அடி வயிறு கொழுப்பை கரைக்கும்... இந்தக் கூட்டு கிடைச்சா விடாதீங்க!

சுரைக்காய், நீர்ச்சத்து நிறைந்த ஒரு அற்புதமான காய். கோடை காலத்தில் உடலை நீரேற்றமாக வைத்திருக்க இது மிகவும் அவசியம். மேலும், சுரைக்காயில் நார்ச்சத்து அதிகம் இருப்பதால், இது செரிமானத்தை மேம்படுத்துவதோடு, நீண்ட நேரம் வயிறு நிரம்பிய உணர்வை தந்து, அடிவயிற்று கொழுப்பை குறைக்க பெரிதும் உதவுகிறது. இந்த சுரைக்காய் கூட்டை எப்படி சுவையாகவும், ஆரோக்கியமாகவும் செய்வது என்று ரெசிபி வெயிட்லாஸ் இன்ஸ்டா பக்கத்தில் கூறியிருப்பது பற்றி பார்ப்போம்.

தேவையான பொருட்கள்:

சுரைக்காய் - 1 (சிறியது)
பாசிப்பருப்பு - 1/2 கப்
சின்ன வெங்காயம் - 10-15
பூண்டு பற்கள் - 4-5
தக்காளி - 1
மஞ்சள் தூள் - 1/2 டீஸ்பூன்
மிளகாய் தூள் - 1 டீஸ்பூன்
கடுகு - 1/2 டீஸ்பூன்
சீரகம் - 1/2 டீஸ்பூன்
பெருங்காயத்தூள் - ஒரு சிட்டிகை
கறிவேப்பிலை - சிறிதளவு
கொத்தமல்லி இலை - சிறிதளவு
எண்ணெய் - 1 டேபிள் ஸ்பூன்
உப்பு - தேவையான அளவு

செய்முறை:

முதலில் பாசிப்பருப்பை நன்கு கழுவி, 15 நிமிடம் ஊறவைக்கவும். சுரைக்காயை தோல் சீவி, சிறு துண்டுகளாக நறுக்கி கொள்ளவும். ஒரு குக்கரில் எண்ணெய் விட்டு, கடுகு, சீரகம் போட்டு தாளிக்கவும். பிறகு, பூண்டு, சின்ன வெங்காயம் சேர்த்து வதக்கவும். வெங்காயம் வதங்கியதும், நறுக்கிய தக்காளி, மஞ்சள் தூள், மிளகாய் தூள் சேர்த்து நன்கு வதக்கவும்.

அதனுடன் நறுக்கிய சுரைக்காய் துண்டுகள், ஊறவைத்த பாசிப்பருப்பு, தேவையான அளவு உப்பு மற்றும் தண்ணீர் சேர்த்து குக்கரை மூடி 2 விசில் வரும் வரை சமைக்கவும். விசில் அடங்கியதும், குக்கரை திறந்து, கூட்டை நன்கு மசித்து விடவும். கடைசியில், நறுக்கிய கொத்தமல்லி இலைகளை தூவி பரிமாறவும்.

View this post on Instagram

A post shared by @recipe_weightloss

இந்த சுரைக்காய் கூட்டை சாதம், சப்பாத்தி அல்லது இட்லி, தோசையுடன் சேர்த்து சாப்பிடலாம். இது சுவையாக இருப்பதோடு, உங்களின் ஆரோக்கியத்திற்கும் நன்மை பயக்கும். மேலும், இந்த கூட்டில் தேங்காய் சேர்க்க தேவையில்லை. இதனால், கலோரிகள் குறைவாக இருக்கும். சுரைக்காய் வாங்கும்போது, காய் இளம் பச்சை நிறத்திலும், உறுதியாகவும் உள்ளதா என்பதை உறுதி செய்து கொள்ளவும். மேலும், கசப்பு தன்மை இல்லாத சுரைக்காயை தேர்ந்தெடுக்கவும்.