செய்யுறது ரொம்ப சிம்பிள்... ஆனா டேஸ்ட் பக்காவா இருக்கும்; முட்டை கிரேவி இப்படி செஞ்சு கலக்குங்க!

அசைவ உணவில் மிகவும் எளிதாக செய்யக்கூடிய ரெசிபியில் ஒன்று முட்டை. குழந்தைகள் முதல் பெரியவர்கள் வரை அனைவரும் விரும்பி இதை சாப்பிடுவார்கள். மேலும் இது புரதம் நிறைந்த உணவாகும். எனவே அனைவரும் விரும்பி சாப்பிடும் வகையில் கவுண்டம்பாளையம் ஸ்டைலில் முட்டை கிரேவி வீட்டிலேயே சுவையாக எப்படி செய்யலாம் என்று இந்த பதிவில் பார்க்கலாம்.

தேவையான பொருட்கள்

முட்டை - 3
பெரிய வெங்காயம் - 1
உப்பு - சுவைக்கேற்ப
துருவிய தேங்காய் - 2 டேபிள் ஸ்பூன்
தக்காளி - 2
பூண்டு - 3 பல்
மஞ்சள் தூள் - 1/4 டீஸ்பூன்
சிவப்பு மிளகாய் தூள் - 1 டீஸ்பூன்
கொத்தமல்லி தூள் - 3 டீஸ்பூன்
கருப்பு மிளகு - 1/2 டீஸ்பூன்
பெருஞ்சீரகம் - 1 டீஸ்பூன்
எண்ணெய் - 2 டேபிள் ஸ்பூன்
இலவங்கப்பட்டை - 1
பெருஞ்சீரகம் - 1 டீஸ்பூன்
கறிவேப்பிலை - சிறிதளவு

செய்முறை

முதலில் முட்டைகளை வேக வைத்து அதன் ஓட்டை நீக்கிக் கொள்ளவும். பின்னர் முட்டைகளை மெதுவாக நாற்பக்கமும் சிறிது கீறி தனியாக வைத்துக்கொள்ளவும். பிறகு ஒரு மிக்ஸி ஜாரில் துருவிய தேங்காய், நறுக்கிய தக்காளி, கருப்பு மிளகு, பூண்டு, பெருஞ்சீரகம், மஞ்சள் தூள், சிவப்பு மிளகாய் தூள் மற்றும் கொத்தமல்லி தூள் ஆகியவற்றை சேர்த்து மென்மையான பேஸ்டாக அரைத்துக் கொள்ளவும். அடுப்பில் கடாயை வைத்து எண்ணெய் ஊற்றி சூடாகியதும், இலவங்கப்பட்டை, பெருஞ்சீரகம் மற்றும் கறிவேப்பிலை சேர்த்து வறுத்துக் கொள்ளவும்.

பின்னர் அதில் நறுக்கிய பெரிய வெங்காயம் மற்றும் தேவையான உப்பை சேர்த்து ஓரிரு நிமிடங்கள் வதக்கவும். வெங்காயம் கண்ணாடிப் பதத்திற்கு வதங்கியவுடன் அரைத்த மசாலா பேஸ்ட்டை சேர்த்து நன்கு கிளறவும். அதன்பின் தேவையான அளவு தண்ணீர் ஊற்றி மிதமான தீயில் கொதிக்க விடவும். கொதிக்கும் கிரேவியில் அவித்த முட்டைகளைச் சேர்த்து குறைந்த தீயில் 5 நிமிடங்கள் சமைக்கவும்.

கிரேவி கொதிக்க ஆரம்பித்தவுடன் இறக்கினால், சுவையான கவுண்டம்பாளையம் ஸ்டைல் முட்டை கிரேவி தயார்!

View this post on Instagram

A post shared by Madhu ✨️ (@flavorsbymadhu)