நோய் எதிர்ப்பு சக்தியை அதிகரிக்கும்... இந்தக் கீரையில் கடையல் சாப்பிட்டு பாருங்க!

பாரம்பரிய உணவுகளில் கீரைகளுக்கு எப்போதும் சிறப்பான இடம் உண்டு. அத்தகைய கீரைகளில் மிகவும் மருத்துவ குணம் வாய்ந்தது வல்லாரைக் கீரை. நினைவாற்றலை அதிகரிக்கவும், நரம்பு மண்டலத்தை வலுப்படுத்தவும் வல்லாரைக்கீரை பெரிதும் உதவுகிறது. சுவையான மற்றும் ஆரோக்கியமான வல்லாரைக்கீரை துவையலை எப்படி செய்வது என்று இந்தக் கட்டுரையில் காணலாம்.

வல்லாரைக்கீரை துவையல் - தேவையான பொருட்கள்:

வல்லாரைக்கீரை - 1 கட்டு, தேங்காய் துருவல் - 1/2 கப், புளி - சிறிய நெல்லிக்காய் அளவு, காய்ந்த மிளகாய் - 3-4 (காரத்திற்கு ஏற்ப), உளுத்தம் பருப்பு - 1 தேக்கரண்டி, கடுகு - 1/2 தேக்கரண்டி, சீரகம் - 1/2 தேக்கரண்டி, நல்லெண்ணெய் - 2 தேக்கரண்டி, உப்பு - தேவையான அளவு

செய்முறை:

முதலில் வல்லாரைக்கீரையை நன்கு சுத்தம் செய்து, தண்ணீரில் நன்றாக அலசி, பொடியாக நறுக்கி வைத்துக் கொள்ளவும். ஒரு கடாயில் ஒரு தேக்கரண்டி நல்லெண்ணெய் ஊற்றி சூடாக்கவும். எண்ணெய் காய்ந்ததும், காய்ந்த மிளகாய், உளுத்தம் பருப்பு மற்றும் சீரகம் சேர்த்து பொன்னிறமாக வறுத்து எடுக்கவும். அதே கடாயில் மீதமுள்ள நல்லெண்ணெயைச் சேர்த்து, நறுக்கிய வல்லாரைக்கீரையை சேர்க்கவும். கீரை சுருங்கி, நிறம் மாறி, பச்சை வாசனை போகும் வரை நன்கு வதக்க வேண்டும்.

வறுத்த பொருட்கள், வதக்கிய கீரை, தேங்காய் துருவல், புளி மற்றும் தேவையான அளவு உப்பு ஆகியவற்றை ஒரு மிக்ஸி ஜாரில் சேர்க்கவும். தண்ணீர் சேர்க்காமல் முதலில் அரைக்கவும். அதன் பிறகு, தேவைப்பட்டால் ஒரு சில துளிகள் மட்டும் தண்ணீர் சேர்த்து கெட்டியான பதத்தில் துவையலாக அரைத்தெடுக்கவும். அரைத்த துவையலை ஒரு கிண்ணத்தில் மாற்றி வைத்துக் கொள்ளவும். இப்போது ஒரு சிறிய தாளிப்பு கரண்டியில் சிறிது எண்ணெய் ஊற்றி, கடுகு சேர்த்து வெடிக்க விடவும். கடுகு வெடித்ததும், அதில் சிறிது கறிவேப்பிலை சேர்த்து தாளித்து, துவையலின் மீது ஊற்றவும். இப்போது, சுவையான மற்றும் ஆரோக்கியமான வல்லாரைக்கீரை துவையல் தயார்! இதனை சூடான சாதம், இட்லி அல்லது தோசையுடன் சேர்த்துப் பரிமாறலாம்.

வல்லாரைக் கீரை ஆரோக்கிய நன்மைகள்:

வல்லாரைக்கீரை மூளைக்கு நல்லது மற்றும் நினைவாற்றலை அதிகரிக்கிறது. இதில் வைட்டமின் சி அதிகம் இருப்பதால் நோய் எதிர்ப்பு சக்தியை அதிகரிக்கிறது. இதில் கால்சியம், மெக்னீசியம், ஜிங்க், பொட்டாசியம் போன்ற அத்தியாவசிய தாதுக்கள் நிறைந்துள்ளன. இந்த ஊட்டச்சத்துக்கள் காரணமாக, வல்லாரைக்கீரை உடலுக்கு பல நன்மைகளை வழங்குகிறது.