இரும்புச் சத்தின் ஊற்று... பசலைக் கீரையுடன் இதையும் ‌சேர்த்து சாப்பிட்டு பாருங்க; அம்புட்டு நல்லது!

இரும்புச் சத்து என்பது நம் உடலுக்கு மிகவும் அத்தியாவசியமான ஒரு முக்கிய ஊட்டச்சத்து ஆகும். இது உடலின் ஒட்டுமொத்த ஆரோக்கியத்திற்கும், சரியான செயல்பாட்டிற்கும் மிகவும் தேவைப்படுகிறது. இரத்தத்தில் ஆக்ஸிஜனைக் கடத்தும் மிக முக்கியமான புரதமான ஹீமோகுளோபினை உற்பத்தி செய்ய இரும்புச் சத்து தேவைப்படுகிறது. இரும்புச்சத்து குறைபாட்டால் இரத்த சோகை ஏற்படுகிறது.

இரும்பு சத்தானது நுரையீரல் மூலம் நாம் உள்ளிழுக்கும் ஆக்ஸிஜனை இரத்த சிவப்பணுக்கள் மூலமாக உடலின் அனைத்து திசுக்கள், தசைகள் மற்றும் உறுப்புகளுக்கு எடுத்துச் செல்ல உதவுகிறது. ஆக்ஸிஜன் சரியாகக் கடத்தப்படுவதால், உடல் சோர்வு நீங்கி, ஆற்றல் அதிகமாகிறது. இப்படி நம் உடலில் பல பயன்பாடுகளை செய்யக் கூடிய இரும்பு சத்து பசலைக் கீரையில் இருந்து அதிகப்படியாக கிடைக்கிறது. இதனுடன் எந்த உணவைச் சேர்த்து சாப்பிட்டால் இரும்பு சத்து விரைவாக உடலில் உறிஞ்சப்படும் என்று இந்த தொகுப்பில் பார்க்கலாம். 

எலுமிச்சை பழம்

எலுமிச்சை பழத்தில் உள்ள வைட்டமின் சி சத்து பசலைக்கீரையில் உள்ள நான்-ஹெமே (Non-heme) இரும்பு சத்துக்களை சுலபமாக அதிகளவில் உடலுக்குள் உறிஞ்சப்பட உதவி புரிவதாக நிபுணர்கள் கூறுகின்றனர். எனவே சமைத்த பசலைக் கீரை உணவு, பசலைக் கீரை சாலட் மற்றும் பசலைக் கீரை ஸ்மூத்தி போன்ற உணவுகளை பரிமாறுவதற்கு முன், ஃபிரஷ் லெமன் அல்லது லைம் ஜூஸை அதில் சேர்த்து உட்கொள்வது உடலில் சேரும் இரும்புச்சத்தின் அளவை அதிகரிக்க உதவும்.

தக்காளிப் பழம்

 தக்காளிப் பழங்களில் அதிகளவு வைட்டமின் சி மற்றும் லைக்கோபீன் என்ற சத்துக்கள் உள்ளன. மேலும், இரும்புச் சத்து உள்ளிட்ட பல கனிமச் சத்துக்களும் உள்ளன. 100 கிராம் தக்காளியில், அவை வளர்க்கப்படும் சூழலைப் பொறுத்து, சராசரியாக 1.50 எம்.ஜி முதல் 6.45 எம்.ஜி வரையிலான இரும்புச் சத்து உள்ளது.  தக்காளிப் பழங்களை நறுக்கி பசலைக் கீரையுடன் சேர்த்து சூப் போன்ற உணவு வகைகளை தயாரித்து உட்கொள்ளும் போது உடலுக்குள் அதிகளவு இரும்புச் சத்து சேரும்.

கொண்டைக் கடலை

கொண்டைக் கடலையில் இரும்புச் சத்து உடலுக்குள் உறிஞ்சப்பட உதவும் கனிமச் சத்துக்கள், புரதம் மற்றும் ஃபொலேட் போன்ற சத்துக்கள் கொண்டைக் கடலையில் அதிகம் உள்ளன. 100 கிராம் கடலையில் சுமார் 2.4 எம்.ஜி முதல் 11 எம்.ஜி வரை இரும்புச் சத்து உள்ளது. இதில் ஃபைட்டிக் ஆசிட் (Phytic acid) மற்றும் இரும்புச் சத்தின் உயிர் கிடைப்புத் திறனை பாதிப்படையச் செய்யும் கூட்டுப் பொருட்களுக்கு எதிர் வினையாற்றும் சத்துக்களும் உள்ளன. வேக வைத்த கொண்டைக் கடலையுடன் பசலைக் கீரை சேர்த்து குழம்பு, சாலட் மற்றும் சூப் செய்து உண்ணலாம்.