டெய்லர் ஸ்விஃப்ட்டின் இசை நிகழ்ச்சி நடத்த சிங்கப்பூர் அரசு ஒப்பந்தம் செய்தது ஏன்?
தென்கிழக்கு ஆசியாவில் சிங்கப்பூரில் மட்டும் இசை நிகழ்ச்சி நடத்தும் டெய்லர் ஸ்விஃப்ட்; தாய்லாந்து மற்றும் பிலிப்பைன்ஸைச் சேர்ந்த அரசியல்வாதிகள் விமர்சனம்; ஏன் என்பது இங்கே
மார்ச் 2, 2024 அன்று சிங்கப்பூரில் ஸ்விஃப்டின் ஈராஸ் டூர் கச்சேரியின் போது டெய்லர் ஸ்விஃப்ட்டின் ரசிகர்கள் அல்லது ஸ்விஃப்டீஸ் தேசிய மைதானத்தில் ஒரு படத்திற்கு போஸ் கொடுத்தனர். (REUTERS/Caroline Chia/File Photo)
சிங்கப்பூர் பிரதம மந்திரி லீ சியென் லூங் சமீபத்தில் அமெரிக்க பாடகர்-பாடலாசிரியர் டெய்லர் ஸ்விஃப்ட் தனது தற்போதைய உலகளாவிய சுற்றுப்பயணத்தின் ஒரு பகுதியாக சிங்கப்பூரில் பிரத்தியேகமாக நிகழ்ச்சிகளை நடத்துவதை உறுதிசெய்ய அவரது அரசாங்கம் செய்த ஒப்பந்தத்திற்கு ஆதரவு தெரிவித்தார்.
"தி ஈராஸ் டூர்" என்று அழைக்கப்படும், இந்த நிகழ்ச்சி அவரது தொழில் வாழ்க்கையின் வெவ்வேறு காலகட்டங்களில் இருந்து வெற்றிகளைக் கொண்டுள்ளது, ஒவ்வொரு கச்சேரியும் ஏறக்குறைய மூன்றரை மணி நேர நிகழ்ச்சியாகும். இது உலகம் முழுவதும் ஈர்த்துள்ள விற்பனை மற்றும் பார்வையாளர்களின் சாதனை எண்ணிக்கையுடன் அலைகளை உருவாக்கி வருகிறது.
மார்ச் 2023 இல் தொடங்கி, இந்த ஆண்டு இறுதி வரை சுற்றுப்பயணம் தொடர உள்ளது. டிசம்பர் 2023 இல், இது சுமார் $1 பில்லியன் வசூலித்தது, இது எல்லா காலத்திலும் அதிக வசூல் செய்த இசைப் பயணமாக அமைந்தது.
இருப்பினும், சிங்கப்பூரின் தென்கிழக்கு ஆசிய அண்டை நாடுகளான தாய்லாந்து மற்றும் பிலிப்பைன்ஸ் போன்றவை இந்த ஒப்பந்தத்திற்கு தங்கள் விமர்சனத்தை வெளிப்படுத்தியுள்ளன. ஏன் என்பது இங்கே.
முதலில், இந்த "ஒப்பந்தம்" என்றால் என்ன?
செவ்வாய்கிழமை (மார்ச் 5) ஆஸ்திரேலியாவிற்கு பயணம் செய்திருந்த சிங்கப்பூர் பிரதமர் செய்தியாளர் சந்திப்பில் இந்த விவகாரம் பற்றி பேசினார்.
“எங்கள் ஏஜென்சிகள் சிங்கப்பூருக்கு வந்து நிகழ்ச்சி நடத்தவும், தென்கிழக்கு ஆசியாவில் சிங்கப்பூரில் மட்டுமே நிகழ்ச்சி நடத்தவும் அவருடன் (டெய்லர் ஸ்விஃப்ட்) பேச்சுவார்த்தை நடத்தியது. எங்கள் சுற்றுலா மேம்பாட்டு நிதியில் இருந்து அவருக்கு ஒரு குறிப்பிட்ட ஊக்கத்தொகை வழங்கப்பட்டது, மேலும் ஒரு ஒப்பந்தம் எட்டப்பட்டது,” என்று பிரதமர் கூறினார்.
இது ஒரு "மிகவும் வெற்றிகரமான ஏற்பாடாக" மாறியது என்று கூறிய சிங்கப்பூர் பிரதமர், "அது நட்பற்றதாக நான் பார்க்கவில்லை," என்றும் கூறினார். ஜோய் சல்செடா என்ற பிலிப்பைன்ஸ் நாடாளுமன்ற உறுப்பினர், சிங்கப்பூருக்கு எதிராக தனது நாட்டு அரசாங்கம் முறையான எதிர்ப்பைத் தெரிவிக்க வேண்டும் என்று முன்பு கோரிக்கை விடுத்திருந்தார். "ஒரு நல்ல அண்டை நாடு இப்படி செய்யக்கூடாது" என்றும் ஜோய் சல்செடா கூறினார்.
கடந்த மாதம், தாய்லாந்து பிரதமர் ஸ்ரேத்தா தவிசினும் இந்த ஒப்பந்தம் குறித்து பேசினார். சிங்கப்பூரின் Channel News Asia (CNA) படி, "சிங்கப்பூர் அரசாங்கம் பிரத்தியேகமாக ஒரு நிகழ்ச்சிக்கு சுமார் $2 மில்லியன் முதல் $3 மில்லியன் வரை வழங்கியது" என்று தாய்லாந்து பிரதமர் கூறினார். இருப்பினும், இந்த எண்ணிக்கை மார்ச் மாத தொடக்கத்தில் சிங்கப்பூரில் நடைபெறவிருந்த ஆறு நிகழ்ச்சிகளுக்கு செலுத்தப்பட்ட மொத்த தொகையாக இருக்கலாம் என்று CNA கூறியது.
தாய்லாந்து பிரதமர் அலுவலகத்தின் செய்தித் தொடர்பாளரின் சமீபத்திய அறிக்கை, பிரதமரின் கருத்து விமர்சனமானது என்று மறுத்துள்ளது. "சிங்கப்பூரின் முன்மொழிவு அவர்கள் சிந்திக்கத் துணிந்ததையும், அதைச் செய்யத் துணிந்ததையும் காட்டும் ஒரு அணுகுமுறையாகும், மேலும் டெய்லர் ஸ்விஃப்ட்டின் குழு அந்த பிராந்தியத்தில் உள்ள ஒரே நாடான சிங்கப்பூரில் பிரத்யேக நிகழ்ச்சியை நடத்த வெற்றிகரமாக ஒப்புக்கொண்டது. அது நாட்டுக்கு நன்மை பயக்கும்” என்று அதில் கூறப்பட்டுள்ளது.
சிங்கப்பூர் ஏன் டெய்லர் ஸ்விஃப்ட் உடன் இந்த ஏற்பாட்டிற்கு அழுத்தம் கொடுத்தது?
இது லாபகரமான கச்சேரி பொருளாதாரத்தை கைப்பற்றுவதுடன் தொடர்புடையதாக இருக்கலாம். Swift, Coldplay, Beyonce, K-pop குழுக்கள் BTS மற்றும் Blackpink போன்ற உலகளாவிய பார்வையாளர்களைக் கொண்ட இசை நட்சத்திரங்களின் கச்சேரிகள் பெரும்பாலும் உள்ளூர் பொருளாதாரத்திற்கு தற்காலிக ஊக்கத்தை அளிக்கின்றன.
சில பெரிய விளைவுகள் நேரடியாகத் தெரியும். பெரிய கலைஞர்கள் பொதுவாக 40,000 முதல் 50,000 பேர் அல்லது அதற்கு மேற்பட்டவர்கள் அமரக்கூடிய அரங்கங்களை வாடகைக்கு எடுப்பார்கள். சிங்கப்பூரின் மிகப்பெரிய ஹோட்டல் குழுவான Accor இன் செய்தித் தொடர்பாளர் சவுத் சைனா மார்னிங் போஸ்ட்டிடம், மார்ச் 2024 இல் ஹோட்டல் முன்பதிவுகள் அதிகரித்துள்ளன, சில தங்குமிடங்கள் கச்சேரி தேதிகளில் முழுமையாக முன்பதிவு செய்யப்பட்டுள்ளன.
அதிகாரப்பூர்வ ஆன்லைன் விற்பனையின் போது இந்தக் கலைஞர்களுக்கு $300 (சுமார் ரூ. 25,000) வரையிலான டிக்கெட்டுகளை ரசிகர்கள் வாங்குகிறார்கள். இருப்பினும், பலர் மறுவிற்பனையாளர்கள் மூலம் டிக்கெட்டுகளை வாங்க வேண்டும், அவர்கள் ஆன்லைன் முறையை விரைவாகக் கையாளுகிறார்கள் மற்றும் முதலில் டிக்கெட்டுகளைப் பாதுகாக்கிறார்கள். டிக்கெட்டுகளின் விலை $1,000 (ரூ. 82,000) அல்லது அதற்கும் அதிகமாகும்.
மேலும், ஜப்பானைத் தவிர ஆசியாவின் ஒரே கச்சேரி இடமாக சிங்கப்பூர் இருப்பதால், அருகில் உள்ள நாடுகளிலிருந்தும் ரசிகர்கள் இங்கு வருவார்கள். தேவை சப்ளையை விட அதிகமாக உள்ளது.
இவ்வளவு பணம் செலவழிக்கப்படுவதால், பல ரசிகர்கள் கச்சேரியை ஒட்டி விடுமுறை எடுக்கிறார்கள். அவர்கள் நிகழ்ச்சி நடத்தும் நாட்டில் இன்னும் சில நாட்களைக் கழிக்கிறார்கள், பிற நகரங்களுக்குச் செல்கிறார்கள், உணவு மற்றும் பானங்கள், தங்குமிடம், பயணம், ஷாப்பிங் போன்ற பல விஷயங்களில் செலவிடுகிறார்கள்.
மேபேங்க் மேக்ரோ ஆராய்ச்சி இயக்குனர் எரிகா டே, தி வாஷிங்டன் போஸ்ட்டிடம் டெய்லர் ஸ்விஃப்ட்டின் சிங்கப்பூர் நிகழ்ச்சிகள் சுமார் 260 மில்லியன் டாலர் முதல் 375 மில்லியன் டாலர் வரை வருமானம் ஈட்டக்கூடும் என்று கூறினார்.
ஒப்பந்தத்தை தாண்டிய அம்சங்கள்
பொதுவாக, தென்கிழக்கு ஆசிய நாடுகள் ஒன்றுக்கொன்று நட்புறவைக் கொண்டுள்ளன. சில அண்டை நாடுகளின் விமர்சனங்கள் இருந்தபோதிலும், இந்தோனேசியா மற்றும் ஹாங்காங்கும் எதிர்காலத்தில் இதே போன்ற இசை நிகழ்ச்சிகளை நடத்த விருப்பம் தெரிவித்தன.
இந்தோனேசிய சுற்றுலா மந்திரி சந்தியாகா யூனோ "சிங்கப்பூரும் ஆஸ்திரேலியாவும் செய்ய முடிந்ததைப் போல், அதாவது டெய்லர் ஸ்விஃப்ட்டை அரசாங்கம் கொண்டு வர வேண்டும்" என்று SCMP குறிப்பிடுகிறது. எங்களுக்கு இந்தோனேசியாவில் ஸ்விஃப்டோனாமிக்ஸ் தேவை”. இசை, விளையாட்டு மற்றும் கலாச்சார நிகழ்வுகளுக்கு ஆதரவாக தொடங்கப்படும் $127 மில்லியன் நிதியான இந்தோனேசியா சுற்றுலா நிதியைப் பற்றியும் சந்தியாகா யூனோப்ளூம்பெர்க்கிடம் பேசினார்.
கூடுதலாக, ஸ்விஃப்ட்-சிங்கப்பூர் ஏற்பாட்டிற்கு அப்பால் கூட, ஆசியா மற்றும் ஆப்பிரிக்காவில் உள்ள ரசிகர்கள் இசைநிகழ்ச்சி நிகழ்விடங்களைத் தேர்ந்தெடுத்ததற்காக உலகளாவிய கலைஞர்களை அடிக்கடி விமர்சிக்கின்றனர். அமெரிக்கா, ஐரோப்பா, ஆஸ்திரேலியா மற்றும் ஜப்பான் நாடுகள் அடிக்கடி கலைஞர்களின் நிகழ்ச்சிகளைக் காணும் போது, ஆசியா மற்றும் ஆப்பிரிக்காவில் உள்ள முக்கிய நாடுகள் தவறவிடப்படுகின்றன.
எவ்வாறாயினும், கலைஞர்களின் அந்தத் தேர்வு, நடத்தும் நாட்டின் உள்கட்டமைப்பு திறன்கள், கலை மற்றும் பொழுதுபோக்கு தொடர்பான அரசாங்கத்தின் கொள்கைகள், போக்குவரத்து சேவைகள், உதவி ஊழியர்களாக பணியமர்த்துவதற்கு திறமையான தொழிலாளர்கள் இருப்பது போன்ற பெரிய பிரச்சினைகளுடன் தொடர்புடையது. பெரும்பாலான கலைஞர்களின் வருமானம் நேரலை நிகழ்ச்சிகளிலிருந்து வருவதால், லாபகரமான சுற்றுப்பயணம் முக்கியமானது.
“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“