வஹீதா ரஹ்மானுக்கு தாதாசாகேப் பால்கே விருது; அவரது படங்கள் ‘இந்தியப் பெண்களை’ எவ்வாறு பிரதிபலித்துள்ளன?

Arushi Bhaskar

பழம்பெரும் பாலிவுட் நடிகை வஹீதா ரஹ்மான் (85) மத்திய தகவல் மற்றும் ஒளிபரப்பு அமைச்சகத்தின் (I&B) திரைப்பட விழாக்கள் இயக்குநரகத்தால் "இந்திய சினிமாவின் வளர்ச்சி மற்றும் மேம்பாட்டிற்கான சிறந்த பங்களிப்பிற்காக" வழங்கப்படும் 2021 ஆம் ஆண்டிற்கான தாதாசாகேப் பால்கே விருது பெற்றுள்ளார்.

ஆங்கிலத்தில் படிக்க: Waheeda Rehman conferred with Dadasaheb Phalke Award: How her films have depicted the ‘Bharatiya Nari’

தேசிய திரைப்பட விருது வழங்கும் விழாவில் இந்த விருது வழங்கப்படுகிறது. 2021 விருதுகள் கோவிட்-19 தொற்றுநோய் காரணமாக தாமதமானதால் இந்த ஆண்டு வழங்கப்பட்டன.

X தளத்தில் வஹீதா ரஹ்மானின் தேர்வை அறிவிக்கும் போது, ​​ மத்திய தகவல் மற்றும் ஒளிபரப்பு அமைச்சர் அனுராக் தாக்கூர், பாராளுமன்றத்தில் சமீபத்தில் நிறைவேற்றப்பட்ட மகளிர் இடஒதுக்கீடு மசோதாவுடன் இந்த விருதை இணைத்தார். மேலும், அவருக்கு இந்த வாழ்நாள் சாதனையாளர் விருது வழங்கப்படுவது, இந்திய சினிமாவின் முன்னணி பெண்மணிகளில் ஒருவருக்கும், திரைப்படங்களுக்குப் பிறகு தனது வாழ்க்கையை ஏழைகளுக்கு உதவுதல் மற்றும் சமூகத்தின் சிறந்த நன்மைக்காக அர்ப்பணித்த ஒருவருக்கும் செய்யும் பொருத்தமான அஞ்சலியாகும், என்று பதிவிட்டுள்ளார்.

பிரதமர் நரேந்திர மோடியும் வாழ்த்து தெரிவித்துள்ளார். “இந்திய சினிமாவில் அவரது பயணம் அழியாத முத்திரையை பதித்துள்ளது. திறமை, அர்ப்பணிப்பு மற்றும் கருணை ஆகியவற்றின் கலங்கரை விளக்கமாக, அவர் நமது சினிமா பாரம்பரியத்தின் சிறந்ததை உள்ளடக்குகிறார்,” என்று மோடி X தளத்தில் பதிவிட்டுள்ளார்.

யார் இந்த வஹீதா ரஹ்மான்?

பிப்ரவரி 3, 1938 இல் பிறந்த வஹீதா ரஹ்மான், தெலுங்கு சமூக நாடகமான ரோஜுலு மராயியில் நடனக் கலைஞராக அறிமுகமான 1955 ஆம் ஆண்டு முதல் இந்தியத் திரையுலகில் பணியாற்றி வருகிறார். வஹீதா ரஹ்மானுடனான உரையாடல்கள் என்ற தனது வாழ்க்கை வரலாற்றில், எழுத்தாளர் நஸ்ரீன் முன்னி கபீர், படத்தின் ‘எருவாக்கோ சாகரோ ரன்னோ சின்னண்ணா’ என்ற பாடல் பெரிய ஹிட் ஆனதாகவும், படத்தின் முன்னணி நட்சத்திரங்களான அக்கினேனி நாகேஸ்வர ராவ் மற்றும் சவுகார் ஜானகி ஆகியோரைப் போலவே வஹீதா ரஹ்மான் பிரபலமானதாகவும் எழுதியுள்ளார்.

வஹீதா ரஹ்மான் கபீரிடம் கூறுகிறார்: “படம் மிகப் பெரிய வெற்றி பெற்றது. அதன் வெற்றியைக் கொண்டாட ஆந்திரா முழுவதும் நடிகர்கள் அழைக்கப்பட்டனர், சுற்றுப்பயணத்தின் முடிவில் நாங்கள் ஹைதராபாத் வந்தோம். அங்குதான் குருதத்ஜியை முதன்முதலில் சந்தித்தேன்.”

வஹீதா ரஹ்மான் மேலும் கூறுகிறார்: "ரோஜுலு மராயி என்றால் 'நாட்கள் மாறிவிட்டன', மற்றும் தலைப்பு என் வாழ்க்கையில் அந்த தருணத்தை சரியாக விவரிக்கிறது.”

அந்த நேரத்தில் ஒரு முன்னணி ஹிந்தித் திரைப்பட ஆளுமை குரு தத்தை சந்தித்த பிறகு, வஹீதா ரஹ்மான் இறுதியில் பம்பாய்க்குச் சென்று ராஜ் கோஸ்லாவின் சி.ஐ.டி-யில் (1956) நடித்தார், அதில் அவர் மேட்டினி நாயகன் தேவ் ஆனந்துக்கு எதிரான ஒரு 'வில்லி' கதாபாத்திரத்தில் நடித்தார். இப்படம் அந்த வருடத்தில் அதிக வசூல் செய்த படமாக அமைந்தது.

குரு தத் இயக்கி மற்றும் முக்கிய பாத்திரத்தில் நடித்த, வஹீதா ரஹ்மானின் அடுத்த திரைப்படமான பியாசா (1957), படத்தில் வஹீதா விலைமாதர் கதாபாத்திரத்தில் நடித்தது விமர்சன ரீதியாக பாராட்டைப் பெற்றது. 1950கள் மற்றும் 60 களில் வஹீதா மிகவும் விரும்பப்பட்ட முன்னணி நடிகைகளில் ஒருவராக மாறினார், இந்த காலகட்டம் பெரும்பாலும் 'ஹிந்தி சினிமாவின் பொற்காலம்' என்று குறிப்பிடப்படுகிறது.

1971 இல், சுனில் தத் இயக்கிய மற்றும் இணைந்து நடித்த காதல் கதையான ரேஷ்மா அவுர் ஷெராவுக்காக வஹீதா சிறந்த நடிகைக்கான தேசிய விருதை வென்றார். பலமுறை பிலிம்பேர் விருதுகளுக்கு பரிந்துரைக்கப்பட்ட வஹீதா, கைடு (1965) மற்றும் நீல் கமல் (1968) ஆகிய படங்களுக்காக அந்த விருதை வென்றுள்ளார்.

காகஸ் கே பூல் (1959), சாஹிப் பீபி அவுர் குலாம் (1962), சத்யஜித் ரே இயக்கிய அபிஜான் (1962), தீஸ்ரீ கசம் (1966), ராம் அவுர் ஷியாம் (1967), காமோஷி (1969) கபி கபி (1976), நம்கீன் (1982), லாம்ஹே (1991), 15 பார்க் அவென்யூ (2005), ரங் தே பசந்தி (2006), மற்றும் விஸ்வரூபம் II (2018) ஆகியவை வஹீதாவுக்கு பாராட்டைப் பெற்றுத் தந்த மற்ற படங்கள்.

வஹீதா ரஹ்மானின் பாத்திரங்கள் பெண்மையின் மாறிவரும் அம்சங்களை எவ்வாறு பிரதிபலித்துள்ளன?

60 களில் தனது சினிமா வாழ்க்கையின் உச்சத்தில் வஹீதா ரஹ்மான் அபரிமிதமான நட்சத்திர சக்தியைப் பெற்றார். அந்தக் காலத்தின் பல படங்களில், அவர் தனது ஆண் சக நடிகர்களை விட அதிக சம்பளம் பெற்றார்; சில எடுத்துக்காட்டுகளில் நீல் கமல், ஷகூன் (1964), பத்தர் கே சனம் (1967), மற்றும் காமோஷி (1969) ஆகிய படங்கள் அடங்கும்.

அவரது பல படங்களில் அவர் வழக்கத்திற்கு மாறான முன்னணி கதாபாத்திரங்களில் நடித்தார், ஒவ்வொரு முயற்சியிலும் பிரதான ஹிந்தி படங்களின் எல்லைகளைத் தள்ளினார். பியாசாவில், அவர் இந்தி சினிமாவில் 'தங்க இதயம் கொண்ட விலைமாதர்' (பாலியல் தொழிலாளி அல்லது விலைமாதர் இரக்கம், பெருந்தன்மை மற்றும் நேர்மை போன்ற நற்பண்புகளைக் காட்டுகிறார்) என்ற தொனியை முழுமையாக்கினார், மேலும் பின்னர் வந்த படங்களுக்கான தரத்தை அமைத்தார். பகீசா (1970), உம்ராவ் ஜான் (1981), கங்குபாய் கத்தியவாடி (2022) மற்றும் பல.

அவரது மிகவும் பிரபலமான ’கைடு’ திரைப்படத்தில், வஹீதா ரஹ்மான், தனது குழந்தை தன்னைப்போல் மாறாமல் அவளது தலைவிதியைத் தவிர்க்க விரும்பும் ஒரு விலைமாதரின் மகளாக ரோஸி என்ற கதாப்பாத்திரத்தில் நடித்தார். ஆனால் தோழமையை விட மரியாதையில் அதிக அக்கறை கொண்ட தொல்பொருள் ஆராய்ச்சியாளரை திருமணம் செய்து கொண்ட ரோஸி, திருமண வாழ்க்கையில் கசப்பை சந்தித்தாள். ஒரு வியத்தகு காட்சிக்குப் பிறகு அவள் தன் கணவனுக்கு எதிராகப் பேசுவதையும், ஒரு சுற்றுலா வழிகாட்டியுடன் ஓடிப்போவதையும், வெற்றிகரமான நடனக் கலைஞராக மாறுவதையும் படம் காட்டுகிறது.

அவரும் தனது சொந்த லாபத்திற்காக அவளைப் பயன்படுத்துகிறார் என்பதை உணர்ந்தவுடன், அவள் பின்னர் தனது வாழ்க்கையிலிருந்து சுற்றுலா வழிகாட்டியையும் தூக்கி எறிகிறாள். இன்றும் கூட, ஒரு முக்கிய ஹிந்தி திரைப்படத்தில் ஒரு பெண் தன் கணவன் மற்றும் காதலன் இருவரையும் விட்டு வெளியேறுவது ஒரு பரபரப்பை ஏற்படுத்தும், ஆனால் வஹீதா ரஹ்மானின் ரோஸி அதை 1965 இல் செய்தார்.

வஹீதா ரஹ்மான், ரேஷ்மா அவுர் ஷேராவுக்காக தேசிய விருதை வென்றார், இதில் அவர் ஒரு தைரியமான ராஜஸ்தானி பெண்ணாக நடித்தார், அவர் எதிர் குலத்தைச் சேர்ந்த ஒருவரைக் காதலிக்கத் துணிந்தார். அவரது நடிப்பு, உரையாடல் தொனி மற்றும் அவரது சக நடிகரான சுனில் தத்துடன் கெமிஸ்ட்ரி ஆகியவை நீடித்த தாக்கத்தை ஏற்படுத்தியது, மேலும் படத்தை ஒரு நிலையான ரோமியோ ஜூலியட் கதையிலிருந்து உயர்த்தியது.

குல்ஜாரின் நம்கீனில், ஹிமாச்சலப் பிரதேசத்தின் கிராமப்புறத்தில் உள்ள ஒரு சிறிய குடும்பத்தின் தலைவியான ஜுக்னியாக வஹீதா ரஹ்மான் நடித்தார். வஹீதா ரஹ்மான் தனது உற்சாகமான நடிப்பின் மூலம், பெண்கள் எவ்வாறு தன்னிறைவு பெற முடியும் என்பதையும், மனைவிகள் தங்கள் குழந்தைகளை கஷ்டங்களிலிருந்து பாதுகாக்க கணவனுக்கு எதிராக எவ்வளவு அடிக்கடி போராட வேண்டும் என்பதையும் காட்டினார்.

பெண்மையின் கவலைகளுடன் அவர் போராடுவதைக் காட்டும் மற்ற படங்கள் காமோஷி ஆகும், இதில் அவர் ஒரு மனநல மருத்துவமனையில் பணிபுரியும் செவிலியராக நடித்துள்ளார், இது தனது பணி வாழ்க்கையை தனது ஆன்மாவிலிருந்து பிரிக்க முடியாத கதாபாத்திரம் ஆகும்; அதிகம் அறியப்படாத ஜிந்தகி ஜிந்தகி (1972), படத்தில் அவர் சாதி வேறுபாடுகளால் திருமணம் செய்து கொள்ள முடியாத தனது முன்னாள் காதலருடன் மீண்டும் இணைந்த ஒற்றைத் தாயாக நடித்தார்; மற்றும் 15 பார்க் அவென்யூ, படத்தில் அவர் ஸ்கிசோஃப்ரினியா நோயால் பாதிக்கப்பட்ட தனது மகளை பராமரிக்கும் வயதான தாயாக நடித்துள்ளார்.

தாதாசாகேப் பால்கே விருது என்றால் என்ன? கடந்த காலத்தில் பெண்களை எப்படி அங்கீகரித்துள்ளது?

இந்திய சினிமாவிற்கு திரைப்பட தயாரிப்பாளர் தாதாசாகேப் பால்கேயின் பங்களிப்பை நினைவுகூரும் வகையில் 1969 ஆம் ஆண்டு இந்த விருது உருவாக்கப்பட்டது. இந்தியாவின் முதல் முழு நீள திரைப்படமான ராஜா ஹரிச்சந்திராவை 1913 இல் தாதாசாகேப் பால்கே இயக்கினார், இது உலகின் மிகப்பெரிய திரைப்படத் துறையின் அடித்தளத்தை அமைத்தது.

இந்த விருது ஸ்வர்ண கமல் (தங்க தாமரை) பதக்கம், சால்வை மற்றும் ரூ.10 லட்சம் ரொக்கப் பரிசு ஆகியவற்றை உள்ளடக்கியது. முதல் பெற்றவர் தேவிகா ராணி, அவர் 'இந்திய சினிமாவின் முதல் பெண்மணி' என்று பரவலாக ஒப்புக் கொள்ளப்பட்டார், மேலும் அவரது தயாரிப்பு நிறுவனமான பாம்பே டாக்கீஸ் மூலம் இந்தியாவில் சில ஆரம்பகால வெற்றிப் படங்களுக்குப் பின்னால் ஒரு முன்னோடி சக்தியாக இருந்தார்.

தேவிகா மற்றும் அசோக் குமார் நடித்த அச்சுத் கன்யா (1936) பாம்பே டாக்கீஸ் படங்களில் மிகவும் பிரபலமானது. இது ஒரு தலித் பெண்ணுக்கும் ஒரு பிராமண பையனுக்கும் இடையிலான காதல் கதையை சித்தரித்தது, மேலும் நாட்டில் நிலவும் சாதிய படிநிலைகளை நேரடியாக சவால் செய்தது.

கடந்த ஆண்டு, பிரபல பாலிவுட் நடிகை ஆஷா பரேக், இந்தி சினிமா மற்றும் தொலைக்காட்சிக்கான தனது பங்களிப்பிற்காக விருதை வென்றார். அவர் 1952 இல் குழந்தை நடிகராக தனது வாழ்க்கையைத் தொடங்கினார் மற்றும் 60 களின் பிற்பகுதி மற்றும் 70 களில் பாலிவுட்டில் அதிக சம்பளம் வாங்கும் நடிகைகளில் ஒருவராக ஆனார்.

புகழ்மிக்க இந்த தாதாசாகேப் பால்கே விருது பெற்ற மற்ற பெண்களில் பாடும் ஜாம்பவான்களான லதா மங்கேஷ்கர் மற்றும் ஆஷா போஸ்லே; நடிகர்-தயாரிப்பாளர் துர்கா கோடே; சுலோச்சனா என்று நன்கு அறியப்பட்டு, மேலும் "இந்திய சினிமாவின் முதல் பாலின சின்னமாக" கருதப்படும் ரூபி மியர்ஸ்; மற்றும் "பெங்காலி சினிமாவின் முதல் பெண்மணி" என்று கருதப்படும் நடிகை-பாடகி-தயாரிப்பாளர் கனன் தேவி ஆகியோர் அடங்குவர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“