கருத்து தெரிவித்தனர்.

DOGE இன் ரத்து செய்யப்பட்ட மானியங்களின் பட்டியலில் "வங்காளதேசத்தில் அரசியல் நிலப்பரப்பை வலுப்படுத்துவதற்காக" டெமாக்ரசி இன்டர்நேஷனலுக்கு (DI) $29.9 மில்லியன் USAID நிதியுதவியும் அடங்கும். 2017 இல் வழங்கப்பட்டது, இந்த மானியம் அக்டோபர் 2025 இல் முடிவடையும். டெமாக்ரசி இன்டர்நேஷனலின் டாக்கா அலுவலகம் கருத்து தெரிவிக்க மறுத்துவிட்டது.

USAID மற்றும் CEPPS தங்கள் இணையதளங்களை மூடிவிட்ட நிலையில், எக்ஸ் பக்கத்தில் கேட்கப்பட்ட கேள்விக்கு DOGE பதிலளிக்கவில்லை.

வெளிவிவகார அமைச்சகத்தின் அதிகாரியை தொடர்பு கொண்டபோது, கருத்து தெரிவிக்க மறுத்துவிட்டார்.

டெல்லியில் உள்ள வங்காளதேச தூதரகத்தின் செய்தித் தொடர்பாளர் குறிப்பிட்ட USAID திட்டங்கள் குறித்து கருத்து தெரிவிக்க மறுத்துவிட்டார், ”ஆனால் USAID நீண்டகாலமாக பங்களாதேஷின் முக்கிய வளர்ச்சி பங்காளியாக இருந்து வருகிறது, நிர்வாகத்துடன் தொடர்புடைய பல்வேறு சேவைத் துறைகளை மேம்படுத்துவதற்கும் ஜனநாயகத்தை மேம்படுத்துவதற்கும் உதவுகிறது. கடந்த செப்டம்பரில், USAID இடைக்கால அரசாங்கத்துடன் $200 மில்லியன் மதிப்பிலான வளர்ச்சி ஒப்பந்தத்தில் கையெழுத்திட்டது. இருப்பினும், ஜனாதிபதி டிரம்பின் புதிய கொள்கையின் கீழ், அமெரிக்க அரசாங்கம் உலகம் முழுவதும் USAID இன் நிதியுதவியை மறு மதிப்பீடு செய்து வருகிறது. பங்களாதேஷ் மற்றும் பரந்த உலகத்தின் முன்னேற்றத்திற்காக டிரம்ப் நிர்வாகம் இந்த கொள்கை மாற்றத்தை மறுபரிசீலனை செய்யும் என்று இடைக்கால அரசாங்கம் நம்புகிறது,” என்று அவர் கூறினார்.