அரைக்க, வதக்க வேணாம்... சப்பாத்திக்கு ஏற்ற சைடிஷ்!

ஒரு சில உணவுகள் எளிமையாக இருந்தாலும், அதன் சுவை நம்மை மீண்டும் மீண்டும் சுவைக்கத் தூண்டும். அத்தகைய ஒரு அரிய வகை உணவுகளில் ஒன்றுதான் இந்த பச்சை புளி உருளைப் பச்சடி. சமைக்கும் நேரம் குறைவு, தேவைப்படும் பொருட்கள் மிகக் குறைவு, ஆனால் அதன் சுவை ஒருமுறை உண்டால், மீண்டும் மீண்டும் சாப்பிடத் தோன்றும். இதை எப்படி செய்வது என்று சவுத் குக்ரி இன்ஸ்டா பக்கத்தில் கூறியிருப்பது பற்றி பார்ப்போம்.

தேவையான பொருட்கள்:

வேகவைத்து தோல் உரிக்கப்பட்ட உருளைக்கிழங்கு - 1
வெங்காயம் - 1/4 கப் (பொடியாக நறுக்கியது)
கொத்தமல்லி இலைகள் - 1/4 கப் (பொடியாக நறுக்கியது)
பச்சை மிளகாய் - 3 (பொடியாக நறுக்கியது)
புளி - நெல்லிக்காய் அளவு (1/2 கப் தண்ணீரில் ஊறவைத்து கரைசல் எடுத்தது)
உப்பு - தேவையான அளவு
மிளகாய் தூள் - 1/2 தேக்கரண்டி
வறுத்த சீரகப் பொடி - 1 தேக்கரண்டி
வெல்லம் - 1 தேக்கரண்டி
எண்ணெய் - 1 தேக்கரண்டி (விருப்பப்பட்டால்)
எலுமிச்சை சாறு - சிறிதளவு (கூடுதல் புளிப்புக்கு, விருப்பப்பட்டால்)

செய்முறை:

வேகவைத்த உருளைக்கிழங்கை ஒரு பாத்திரத்தில் போட்டு நன்கு மசிக்கவும். மசித்த உருளைக்கிழங்குடன் பொடியாக நறுக்கிய வெங்காயம், கொத்தமல்லி இலைகள் மற்றும் பச்சை மிளகாய்களை சேர்க்கவும்.

பிறகு, அதனுடன் புளிக் கரைசல், உப்பு, மிளகாய் தூள், வறுத்த சீரகப் பொடி, வெல்லம் மற்றும் எண்ணெய் (விருப்பப்பட்டால்) ஆகியவற்றைச் சேர்க்கவும். எலுமிச்சை சாறு சேர்க்க விரும்பினால், அதையும் இப்போது சேர்க்கலாம்.

இப்போது அனைத்து பொருட்களையும் உருளைக்கிழங்குடன் நன்கு கலக்கும்படி நன்றாக பிசையவும். அனைத்து பொருட்களும் ஒன்றுடன் ஒன்று கலந்து, ஒரே மாதிரியான பச்சடி பதத்திற்கு வந்தவுடன், உடனடியாக பரிமாறி மகிழலாம்.

View this post on Instagram

A post shared by South cookery (@south_cookery)

இந்தக் கலவை, வெறும் சுவைக்காக மட்டும் அல்ல, பார்ப்பதற்கும் அழகாக இருக்கும். பச்சை மிளகாய், கொத்தமல்லி இலைகள், சிவப்பு மிளகாய் தூள், மற்றும் உருளைக்கிழங்கின் மஞ்சள் நிறம் என வண்ணங்களின் கலவை, கண்ணுக்கு விருந்தளிக்கும்.