கிரேவி இப்படி இருந்தா... அரை பிளேட் பிரியாணி எக்ஸ்ட்ரா சாப்பிடலாம்: செஃப் தீனா ரெசிபி

சுவையான பிரியாணிக்கு சரியான துணை உணவு என்றால் அது எண்ணெய் கத்திரிக்காய் கிரேவி தான். இந்த கிரேவியை எப்படி டேஸ்டியாக செய்வது என்று செஃப் தீனா தனது இன்ஸ்டாகிராம் பக்கத்தில் செய்து காட்டியிருப்பது பற்றி பார்ப்போம்.

தேவையான பொருட்கள்:

கடுகு - 1 தேக்கரண்டி
வெந்தயம் - 1/4 தேக்கரண்டி
மிளகு - 1/2 தேக்கரண்டி
சீரகம் - 1/2 தேக்கரண்டி
கறிவேப்பிலை - சிறிதளவு
வெள்ளை எள் - 25 கிராம்
வறுத்த வேர்க்கடலை - 25 கிராம்
சீரகம் - 1 தேக்கரண்டி
கடுகு - 1 தேக்கரண்டி
கத்திரிக்காய் - 250 கிராம்
தக்காளி (பெரியது) - 1
பச்சை மிளகாய் - 3
புளி - எலுமிச்சை அளவு
மிளகாய்த்தூள் - 1/2 தேக்கரண்டி
மஞ்சள்தூள் - 1/4 தேக்கரண்டி
தனியா தூள் - 1 தேக்கரண்டி
உப்பு - தேவையான அளவு
கடலை எண்ணெய் - 100 மிலி

செய்முறை:

முதலில், ஒரு கடாயில் வெள்ளை எள், வறுத்த வேர்க்கடலை, சீரகம், மற்றும் கடுகு சேர்த்து மிதமான தீயில் வறுக்கவும். அவை வாசம் வரும் வரை வறுத்து, அடுப்பை அணைத்து ஆற விடவும். ஆறியதும் அதை மிக்ஸியில் போட்டு மசாலா பொடியாக அரைத்து தனியே வைக்கவும்.

அடுத்து, கத்திரிக்காய்களை சுத்தம் செய்து, காம்பு நீக்காமல் நான்கு துண்டுகளாக கீறி விடவும். ஒவ்வொரு கத்திரிக்காய்க்கு உள்ளேயும் உப்பு, மிளகாய் தூள் மற்றும் மஞ்சள் தூள் சேர்த்து கலக்கவும். ஒரு பெரிய கடாயில் கடலை எண்ணெய் ஊற்றி சூடாக்கவும். எண்ணெய் சூடானதும் கீறிய கத்திரிக்காய்களை அதில் போட்டு பொன்னிறமாக வதக்கி எடுக்கவும்.

இப்போது அதே எண்ணெயில் கடுகு, வெந்தயம், மிளகு, சீரகம் மற்றும் கறிவேப்பிலை சேர்த்து தாளிக்கவும். தாளிப்பு வாசனை வந்ததும், நீளமாக நறுக்கிய பச்சை மிளகாயை சேர்க்கவும். அதன் பிறகு, பொடியாக நறுக்கிய தக்காளியை சேர்த்து நன்கு வதக்கவும். தக்காளி கூழாக வதங்கியதும், மீதமுள்ள மிளகாய்த்தூள், மஞ்சள்தூள் மற்றும் தனியா தூள் சேர்த்து நன்கு வதக்கவும்.

View this post on Instagram

A post shared by Deena Dhayalan (@chefdeenadhayalan)

புளியை தண்ணீரில் கரைத்து, அந்த புளிக்கரைசலை கிரேவி கலவையுடன் சேர்க்கவும். தேவையான அளவு உப்பு சேர்த்து நன்கு கலக்கவும். இப்போது, நாம் முன்பு பொரித்து வைத்த கத்திரிக்காய்களை இந்த கிரேவியுடன் சேர்த்து, மசாலா பொடியையும் சேர்க்கவும். கிரேவி கெட்டியாகும் வரை மிதமான தீயில் நன்கு கொதிக்க விடவும். இந்த செய்முறையின்படி செய்தால், பிரியாணிக்கு ஏற்ற சுவையான எண்ணெய் கத்திரிக்காய் கிரேவி தயார், இதை பிரியாணியுடன் சேர்த்து பரிமாறலாம்.