ஊற வைத்த கருப்பு உலர் திராட்சை... சுகர் நோயாளிகள் சாப்பிடலாமா? விளக்கும் டாக்டர் ராஜலட்சுமி

சர்க்கரை நோயாளிகள் தங்கள் உணவுப் பழக்கத்தில் மிகுந்த கவனம் செலுத்த வேண்டியது அவசியம். இந்த நிலையில், கருப்பு உலர் திராட்சையை அவர்கள் தங்கள் உணவில் சேர்த்துக்கொள்ளலாமா என்ற கேள்வி பலருக்கும் எழுகிறது. இந்த சந்தேகத்திற்கு டாக்டர் ராஜலட்சுமி காஸ்மோ ஹெல்த் அபிஷியல் யூடியூப் பக்கத்தில் தெளிவாக கூறியிருக்கிறார். 

கிளைசெமிக் இண்டெக்ஸ் மற்றும் நார்ச்சத்து:

கருப்பு உலர் திராட்சையின் கிளைசெமிக் இண்டெக்ஸ் (Glycemic Index - GI) 64 ஆகும். இது ஒரு மிதமான கிளைசெமிக் குறியீடாகும். கிளைசெமிக் இண்டெக்ஸ் என்பது ஒரு உணவுப் பொருள் எவ்வளவு விரைவாக இரத்த சர்க்கரை அளவை உயர்த்தும் என்பதைக் குறிக்கும் அளவீடு ஆகும். 55-க்கும் குறைவாக இருந்தால் குறைந்த GI, 56-70 வரை மிதமான GI, 70-க்கு மேல் இருந்தால் அதிக GI எனக் கருதப்படுகிறது. கருப்பு உலர் திராட்சை மிதமான GI கொண்டிருப்பதால், இது இரத்த சர்க்கரை அளவை உடனடியாக உயர்த்தும் வாய்ப்பு குறைவு.

மேலும், ஊறவைத்த கருப்பு உலர் திராட்சைக்கும் இதே கிளைசெமிக் இண்டெக்ஸ் தான். ஆனால் இதில் உள்ள கூடுதல் நன்மை என்னவென்றால், இதில் நார்ச்சத்து அதிகம் உள்ளது. நார்ச்சத்து நிறைந்த உணவுகள், சர்க்கரையை இரத்தத்தில் மெதுவாக வெளியிடும் தன்மையைக் கொண்டுள்ளன. இதனால், இரத்த சர்க்கரை அளவு ஒரேயடியாக அதிகரிப்பதைத் தடுக்கிறது.

டாக்டர் ராஜலட்சுமி பரிந்துரைப்படி, ஒரு நாளைக்கு சுமார் 20 கருப்பு உலர் திராட்சைகளை ஊறவைத்து சாப்பிடுவதால் சர்க்கரை நோயாளிகளுக்கு பெரிய அளவில் பாதிப்பு ஏற்படாது. இது அவர்களுக்கு ஒரு பாதுகாப்பான மற்றும் ஆரோக்கியமான சிற்றுண்டியாக அமையும்.  

பொறுப்பு துறப்பு: இந்தக் கட்டுரை பொது தளத்தில்/ நாங்கள் தொடர்பு கொண்டு பேசிய நிபுணர்களிடம் இருந்து பெறப்பட்ட தகவல் அடிப்படையில் எழுதப்பட்டுள்ளது. இக்கட்டுரையில் குறிப்பிட்டு இருப்பதை நீங்கள் கடைபிடிக்கும் முன், உங்கள் குடும்ப மருத்துவர் அல்லது உங்கள் உடல்நலப் பயிற்சியாளரை அணுகும்படி கேட்டுக் கொள்கிறோம்.