சிக்கனுக்கு டஃப் கொடுக்கும்... தயிர் சோறுக்கு ஏற்ற உருளை வறுவல்!

உருளைக்கிழங்கு வறுவல் என்பது குழந்தைகள் முதல் பெரியவர்கள் வரை அனைவருக்கும் மிக விருப்பமான ஒரு உணவாகும். ஆனால் ஒவ்வொரு முறையும் ஒரே மாதிரி செய்வதற்குப் பதிலாக, அடுத்த தடவையாவது இந்த உருளைக்கிழங்கு வறுவலை ஒருமுறை செய்து பாருங்கள்.

கருவேப்பிலை வாசனை கமகமவென்று வீசும் இந்த வறுவலை சாப்பிடும் போது அதன் சுவை அற்புதமாக இருக்கும். இதை எப்படி தயாரிப்பது என்பதை மைசெல்ஃப்டைம் என்ற இன்ஸ்டாகிராம் பக்கம் விளக்கியிருப்பதை இப்போது பார்க்கலாம்.

தேவையான பொருட்கள்:

உருளைக்கிழங்கு - அரை கிலோ (வேகவைத்து உப்பு சேர்த்து)
சீரகம் - அரை ஸ்பூன்
சோம்பு - அரை ஸ்பூன்
மிளகு - அரை ஸ்பூன்
தனியா - ஒரு ஸ்பூன்
எண்ணெய் - மூன்று டேபிள் ஸ்பூன்
உளுத்தம் பருப்பு - ஒரு ஸ்பூன்
பெருங்காயம் - கால் ஸ்பூன்
மஞ்சள் தூள் - கால் ஸ்பூன்
உப்பு - அரை ஸ்பூன் (வேகவைத்த உருளைக்கிழங்கில் ஏற்கனவே உப்பு சேர்த்திருப்பதால், தேவைப்பட்டால் மட்டும் சேர்க்கவும்)
கொத்தமல்லி  

அரை ஸ்பூன் சீரகம், சோம்பு, மிளகு, ஒரு ஸ்பூன் தனியா மற்றும் இரண்டு கொத்து கருவேப்பிலையை நன்கு வறுத்து, மணம் வரும்போது அதனை மிக்ஸி ஜாரில் போட்டு நன்றாக அரைத்து பொடியாக வைத்து கொள்ள வேண்டும்.

அடுத்ததாக, ஒரு கடாயில் மூன்று டேபிள் ஸ்பூன் எண்ணெய் ஊற்றி, அதில் ஒரு ஸ்பூன் உளுத்தம் பருப்பு, கால் ஸ்பூன் சீரகம், இரண்டு கொத்து கருவேப்பிலை, கால் ஸ்பூன் பெருங்காயம் மற்றும் கால் ஸ்பூன் மஞ்சள் தூளை சேர்த்து நன்றாக வதக்க வேண்டும்.

பின், முன்னமே வேக வைத்து வைத்துள்ள அரை கிலோ உருளைக்கிழங்கை இதில் சேர்த்து நன்கு கிளற வேண்டும். உருளைக்கிழங்கு வேகும்போதே உப்பு சேர்த்திருப்பதால், இப்போது அரை ஸ்பூன் உப்பை மட்டும் சேர்த்தால் போதும்.

அதன் பிறகு, அதை சிம்மில் அரை நிமிடம் வறுக்கவும். பின்னர் தயாராக வைத்திருந்த மசாலா பொடியை மேலே தூவி நன்கு கலக்கவும்.

இறுதியாக, இரண்டு நிமிடங்கள் நன்கு வதக்கி, அதிகம் கொத்தமல்லி தூவி இறக்கினால், மிகச் சுவையாகும் உருளைக்கிழங்கு வறுவல் ரெடி! இது சிக்கன் 65 யை விடவும் அருமையாக இருக்கும்.