அமைச்சர் பதவியை பறித்த ரிஷி சுனக்: யார் இந்த தமிழ் வம்சாவளி சுயெல்லா பிரேவர்மேன்?

British PM Rishi Sunak | Suella Braverman | பிரிட்டிஷ் பிரதமர் ரிஷி சுனக், அந்நாட்டின் உள்துறை அமைச்சர் சுயெல்லா பிரேவர்மேன்-ஐ இன்று (நவ.13) பதவி நீக்கம் செய்து உத்தரவிட்டார்.
பிரேவர்மேனை பதவி நீக்கம் செய்ய எதிர்க்கட்சி மற்றும் ஆளுங்கட்சி உறுப்பினர்களின் அதிக அழுத்தம்தான் காரணம் எனக் கூறப்படுகிறது.

பிரேவர்மேன் என்ன சொன்னார்?

இந்திய தமிழ் வம்சாவளியை சேர்ந்த பிரேவர்மேன், நவ.8ஆம் தேதி டைம்ஸ் இதழில் கட்டுரை ஒன்று எழுதினார். அதில், “போராட்டங்களை கையாள்வதில் காவலர்கள் இரட்டை தன்மையை கடைப்பிடிப்பதாக குற்றஞ்சாட்டியிருந்தார்.
அதாவது தனது கட்டுரையில், “வலதுசாரி மற்றும் தேசியவாதிகள் ஆர்ப்பாட்டத்தில் ஈடுபட்டால் அவர்களுக்கு கடுமையான பதில் அளிக்கப்படுகிறது.
ஆனால், ஒரே மாதிரியான நடத்தையை வெளிப்படுத்தும் பாலஸ்தீனிய சார்பு கும்பல்கள், சட்டத்தை மீறும் போது கூட நடவடிக்கையில் இருந்து புறக்கணிக்கப்படுகின்றன. இந்த இரட்டை நிலைப்பாட்டை காவல்துறை அதிகாரிகளிடம் குறிப்பிட்டேன்” எனத் தெரிவித்திருந்தார்.

மேலும் இந்த ஆர்ப்பாட்டத்தில் ஈடுபட்ட நபர்களுக்கு ஹமாஸ் பயங்கரவாத இயக்கத்துடன் தொடர்பு இருப்பதாகவும், இவர்கள் போலீஸ், ராணுவத்தை வெறுக்கின்றனர் எனப் பொருள்படும்படியும் கூறியிருந்தார்.

பிரேவர்மேனின் கருத்துக்களால் மோதல்கள் தூண்டப்பட்டதாக எதிர்க்கட்சியான தொழிற்கட்சி குற்றம் சாட்டியது. கன்சர்வேடிவ் கட்சியின் உறுப்பினர்களும் அவரை விமர்சித்தனர்.
அமைச்சரை பதவி நீக்கம் செய்வதில் சுனக்கின் தாமதம் குறித்து விரக்தியை வெளிப்படுத்தினர். இது குறித்து ஒரு எம்.பி., தி கார்டியனிடம், "ஒவ்வொரு நாளும் அவர் பதவியில் இருப்பது பிரதமரின் அதிகாரத்தை மேலும் குறைமதிப்பிற்கு உட்படுத்துகிறது" எனக் கூறினார்.

பிரேவர்மேன் யார்?
பிரேவர்மேன் ஒரு கன்சர்வேடிவ் தலைவர் மற்றும் வழக்கறிஞர் ஆவார், அவர் 2015 இல் ஃபேர்ஹாமில் இருந்து இங்கிலாந்து பாராளுமன்றத்திற்கு தேர்ந்தெடுக்கப்பட்டார்.
2020 முதல் 2022 வரை இங்கிலாந்து மற்றும் வேல்ஸின் அட்டர்னி ஜெனரலாக பணியாற்றினார். அவர் ஐரோப்பிய ஒன்றியத்தை விட்டு வெளியேற வேண்டும் என்று பிரச்சாரம் செய்தார்.

முன்னாள் பிரதமர் தெரசா மேயின் கீழ் பிரெக்சிட் துறையில் இளநிலை அமைச்சராக பணியாற்றினார், ஆனால் அவரது முன்மொழியப்பட்ட பிரெக்சிட் ஒப்பந்தத்திற்கு எதிர்ப்பு தெரிவித்து ராஜினாமா செய்தார்.

2022 இல் இங்கிலாந்து பிரதமராக போரிஸ் ஜான்சனுக்குப் பதிலாக போட்டியிட்ட தலைவர்களில் பிரேவர்மேன் இருந்தார், ஆனால் இரண்டாவது சுற்றில் தோல்வியடைந்தார். அப்போதைய பிரதமர் லிஸ் டிரஸின் கீழ் அவர் உள்துறை அமைச்சராக நியமிக்கப்பட்டார், ஆனால் அரசாங்க விதிகளை "தொழில்நுட்ப" மீறல் காரணமாக விரைவில் ராஜினாமா செய்ய வேண்டியிருந்தது, பிரேவர்மேன் தனது தனிப்பட்ட மின்னஞ்சல் கணக்கிலிருந்து அதிகாரப்பூர்வ ஆவணத்தை அனுப்பினார்.

பிரேவர்மேனின் பெற்றோர் இந்திய வம்சாவளியைச் சேர்ந்தவர்கள். 1960 களில் இங்கிலாந்துக்கு குடிபெயர்ந்தனர். அவரது தாயார் மொரிஷியஸ் மற்றும் அவரது தந்தை கென்யாவைச் சேர்ந்தவர். அவரது தாயார் இந்து தமிழ் வம்சாவளியைச் சேர்ந்தவர், அவரது தந்தை கோவா வம்சாவளியைக் கொண்டவர்.

ஒரு அரசியல்வாதியாக, பிரேவர்மேன் பிரிட்டிஷ் காலனித்துவத்தைப் பாதுகாத்து, புலம்பெயர்ந்தோர் மீது கடுமையான நிலைப்பாட்டை எடுத்தார், அவர்கள் ருவாண்டாவுக்கு நாடு கடத்தப்படுவதை ஆதரித்தார்.
அவரது ராஜினாமா கடிதத்தில் டிரஸ் அரசாங்கம் மீதான அவரது விமர்சனங்களில், “எங்கள் வாக்காளர்களுக்கு வாக்குறுதியளிக்கப்பட்ட முக்கிய உறுதிமொழிகளை நாங்கள் மீறியது மட்டுமல்ல; ஒட்டுமொத்த இடம்பெயர்வு எண்ணிக்கையை குறைத்தல் மற்றும் சட்டவிரோத குடியேற்றத்தை நிறுத்துதல் உள்ளிட்ட பிரச்னைகளில் தீவிர கவலைகள் உள்ளன” எனத் தெரிவித்திருந்தார்.

ஆங்கிலத்தில் வாசிக்க : Why has British PM Rishi Sunak sacked his most visible minister, Suella Braverman?

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“