டிரம்பின் வெற்றி: இந்தியா-அமெரிக்கா வர்த்தகத்தில் பாதிப்பு இருக்குமா?

அமெரிக்காவின் 47-வது அதிபராக டொனால்ட் டிரம்ப் வெற்றி பெற்றுள்ளார். இதன் மூலம் இந்தியா மற்றும் அமெரிக்கா இடையேயான வர்த்தகத்தில் மாற்றம் இருக்கலாம் என வல்லுநர்கள் கூறுகின்றனர். 

முன்னதாக வர்த்தகத்தை பொறுத்தவரை இந்தியா துஷ்பிரயோகம் செய்வதாக டொனால்ட் டிரம்ப் குற்றஞ்சாட்டியிருந்தார். இந்நிலையில், அவர் தனது பதவிக் காலத்தின் முதல் பகுதியில் வர்த்தகத்திற்கான வரிகளை உயர்த்த முடியும் என்றும்,  75 பில்லியன் டாலர் மதிப்புள்ள இந்திய ஏற்றுமதிகள் மீது அதிக வரிகளை விதிக்கலாம் என்றும் கருதப்படுகிறது.

ஆங்கிலத்தில் படிக்கவும்: US elections results: What Trump 2.0 could mean for US-India trade

டிரம்ப் இதற்கு முன்பு அதிபராக இருந்த போது, பாதுகாப்புவாதம் மற்றும் தனிமைப்படுத்தல் மீதான சாய்வின் கீழ், உலக வர்த்தக அமைப்பின் விதிகளை நீக்கிவிட்டு, போர்க்கால அடிப்படையிலான வர்த்தக விதிகளை பின்பற்றினார். இது பைடன் பொறுப்பேற்ற பின்னர் திரும்பப்பெறப்பட்டது. 

2019 ஆம் ஆண்டில், பல தசாப்தங்கள் பழமையான பொதுமைப்படுத்தப்பட்ட விருப்பத்தேர்வுகள் திட்டத்தின் கீழ் வரி இல்லாத அணுகலை இந்தியா இழந்தது. முன்னதாக அதன் மிகப்பெரிய பயனாளியாக இந்தியா இருந்தது. அமெரிக்காவிற்கான இந்தியாவின் ஏற்றுமதியில் சுமார் 5.7 பில்லியன் டாலர்கள் சுங்கவரி இல்லாத பலன்கள் குவிந்தன.

பெர்ன்ஸ்டீன் ஆராய்ச்சியின்படி, டிரம்பின் வெற்றி வர்த்தக ரீதியாக சீனாவைத் தாக்கும் எனவும், ஆனால் இந்தியாவிற்கான நன்மைகள் "வரையறுக்கப்பட்டதாக" இருக்கலாம் எனவும் தெரிவிக்கப்பட்டுள்ளது. ஏனெனில் அது புதுப்பிக்கப்பட்ட வரிகள் அழுத்தத்தின் கீழ் வரக்கூடும். இந்தியாவில் நடுத்தர வர்க்க நுகர்வுகளை பாதிக்கும் என்று ஆய்வுக் குறிப்பு கூறுகிறது.

அமெரிக்காவிற்கான இந்திய மருந்து ஏற்றுமதிகள் பின்னடைவைச் சந்திக்கக்கூடும், மேலும் H-1B விசாக்கள் மீதான நிலைப்பாடு கடினப்படுத்தப்படுவதால் ஐடி சேவை நிறுவனங்களுக்கு லாபம் குறையலாம் என எதிர்பார்க்கப்படுகிறது. எனினும், வரிக் கொள்கைகள் மற்றும் பெருநிறுவன பணப்புழக்கங்களில் அவற்றின் செல்வாக்கு ஆகியவை தாக்கத்தை சமநிலைப்படுத்த உதவும் என்று அறிக்கை கூறுகிறது.

"ஒட்டுமொத்தமாக ரூபாய் மதிப்பு குறைவதைக் காண வாய்ப்புள்ளதாகவும், பணவீக்கம் மற்றும் விகிதங்கள் நீண்ட காலத்திற்கு அதிகமாக இருக்கும்" என்றும் அறிக்கை கூறியுள்ளது.

அமெரிக்காவுடனான வர்த்தகம் ஏன் முக்கியத்துவம் வாய்ந்ததாக கருதப்படுகிறது?

அமெரிக்காவுடனான இந்தியாவின் வர்த்தகம் மிகப்பெரியதாக கருதப்படுகிறது. ஏறத்தாழ 120 மில்லியன் டாலர் மதிப்பு கொண்டதாக கூறப்படுகிறது இவை, சீனைவை விட சுற்று அதிகம். ஆனால், சீனாவை விட அமெரிக்காவுடனான வர்த்தகம் சாதகமாக உள்ளது. 

ஏற்றுமதியை பன்முகப்படுத்தும் முயற்சிகள் இருந்தபோதிலும், கடந்த பத்தாண்டுகளில் அமெரிக்காவை இந்தியா சார்ந்திருப்பது அதிகரித்துள்ளது. 2022-23 ஆண்டின் அதிகாரப்பூர்வ தரவுகளின் படி,  அமெரிக்கவுக்கான இந்தியாவின் ஏற்றுமதி பங்கு 18 சதவீதம். இது 2010-11 ஆம் ஆண்டுகளை கணக்கிடும் போது 10 சதவீதம் அதிகரித்துள்ளது. இவற்றுள் ஜவுளித்துறை, மின்னணு பொருள்கள் உள்ளிட்ட ஏற்றுமதிகள் அடங்கும்.

இதனிடையே, டிரம்பின் உறுதியளிக்கப்பட்ட வரி உயர்வுகள் சீனாவை பாதிக்கலாம். சீனா மற்றும் அமெரிக்காவின் வர்த்தக போர்,  சீனாவிலிருந்து முதலீடுகள் மற்றும் உற்பத்திகளை எடுத்துக்கொள்வதன் மூலம் இந்தியாவுக்கு பயனளிக்கும்.

பல ஆண்டுகளாக, இரண்டாம் உலகப் போருக்குப் பிறகு, குறிப்பாக 2001 இல் சீனா உலக வர்த்தக அமைப்பில் உறுப்பினரானதிலிருந்து, தாராளமய உலக வர்த்தக ஒழுங்கில் இருந்து அமெரிக்கா படிப்படியாக விலகியிருக்கிறது. சீனாவின் நுழைவு எதிர்பார்த்த பொருளாதார தாராளமயமாக்கலைத் தூண்டவில்லை; இது அரசு முதலாளித்துவத்தின் பரவலுக்கு வழிவகுத்தது. புதிய தடையற்ற வர்த்தக ஒப்பந்தங்களில் கையெழுத்திடுவதை அமெரிக்கா தவிர்த்துள்ளது. உலக வர்த்தக அமைப்பில் இருந்து முற்றிலும் விலக வேண்டும் என்ற அழைப்புகள் அதிகரித்துள்ளன.

டிரம்ப் தனது முதல் பதவிக் காலத்தில், நட்பு நாடுகளை குறிவைக்காத நடைமுறையை உடைத்து, இந்தியா மற்றும் பிற நாடுகளில் இருந்து எஃகு மீது 25% மற்றும் அலுமினியத்திற்கு 10% வரி விதிக்க தேசிய பாதுகாப்பு விதிகளை செயல்படுத்தினார். இந்த கட்டணங்களை உயர்த்துவதை விட இந்தியா மற்றும் ஐரோப்பிய ஒன்றியத்துடன் பேச்சுவார்த்தை நடத்த பைடன் முடிவு செய்தார்.

ஹார்லி-டேவிட்சன் போன்ற அமெரிக்க நிறுவனங்களை பாதிக்கும் இந்தியாவின் அதிக வரிகள் குறித்து டிரம்ப் பலமுறை தனது அதிருப்தியை வெளிப்படுத்தியுள்ளார். வியட்நாம், தாய்லாந்து மற்றும் மெக்சிகோ போன்ற நாடுகளுடன் ஒப்பிடுகையில், இந்தியாவில் சராசரி வரிகள் அதிகரித்துள்ளதாக அவர் கூறினார்.

இந்தியக் கொள்கை வகுப்பாளர்கள், வளர்ச்சியின் ஆரம்ப கட்டங்களில் உள்நாட்டுத் தொழில்துறையைப் பாதுகாக்க பெரும்பாலான நாடுகள் அதிக வரியை எழுப்பியுள்ளன என்றும், உற்பத்தியைத் தூண்டுவதில் இந்தியாவும் வேறுபட்டதல்ல என்றும் கூறுகின்றனர். அரசாங்கம் 14 முன்னுரிமைத் துறைகளுக்கு உற்பத்தி சார்ந்த ஊக்கத்தொகை  திட்டங்களை அறிமுகப்படுத்தியுள்ளது. மேலும், உள்ளூர் உற்பத்தியை அதிகரிக்க வரியை பயன்படுத்துகிறது. 

பைடன் அரசின் கீழும் அமெரிக்க பாதுகாப்புவாதம் வளர்ந்தது. வர்த்தக நடைமுறைகளை மேற்கோள் காட்டி, இந்த ஆண்டின் தொடக்கத்தில் சீன மின்சார வாகனங்கள் மீதான கட்டணங்களை 25% முதல் 100% வரை அதிகரித்தது. சில எஃகு மற்றும் அலுமினியப் பொருட்களின் மீதான கட்டணங்கள் 25% வரை அதிகரித்தன. இந்த அதிகரிப்புகள் இந்தியாவை நேரடியாக பாதிக்கவில்லை.

அமெரிக்க பணவீக்கம், ஜவுளி, ஆபரணங்கள் மற்றும் தோல் பொருட்கள் போன்றவற்றின் இந்திய ஏற்றுமதியை பாதிக்கலாம். அமெரிக்காவின் அதிக பணவீக்கம் இந்தியாவை விகிதாச்சாரத்தில் பாதிக்கிறது. ஏனெனில், பெரும்பாலான இந்திய ஏற்றுமதிகளிலும் கிட்டத்தட்ட 20% அமெரிக்க பங்கு வகிக்கிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“