விநாயகர் சதுர்த்தி வந்தாச்சு...டேஸ்டி கொழுக்கட்டை இப்படி பிடிங்க!

விநாயகர் சதுர்த்தி என்றாலே எல்லோருக்கும் நினைவுக்கு வருவது சுவையான கொழுக்கட்டைதான். வழக்கமான இனிப்பு கொழுக்கட்டைக்கு பதிலாக, வித்தியாசமான சுவையில், ஆரோக்கியமான கார கொழுக்கட்டை செய்வது எப்படி என்று பார்க்கலாம். மிருதுவான இட்லி ரவை, கேரட்டின் லேசான இனிப்பு சுவை மற்றும் காரமான மசாலாக்கள் என இது ஆரோக்கியமான உணவு மட்டுமல்ல, பண்டிகைக்கு ஏற்ற சிறந்த பலகாரமும் கூட.

தேவையான பொருட்கள்:

இட்லி ரவை - 1 கப்

தண்ணீர் - 1 கப் (ஊறவைக்க)

சமையல் எண்ணெய் - 2 டீஸ்பூன்

கடுகு - 1 டீஸ்பூன்

கடலைப்பருப்பு - ½ டீஸ்பூன்

சீரகம் - ¼ டீஸ்பூன்

உளுத்தம் பருப்பு - 1 டீஸ்பூன்

நறுக்கிய பச்சை மிளகாய் - 2

நறுக்கிய வெங்காயம் - 4 டீஸ்பூன் 

கறிவேப்பிலை - சிறிதளவு

பெருங்காயத்தூள் - 1 டீஸ்பூன்

துருவிய கேரட் - 5 டீஸ்பூன்

தண்ணீர் - 1½ கப்

உப்பு - தேவையான அளவு

துருவிய தேங்காய் - சிறிதளவு

செய்முறை:

முதலில், ஒரு பாத்திரத்தில் 1 கப் இட்லி ரவையுடன், 1 கப் தண்ணீர் சேர்த்து 10 நிமிடங்கள் ஊற வைக்கவும். இப்போது, ஒரு கடாயில் 2 டீஸ்பூன் எண்ணெய் ஊற்றி, கடுகு, கடலைப்பருப்பு, சீரகம், உளுத்தம் பருப்பு சேர்த்து தாளிக்கவும். பிறகு, நறுக்கிய வெங்காயம், பச்சை மிளகாய், கறிவேப்பிலை சேர்த்து 3-4 நிமிடங்கள் வதக்கவும். அடுத்து, பெருங்காயத்தூள், துருவிய கேரட் சேர்த்து ஒரு நிமிடம் வதக்கவும். இப்போது, 1½ கப் தண்ணீர், தேவையான அளவு உப்பு சேர்த்து 2 நிமிடங்கள் கொதிக்க விடவும். தண்ணீர் கொதித்ததும், ஊற வைத்த இட்லி ரவையைச் சேர்த்து நன்கு கிளறவும்.

பிறகு, துருவிய தேங்காய் சேர்த்து, மூடி போட்டு 4 நிமிடங்கள் வேக வைக்கவும். கலவை வெந்ததும், அடுப்பை அணைத்துவிட்டு 10 நிமிடங்கள் ஆற விடவும். கலவை ஆறியதும், கைகளில் சிறிது தண்ணீர் தடவி, உங்களுக்குப் பிடித்த வடிவத்தில் உருண்டைகளாகவோ அல்லது கொழுக்கட்டைகளாகவோ பிடிக்கவும். இறுதியாக, உருட்டிய கொழுக்கட்டைகளை இட்லி தட்டில் வைத்து, இட்லி பானையில் 5 நிமிடங்கள் ஆவியில் வேக வைத்து எடுக்கவும். சுவையான கார கொழுக்கட்டையை காரமான சட்னியுடன் பரிமாறவும். விநாயகர் சதுர்த்தியை மகிழ்ச்சியுடன் கொண்டாடுங்கள்.

View this post on Instagram

A post shared by Sakarasaathamum_vadakarium 😉 (@sakarasaathamum_vadakarium)