இனி சாம்பாரே வைக்க வேணாம்... இந்த ஒரு ரெசிபி போதும்: செஃப் வெங்கடேஷ் பட் டிப்ஸ்!

சமையல் கலைஞர் வெங்கடேஷ் பட் தனது யூடியூப் பக்கத்தில் பொரிச்ச ரசம் செய்து காட்டியுள்ளார். இதற்குமுன் இப்படி ஒரு ரசத்தை நாம் யாரும் செய்து இருக்க மாட்டோம். பொதுவாக ரசம் என்றாலே எளிமையான, புளி கலந்த நீர் போல இருக்கும் என்ற எண்ணம் உண்டு. ஆனால், பொரிச்ச ரசம் என்பது பருப்பு, மிளகு, சீரகம் மற்றும் தேங்காய் ஆகியவற்றை வறுத்து அரைப்பதன் மூலம் ஒரு அடர்த்தியான, மணம் நிறைந்த ரசமாக உருவாகிறது. இந்த செய்முறை, வழக்கமான ரசத்தை விடவும் அதிக சுவையையும், உடலுக்கு ஆரோக்கியத்தையும் தரும். இதை சாம்பாருக்கு பதிலாகக் கூட பயன்படுத்தலாம். வெங்கடேஷ் பட் அவர்களின் பாணியில் பொரிச்ச ரசம் தயாரிப்பது எப்படி என்று கீழே காணலாம்.

தேவையான பொருட்கள்:

எண்ணெய்
கடலை பருப்பு
துவரம் பருப்பு
உளுத்தம் பருப்பு
காய்ந்த மிளகாய்
மிளகு
சீரகம்
தேங்காய் துருவல்
நெய்
கடுகு
கறிவேப்பிலை
பச்சை மிளகாய்
தக்காளி 
மஞ்சள் தூள்
உப்பு
வெல்லம்
கொத்தமல்லி

செய்முறை:

முதலில், ஒரு கடாயில் சிறிதளவு எண்ணெய் விட்டு, ஒன்றரை டீஸ்பூன் கடலை பருப்பு, இரண்டு டீஸ்பூன் துவரம் பருப்பு மற்றும் அரை டீஸ்பூன் உளுத்தம் பருப்பு ஆகியவற்றை பொன்னிறமாக வதக்கவும். அடுத்து, அதே கடாயில் பத்து காய்ந்த மிளகாய், ஒரு டீஸ்பூன் மிளகு, ஒன்றரை டீஸ்பூன் சீரகம் மற்றும் ஒரு கைப்பிடி தேங்காய் துருவல் சேர்த்து நன்கு வறுக்கவும்.

இந்த வறுத்த கலவையை ஆறவிட்டு, மிக்ஸியில் போட்டு முக்கால் பவுடராக அரைத்துக்கொள்ளவும். இதுவே ரசத்திற்கான பிரதான பொடியாக அமையும். வேறு ஒரு பாத்திரத்தில் இரண்டரை டீஸ்பூன் நெய் விட்டு, அது சூடானதும், மூன்று காய்ந்த மிளகாய், கால் டீஸ்பூன் கடுகு, கால் டீஸ்பூன் சீரகம், ஒரு கொத்து கறிவேப்பிலை மற்றும் இரண்டு பச்சை மிளகாய் சேர்த்து தாளிக்கவும்.

பிறகு, அரைத்த தக்காளி பியூரி, கால் டீஸ்பூன் மஞ்சள் தூள் மற்றும் தேவையான அளவு உப்பு சேர்த்து ஒரு கொதி வர வரை கொதிக்கவிடவும். இப்போது, நீங்கள் அரைத்து வைத்த ரசப்பொடியையும், அரை டீஸ்பூன் மிளகு தூள் மற்றும் ஒரு டீஸ்பூன் வெல்லம் சேர்த்து ஒரு கொதி வந்ததும் அடுப்பை அணைக்கவும். கடைசியாக, பொடியாக நறுக்கிய கொத்தமல்லி மற்றும் ஒரு ஸ்பூன் நெய் சேர்த்து, பாத்திரத்தை மூடி வைக்கவும்.